នាខេត្តសៀមរាប ព្រឹកថ្ងៃទី១២ ខែធ្នូ ឆ្នាំ២០២៣នេះ លោក សួង ម៉េងឡុង រដ្ឋលេខាធិការ និងជាប្រធានក្រុមការងារ ទទួលបន្ទុកកិច្ចការសហប្រតិបត្តិការអន្តរជាតិ បានអញ្ជើញបើកសន្និសីទអាស៊ានលើកទី៤ ស្តីពីភាពជាដៃគូ ប្រចាំឆ្នាំ២០២៣ ដែលមានការចូលរួម ពីតំណាងក្រសួងកិច្ចការនារី តំណាងគណៈកម្មការអាស៊ាន ស្តីពីការលើកកម្ពស់ និងការការពារសិទ្ធិស្រ្តី និងកុមារ (ACWC) តំណាងគណៈកម្មាធិការអាស៊ានស្តីពីស្ត្រី (ACW) នៃប្រទេសជាសមាជិកអាស៊ាន ដៃគូអភិវឌ្ឍ ព្រមទាំងអង្គការសង្គមស៊ីវិល ចូលរួមផ្ទាល់ និងតាមប្រព័ន្ធអនឡាញ សរុបចំនួន ១២០រូប។
ថ្លែងក្នុងឱកាសនោះ ឯកឧត្តម សួង ម៉េងឡុង បង្ហាញថា ក្នុងនាមជារដ្ឋសមាជិកអាស៊ាន កម្ពុជាក៏ដូចប្រទេសជាសមាជិកផ្សេងទៀត បានយកចិត្តទុកដាក់ខ្ពស់ដល់ស្ត្រី និងកុមារ ដោយចាត់ទុកស្ត្រី និងកុមារជាចំណុចស្នូល នៃការអភិវឌ្ឍន៍គោលនយោបាយនានា ព្រោះថា “ស្ត្រីគឺជាមាតានៃពិភពលោក និងជាឆ្អឹងខ្នង នៃការអភិវឌ្ឍន៍សេដ្ឋកិច្ចសង្គមជាតិ” ហើយ “កុមារ គឺជាមូលធន សម្រាប់ប្រជាជាតិយើងទាំងបច្ចុប្បន្ន ទាំងអនាគតសម្រាប់មនុស្សជំនាន់ក្រោយ”។ កម្ពុជាតែងតែចូលរួមយ៉ាងសកម្ម ក្នុងការឯកភាព គាំទ្រ និងអនុវត្តន៍លិខិតតុបករណ៍ គោលនយោបាយ គោលការណ៍ណែនាំ ផែនការសកម្មភាពសម្រាប់ការលើកកម្ពស់ និងការពារសិទ្ធិស្ត្រី និងកុមារ ទាំងក្នុងកម្រិតតំបន់ និងពិភពលោក ដើម្បីឱ្យស្ត្រី និងកុមារមានសិទ្ធិ និងឱកាសចូលរួមស្មើភាពគ្នា និងសិទ្ធិទទួលបានសេវាសង្គម និងយុត្តិធម៌ស្មើៗគ្នា។
ឯកឧត្តម បានបញ្ជាក់បន្ថែមថា កម្ពុជាបានប្តេជ្ញាចិត្តយ៉ាងមុតមាំក្នុងការបញ្ចប់អំពើហិង្សាលើស្ត្រី និងកុមារ ដូចដែលបានកំណត់នៅក្នុងគោលដៅទី៥របស់កម្ពុជា ស្តីពី “ការសម្រេចបានសមភាពយេនឌ័រ និងការផ្តល់សិទ្ធិអំណាចដល់ស្ត្រី និងកុមារីទាំងអស់” និងគោលដៅ ទី១៦.២ ស្តីពីការលុបបំបាត់អំពើហិង្សាលើកុមារ ដោយធានាថា “គ្មានកុមារណាម្នាក់ត្រូវបានទុកចោលឡើយ” នៅត្រឹមឆ្នាំ២០៣០ ដែលស្របតាមរបៀបវារៈសកលនៃគោលដៅ អភិវឌ្ឍន៍ប្រកបដោយចីរភាព។
ឯកឧត្តម សួង ម៉េងឡុង ក៏បានស្នើសុំដល់ដៃគូអភិវឌ្ឍន៍ទាំងអស់ ទាំងទីភ្នាក់ងារអង្គការសហប្រជាជាតិ អង្គការសង្គមស៊ីវិល និងអ្នកពាក់ព័ន្ធផ្សេងៗទៀត ពិចារណាធ្វើការក្នុងភាពជាដៃគូជាមួយប្រទេសជាសមាជិក អាស៊ាន ដើម្បីធានាថាសិទ្ធិស្ត្រី និងកុមារទទួលបានពេញលេញតាមសេចក្តីត្រូវការរបស់ពួកគេ។
ឆ្លៀតក្នុងឱកាសនោះ ឯកឧត្តម សួង ម៉េងឡុង ក៏បានថ្លែងអំណរគុណដល់ តំណាង គណៈកម្មការអាស៊ាន ស្តីពីការលើកកម្ពស់ និងការការពារសិទ្ធិស្រ្តី និងកុមារ (ACWC) ផ្នែកសិទ្ធិកុមារ នៃប្រទេសកម្ពុជា ប្រទេសប្រ៊ុយណេ ប្រទេសថៃ និងតំណាងលេខាធិការដ្ឋានអាស៊ាន ដែលបានសហការរៀបចំសន្និសីទនេះឡើង។
អត្ថបទ និង រូបថត ៖ លោក ស៊ុំ គីន
កែសម្រួលអត្ថបទ ៖ លោក សេង ផល្លី
