នៅល្ងាចថ្ងៃទី១២ ខែធ្នូ ឆ្នាំ២០២៣ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញបើកការបោះជំរំយុវជនជាសកលលើកទី៩ ក្រោមប្រធានបទ ការអភិវឌ្ឍយុវជនក្រោមដំបូលសន្តិភាព នៅជើងភ្នំគូលែន ខេត្តសៀមរាប ក្នុងគោលបំណង បង្ហាញពីដំណើរការនៃការអភិវឌ្ឍរបស់យុវជនកម្ពុជា ក្នុងបរិបទដែលប្រទេសជាតិទទួលបានសុខសន្តិភាពពេញលេញ ក៏ដូចជាចូលរួមលើកស្ទួយ និងផ្សព្វផ្សាយទេសចរណ៍ វប្បធម៌ អរិយធម៌ របស់ព្រះរាជាណាចក្រកម្ពុជា។
ឯកឧត្តមឧបនាយករដ្ឋមន្ត្រី លើកឡើថា ការអភិវឌ្ឍយុវជន គឺជាអាទិភាពចម្បងមួយរបស់រាជរដ្ឋាភិបាល និងជាមូលដ្ឋានដ៏រឹងមាំនៅក្នុងការរក្សា សន្តិភាព និងការអភិវឌ្ឍសេដ្ឋកិច្ច និងសង្គមជាតិទាំងមូល។ យុវជន ត្រូវទទួលបាននូវបរិបទសមស្រប ការវិនិយោគ ឱកាសចូលរួម និងការផ្តល់អំណាច ដែលអាចឱ្យយុវជនអភិវឌ្ឍសក្តានុពលខ្លួនបានពេញលេញ និងចូលរួមអភិវឌ្ឍសង្គមជាតិលើគ្រប់វិស័យ។ ការបោះជំរំនេះដែរ ក៏ជាវិធីសាស្ត្រអប់រំយ៉ាងមានប្រសិទ្ធភាពសម្រាប់យុវជន ដែលបានផ្លាស់ប្តូរជាវិជ្ជមានលើឥរិយាបថក្នុងការសិក្សា សីលធម៌រស់នៅល្អ និងមានឧត្តមគតិស្រឡាញ់ធម្មជាតិ និងប្រទេសជាតិ។
ឯកឧត្តម បន្ថែមថា ការបោះជំរំ បង្ហាញឱ្យយុវជនយល់ដឹងកាន់តែច្បាស់ពីជីវិតរស់នៅជាសហគមន៍ជាក់ស្តែង និងបំណិនជីវិតថ្មីៗ។ ការរស់នៅជាសហគមន៍ បានបង្រៀនឱ្យយុវជន ចេះសម្របខ្លួនក្នុងបរិយាកាសជុំវិញ ចេះរៀនរស់ជាមួយគ្នា ចេះរៀនពីគ្នា ចេះជួយគ្នា និងចេះចែករំលែកគ្នា ដែលនេះជាមូលដ្ឋានយ៉ាងសំខាន់ក្នុងការបណ្តុះសីលធម៌ល្អ កូនល្អ មិត្តល្អ សិស្សល្អ និងពលរដ្ឋល្អសម្រាប់សង្គមជាតិ។
តាមការបង្ហាញពី លោកជំទាវ ស្រួយ សុជាតិ អគ្គនាយក នៃអគ្គនាយកដ្ឋានយុវជន ក្រសួងអប់រំ យុវជន និងកីឡា ជំរំយុវជនជាសកលលើកទី៩នេះ មានរយៈពេល៦ថ្ងៃ ចាប់ពីថ្ងៃទី១១ ដល់ថ្ងៃទី១៦ ខែធ្នូ ដែលមានចំនួនយុវជន ចូលរួមសរុប ២១៧នាក់ ជ្រើសរើសមកពីគ្រប់រាជធានី ខេត្ត និងមកពី កាកបាទក្រហមកម្ពុជា សមាគមកាយឬទ្ធិនារីកម្ពុជា កាយរឹទ្ធិជាតិកម្ពុជា សហភាពសហព័ន្ធយុវជនកម្ពុជា វិទ្យាស្ថានជាតិអប់រំកាយនិងកីឡា យុវជនមូស្លីម និងសិស្សគថ្លង់ មកពីវិទ្យាល័យអប់រំពិសេស ជាដើម។
យុវជនដែលចូលរួមទាំងអស់ត្រូវស្នាក់ក្នុងតង់ និងធ្វើសកម្មភាពតាមសាខាជំរំរៀងៗខ្លួន ដោយត្រូវចូលរួមអនុវត្តការងារតាមកម្មវិធី ដែលមានដូចជា៖ត្រូវចេញដំណើរដោយរថយន្តក្រុងរួមគ្នា ត្រូវបោះតង់ និង ចម្អិនអាហារដោយខ្លួនឯង រៀនសូត្របទបញ្ជាផ្ទៃក្នុងនៃកម្មវិធី ធ្វើសមាធិ ការសិក្សាពីការត្រៀមខ្លួនរស់នៅក្នុងសង្គមឌីជីថល ការប្រើប្រាស់ហិរញ្ញវត្ថុប្រកបដោយប្រសិទ្ធភាព ការយល់ដឹងពីការគ្រប់គ្រងតំបន់ វប្បធម៌ប្រវត្តិសាស្ត្រ ការត្រៀមផលិតវីដេអូពីជីវិតក្នុងជំរំ ការស្វែងយល់ពីការអភិវឌ្ឍ និងជីវភាពរបស់អ្នកស្រុកបន្ទាយស្រី ជីវភាពរស់នៅរបស់កងទ័ព ស្វែងយល់ពីតម្លៃធនធានរបស់ខ្មែរជាដើម៕
អត្ថបទ និង រូបថត ៖ លោក ជា ស្រស់ និងលោក ឃុត សៅ
កែសម្រួលអត្ថបទ ៖ លោក សេង ផល្លី
