កិច្ចប្រជុំពេញអង្គលើកទី៨ របស់គណៈកម្មាធិការសម្របសម្រួលអន្តរជាតិសម្រាប់ការអភិរក្ស និង ការលើកតម្លៃព្រះវិហារ ហៅកាត់ថា ICC-Preah Vihear បានបញ្ចប់ហើយនៅថ្ងៃទី១១ ខែធ្នូ ឆ្នាំ២០២៣ នៅខេត្តសៀមរាប ជាមួយនិងការអបអរសាទរ លើកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការដាក់បញ្ចូលតំបន់បេតិកភណ្ឌកោះកេរជាសម្បត្តិបេតិកភណ្ឌពិភពលោក កាលពីខែកញ្ញាឆ្នាំ២០២៣នេះ។
កិច្ចប្រជុំពេញអង្គលើកទី៨ ប្រារព្ធក្រោមអធិបតីលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានគណៈប្រតិភូរាជរដ្ឋាភិបាលកម្ពុជា រួមជាមួយសហប្រធាន អគ្គនាយកដ្ឋានរដ្ឋបាលវប្បធម៌ និងបេតិកភណ្ឌ ប្រទេសចិន និងឧបការីស្ថានទូតឥណ្ឌាប្រចាំនៅកម្ពុជា និងតំណាងសមាជិកចំនួន ៥ ប្រទេសរួមមាន បែលហ្សិក បារាំង ជប៉ុន ថៃ និងសហរដ្ឋអាមេរិក ព្រមទាំងស្ថាប័នជាតិ អន្តរជាតិ អាជ្ញាធរ និងអ្នកស្រាវជ្រាវសរុប១៣១រូប។
បើតាមសេចក្ដីប្រកាសព័ត៌មាន នៃកិច្ចប្រជុំនេះ បង្ហាញថា កិច្ចប្រជុំ ICC-Preah Vihear បាននិងកំពុងតាមដាន និងត្រួតពិនិត្យការងារអភិរក្ស និងអភិវឌ្ឍន៍តំបន់រមណីយដ្ឋានប្រាសាទព្រះវិហារ និងប្រាសាទកោះកេរ ដែលអនុវត្តដោយអាជ្ញាធរជាតិព្រះវិហារ និងដៃគូអន្តរជាតិ។ ក្នុងនោះ ការងារសំខាន់ៗ ដែលផ្តោតលើការងារជួសជុល អភិរក្ស និងអភិវឌ្ឍន៍ប្រាសាទព្រះវិហាររួមមាន លទ្ធផលសិក្សាស្រាវជ្រាវបឋមសម្រាប់ការអភិរក្សនិងជួសជុលគោបុរៈទី១ ទី២ និងទី៣ នៃប្រាសាទព្រះវិហារ រវាងអាជ្ញាធរជាតិព្រះវិហារ ចិន និងឥណ្ឌា ការងារជួសជុលរូប បំណែកព្រះឥសូរាំនៅប្រាសាទធំ។ ការអភិរក្ស និងជួសជុលជណ្តើរបុរាណខាងជើងប្រាសាទព្រះវិហារ ការអភិរក្សនៅប្រាសាទបល្ល័ង្គត្បូង(ប្រាសាទលិង្គ៣) ការតាំងទីលំនៅរបស់មនុស្ស តាមរយៈការសង្កេតមើលសំណល់បុរាណវត្ថុនៅរមណីយដ្ឋានកោះកេរ និងប្រាសាទព្រះវិហារ ការសិក្សាប្រព័ន្ធធារាសាស្ត្របុរាណនៅតំបន់កោះកេរ និងគម្រោងកែលម្អផ្លូវនៅតំបន់កោះកេរ។ អង្គប្រជុំ ក៏បានថ្លែងអំណរគុណ ចំពោះការចូលរួមជំនួយ ជាហិរញ្ញវត្ថុ និងបច្ចេកទេស របស់រដ្ឋជាសមាជិក ICC-Preah Vihear លើការងារជួសជុល អភិរក្ស និងអភិវឌ្ឍន៍កន្លងមក។
គួរជម្រាបថា គណៈកម្មាធិការ ICC-Preah Vihear បានសម្រេចឱ្យបង្កើតដោយក្រុមប្រឹក្សាប្រតិបត្តិរបស់អង្គការយូណេស្កូ កាលពីថ្ងៃទី២៣ ខែតុលា ឆ្នាំ២០១៤ ដែលកើតចេញពីការបញ្ចូលប្រាសាទព្រះវិហារ ទៅក្នុងបញ្ជីបេតិកភណ្ឌពិភពលោកកាលពីថ្ងៃទី៧ ខែកក្កដា ឆ្នាំ២០០៨។ ហើយកិច្ចប្រជុំលើកដំបូង របស់គណៈកម្មាធិការ ICC-Preah Vihear នៅខេត្តសៀមរាប នាថ្ងៃទី៣ ខែធ្នូ ឆ្នាំ២០១៤។
អត្ថបទ និងរូបភាព៖ លោក យូ វង្ស និងលោក បូ សាវី
កែសម្រួល៖ លោក សេង ផល្លី
