នៅសាលប្រជុំសាលាខេត្តសៀមរាប នាព្រឹកថ្ងៃទី១៣ ខែ ធ្នូ ឆ្នាំ២០២៣នេះ ក្រុមប្រឹក្សាខេត្តសៀមរាប បានបើកកិច្ចប្រជុំសាមញ្ញលើកទី៥៥ អាណិត្តទី៣របស់ខ្លួន ក្រោមអធិបតីភាពឯកឧត្តម អ៊ាន ឃុន ប្រធានក្រុមប្រឹក្សាខេត្ត និង លោក សុខ ថុល អភិបាលរងនៃគណៈអភិបាលខេត្ត ដោយមានការអញ្ជើញចូលរួមពីសំណាក់ឯកឧត្តម លោកជំទាវ ជាសមាជិក សមាជិកាក្រុមប្រឹក្សាខេត្ត តំណាងអាជ្ញាធរជាតិអប្សារា ,គ្រឹះស្ថានអង្គរ និង លោក លោកស្រី ជាថ្នាក់ដឹកនាំមន្ទីរ-អង្គភាព ,អាជ្ញាធរក្រុង-ស្រុក នាយក នាយករងរដ្ឋបាល នាយក-នាយករងទីចាត់ការចំណុះសាលាខេត្តសៀមរាប ។
តាមរបៀបវារៈនៃអង្គប្រជុំ កិច្ចប្រជុំបានពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៥៤ របស់ក្រុមប្រឹក្សាខេត្តសៀមរាប អាណត្តិទី៣ កាលពីថ្ងៃទី១៣ ខែវិច្ឆិកា ឆ្នាំ២០២៣ និងបានពិនិត្យ ពិភាក្សា និងអនុម័តលើសេចក្ដីព្រាងរបាយការណ៍ប្រចាំខែវិច្ឆិកា ឆ្នាំ២០២៣ ស្តីពីការអនុវត្តការងាររបស់រដ្ឋបាលខេត្តសៀមរាប ។
ក្នុងដំណើរការនៃកិច្ចប្រជុំនេះដែរ ឯកឧត្ដមជាសមាជិកក្រុមប្រឹក្សាខេត្ត បានលើកយកសំណើ និង សំណូមពរមួយចំនួន ដើម្បីធ្វើការដោះស្រាយ រួមមាន ៖ បញ្ហាសណ្តាប់ធ្នាប់របៀបរៀបរយសាធារណៈនៅផ្សារអង្គរឃ្យុងយូ ,ការរៀបចំបង្គោលភ្លើងបំភ្លឺផ្លូវ ដែលមានបញ្ហាធ្វើឲ្យប៉ះពាល់ដល់ចរាចរណ៍ និង សោភ័ណភាពក្រុង ,បញ្ហាការគ្រប់គ្រងសួនច្បារនៅតាមទ្រូងផ្លូវ និង រង្វង់មូល ,បញ្ហាអប្សរា ហាមមិនឲ្យសាងសង់អគារសិក្សានៅសង្កាត់នគរធំ និង បញ្ហាមួយចំនួនទៀត ។
ក្នុងឱកាសនោះដែរលោក សុខ ថុល អភិបាលរងខេត្ត បានវាយតម្លៃខ្ពស់ ទៅលើលទ្ធផលការងាររបស់រដ្ឋបាលខេត្តកន្លងមក និងបានជំរុញដល់ថ្នាក់ដឹកនាំមន្ទីរ អង្គភាព អាជ្ញាធរក្រុង ស្រុក និងគ្រប់ទីចាត់ការ អង្គភាព ចំណុះសាលាខេត្ត បង្កើនការយកចិត្តទុកដាក់ខ្ពស់ ក្នុងកិច្ចកសាង និង អភិវឌ្ឍន៍មូលដ្ឋាន រួមទាំងការងារសំខាន់ៗមួយចំនួនទៀត ដូចជាការងារសន្តិសុខ សណ្តាប់ធ្នាប់សាធារណៈ បញ្ហាអនាម័យ បរិស្ថានតាមក្រុង ស្រុក និងការគ្រប់គ្រងដីធ្លីជាដើម។
ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានបញ្ជាក់ថា ៖ខេត្តសៀមរាប ក្រោមការដឹកនាំរបស់ឯកឧត្តមអភិបាលខេត្ត បានអនុវត្តលើកិច្ចការរដ្ឋបាល ការងារសន្តិសុខ សណ្តាប់ធ្នាប់សាធារណៈ និង ការគ្រប់គ្រងគ្រោះមហន្តរាយ ការដោះស្រាយបញ្ហាផ្សេងៗ ព្រមទាំងសភាពការជាក់ស្តែងដែលកើតមានឡើងក្នុងខេត្ត ខណៈកន្លងមកគ្រប់គ្រប់កាលៈទេសៈដែលប្រជាពលរដ្ឋជួបការលំបាក អាជ្ញាធរខេត្តបានយកចិត្តទុកដាក់ក្នុងការដោះស្រាយរាល់បញ្ហាដែលបានលើកឡើង ព្រោះបញ្ហាទាំងនេះ គឺ ជាបញ្ហារបស់ប្រជាពលរដ្ឋដែលតែងតែលើកឡើងជាអន្លើៗ និងបានដោះស្រាយប្រកបដោយប្រសិទ្ធភាព មានសាមគ្គីភាពផ្ទៃក្នុង និង មានស្មារតីទទួលខុសត្រូវក្នុងការបំពេញការងារស្របតាមគោលនយោបាយ ច្បាប់ និង លិខិតបទដ្ឋានគតិយុត្តពាក់ព័ន្ធនឹងកំណែទម្រង់វិមជ្ឈការ និង វិសហមជ្ឈការ នៅរដ្ឋបាលថ្នាក់ក្រោមជាតិផងដែរ ។
ឯកឧត្ដមបន្តថា ក្នុងឱកាសនេះ សូមសំណូមពរដល់ឲ្យសមាជិកក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរ អង្គភាព អាជ្ញាធរក្រុង ស្រុក ទីចាត់ការ អង្គភាពជាសេនាធិការរបស់ខេត្ត ត្រូវត្រៀមលក្ខណៈឲ្យបានគ្រប់ជ្រុងជ្រោយ ក្នុងការអនុវត្តនូវផែនការបន្តចំពោះមុខ ដើម្បីរួមគ្នាអនុវត្តឲ្យទទួលបានជោគជ័យសម្រាប់ខេត្តយើង ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
