នៅថ្ងៃទី១១ ខែធ្នូ ឆ្នាំ២០២៣នេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយអាជ្ញាធរស្រុក ចុះធ្វើការផ្សព្វផ្សាយជាសាធារណៈ នូវសេចក្តីសម្រេចកំណត់តំបន់វិនិច្ឆ័យលើការចុះបញ្ជីដីធ្លី ដែលមានលក្ខណៈជាប្រព័ន្ធ ជូនដល់ប្រជាពលរដ្ឋនៅក្នុងឃុំជ្រោយនាងងួន ស្រុកស្រីស្នំ ដែលមានចំនួន ០៧ភូមិ និង ឃុំចារឈួក ស្រុកអង្គរជុំ មានចំនួន ២០ភូមិ។
លោក ស៊ុន សុជាតិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បញ្ជាក់ថា ការប្រកាសផ្សព្វផ្សាយជាសាធារណៈនេះ គឺដើម្បីជូនដំណឹងដល់ម្ចាស់ដីទាំងអស់ ត្រៀមឯកសារអត្តសញ្ញាណដី និងអ្នកកាន់កាប់ និងព្រំដី ដែលបញ្ចៀសនូវរាល់ទំនាស់ នៅពេលចុះវាស់វែង និងការប្រកាសបិទផ្សាយជាសាធារណៈ ក្រោយការចុះវាស់វែង។
ចំពោះដំណើរការ នៃការចុះបញ្ជីដីធ្លីមានលក្ខណៈជាប្រព័ន្ធ ក្រុមការងារអនុវត្តន៍តាមនីតិវិធីសំខាន់ៗ ចំនួន៥ គឺជំហានទី១៖ ការកំណត់តំបន់វិនិច្ឆ័យ ជំហានទី២៖ ការវាស់វែងប្លង់សុរិយោដី(ប្លង់ដី) ជំហានទី៣៖ អាជ្ញាធរនឹងធ្វើការបិទផ្សាយជាសាធារណៈ នូវប្លង់ដី និងបញ្ជីឈ្មោះម្ចាស់ដីក្នុងរយៈពេល១៥ថ្ងៃ ដើម្បីឲ្យប្រជាពលរដ្ឋអាចធ្វើការត្រួតពិនិត្យ និងតវ៉ាសុំធ្វើការកែប្រែក្នុងករណីមានភាពមិនត្រឹមត្រូវ ជំហានទី៤៖ ការវិនិច្ឆ័យ និងសម្រេច ជំហានទី៥៖ ការចែកបណ្ណកម្មសិទ្ធ។
លោកអនុប្រធានមន្ទីរ ក៏បានអំពាវនាវដល់អាជ្ញាធរគ្រប់ជាន់ថ្នាក់ និងស្ថាប័នពាក់ព័ន្ធ រួមទាំងបងប្អូនប្រជាពលរដ្ឋ ដែលបានចូលរួមនាពេលនេះ ពេលត្រឡប់ទៅមូលដ្ឋានវិញ សូមបន្តធ្វើការផ្សព្វផ្សាយឲ្យបានដល់ប្រជាពលរដ្ឋ ដើម្បីឲ្យពួកគាត់បានដឹងពីពិធីផ្សព្វផ្សាយសេចក្តីសម្រេចកំណត់តំបន់វិនិច្ឆ័យលើការចុះបញ្ជីដីធ្លីមានលក្ខណៈជាប្រព័ន្ធនេះ នឹងពិនិត្យផ្ទៀងផ្ទាត់ទិន្នន័យ ដែលក្រុមការងារចុះបញ្ជីដីធ្លីមានលក្ខណៈជាប្រព័ន្ធរបស់មន្ទីរដែលបានអនុវត្តតាមនីតិវិធីអោយបានគ្រប់ៗគ្នា។
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
