ជាឆ្នាំទី៣ នៃការរៀបចំព្រឹត្ដិការណ៍”រំលឹកគុណអង្គរ” និងជាខួបលើកទី៣១ (១៤ ធ្នូ ១៩៩២-១៤ ធ្នូ ២០២៣) នៃការដាក់រមណីយដ្ឋានអង្គរ ទៅក្នុងបេតិកភណ្ឌពិភពលោក។ ព្រឹត្តិការណ៍នេះ ជាការរំលឹកគុណដល់ព្រះមហាក្សត្រខ្មែរគ្រប់ព្រះអង្គ និងបុព្វការីជនដែលបានកសាង ថែរក្សាប្រាសាទទាំងអស់នៅក្នុងរមណីយដ្ឋានអង្គរ ដោយបានផ្តល់អត្ថប្រយោជន៍ជាច្រើនដល់ជាតិមាតុភូមិតាំងពីដើមរហូតដល់បច្ចុប្បន្ននេះ។
តាមការឱ្យដឹងពីឯកឧត្តម ឡុង កុសល អគ្គនាយករង និងជា អ្នកនាំពាក្យអាជ្ញាធរជាតិអប្សរា បង្ហាញថា នេះជាឆ្នាំទី៣ ដែលកម្ពុជារៀបចំព្រឹត្តិការណ៍រំលឹកគុណអង្គរក្នុងទ្រង់ទ្រាយធំនិងមានរយៈពេល១០ថ្ងៃ ខណៈបណ្ដាឆ្នាំកន្លងមករៀបចំតែបីថ្ងៃប៉ុណ្ណោះ។ ពិធីនេះ បានចាប់ផ្ដើមជាផ្លូវការនៅថ្ងៃព្រហស្បតិ៍សប្ដាហ៍មុន ហើយនឹងបញ្ចប់នៅថ្ងៃសៅរ៍សប្ដាហ៍នេះ។
អំឡុងពេលនៃការរៀបចំព្រឹត្តិការណ៍នេះ លោក លី វណ្ណៈ នាយករដ្ឋបាលខេត្តសៀមរាប បង្ហាញថា មានភ្ញៀវទេសចរណ៍ជាតិនិងអន្តរជាតិប្រមាណ ៦០០០នាក់ក្នុងមួយថ្ងៃ បានធ្វើដំណើរចូលមកក្នុងខេត្តសៀមរាប ដែលនៅក្នុងនោះភ្ញៀវទេសចរជាតិប្រមាណ៣០០០នាក់ និងភ្ញៀវទេសចរអន្តរជាតិប្រមាណ៣០០០នាក់។ លោកបន្ថែមថា ចំនួននេះអាចមានការកើនឡើងនៅពេល ទស្សនីយភាពសម្ដែងសិល្បៈនានា។
រូបភាព ៖ លោក បូ សាវី
អត្ថបទ ៖ លោក សេង ផល្លី
