បញ្ហាគ្រូពេទ្យខុសច្បាប់នៅតែជាបញ្ហាប្រឈម ដែលទាមទារឲ្យមានការចូលរួមដោះស្រាយ ពីគ្រប់ផ្នែកពាក់ព័ន្ធទាំងអស់ ដើម្បីឈានទៅលុបបំបាត់បញ្ហានេះ នេះបើតាមការលើកឡើងរបស់ លោកវេជ្ជបណ្ឌិត អ៊ុយ ចាន់ថុល ប្រធានក្រុមប្រឹក្សាគណៈគ្រូពេទ្យខេត្ដសៀមរាប ក្នុងទិវាអភិវឌ្ឍន៍វិជ្ជាជីវៈវេជ្ជសាស្ត្របន្តលើកទី១៥ របស់គណៈគ្រូពេទ្យខេត្តសៀមរាប នាថ្ងៃទី១០ ខែធ្នូឆ្នាំ២០២៣។
លោកវេជ្ជបណ្ឌិត អ៊ុយ ចាន់ថុល បញ្ជាក់ថា កន្លងមក គណៈគ្រូពេទ្យខេត្តសៀមរាប តែងបានផ្សព្វផ្សាយ ចុះស្រង់ព័ត៌មាន ដោះស្រាយវិវាទ និងអនុវត្តច្បាប់ជាហូរហែរ នៅតាមបណ្តាមូលដ្ឋានក្នុងខេត្ត។ ប៉ុន្តែទោះជាយ៉ាងនេះក្ដី បញ្ហាគ្រូពេទ្យខុសច្បាប់ ក៏នៅតែជាបញ្ហាមួយដែលត្រូវដោះស្រាយ។ បច្ចុប្បន្ន មិនត្រឹមតែផ្នែកឯកជននោះទេ ដែលរងពាក្យបណ្ដឹង សូម្បីតែបុគ្គលិកពេទ្យរដ្ឋ ពេទ្យអង្គការមិនយកកម្រៃ ក៏ត្រូវរងពាក្យបណ្ដឹងផងដែរ ដែលនេះទាមទាឱ្យយើងមានការប្រុងប្រយ័ត្ន រួបរួមគ្នា ជួយគ្នា ចៀសវាងការនិយាយពីគ្នាទៅវិញទៅមក ដែលឈានទៅដល់ការបែកបាក់សាមគ្គីផ្ទៃក្នុង។ លោកបន្ថែមថា គ្រួពេទ្យដែលមានវិជ្ជាជីវៈសុខាភិបាលទាំងអស់ ត្រូវគោរពក្រមសីលធម៌ ខិតខំរៀនសូត្របន្តពង្រឹងចំណេះដឹងខ្លួន ដូចជាការចូលរួមទិវាអភិវឌ្ឍន៍វិជ្ជាជីវៈវេជ្ជសាស្ត្របន្ត និងសិក្ខាសាលាវិជ្ជាជីវៈសុខាភិបាលផ្សេងៗ ដើម្បីបំពេញពិន្ទុ និងបន្តសុពលភាពផងដែរ។
លោកវេជ្ជបណ្ឌិត អ៊ាប ប៊ុនលឿន អនុប្រធានមន្ទីរសុខាភិបាល ខេត្ដសៀមរាប បញ្ជាក់ថា ក្រុមប្រឹក្សាគណៈគ្រូពេទ្យខេត្តបានដើរតួនាទីយ៉ាងសំខាន់ក្នុង ការត្រួតពិនិត្យអំពីគុណវុឌ្ឍន៍ និងសម្បទារគ្រូពេទ្យ ក្នុងការដោះស្រាយបញ្ហាផ្សេងៗ ដូចជាបញ្ហា រវាងគ្រូពេទ្យជាមួយអ្នកជំងឺ គ្រូពេទ្យ និងគ្រូពេទ្យជាដើម។ ជាមួយគ្នានេះ ការចុះឈ្មោះក្នុងបញ្ជីគណៈគ្រូពេទ្យ ជាផ្នែកមួយដែលទទួលស្គាល់ច្បាប់ ហើយក៏ជាយន្ត័ការពាររបស់គ្រូពេទ្យក្នុងការអនុវត្តតួនាទីភារៈកិច្ចរបស់ខ្លួនដែរ។
លោកអនុប្រធានមន្ទីរ ក៏បានជំរុញដល់គ្រូពេទ្យទាំងអស់ ត្រូវខិតខំពង្រឹងសមត្ថភាពរបស់ខ្លួនបន្ថែមទៀត និងថា ការរៀបចំទិវាអភិវឌ្ឍវិជ្ជាជីវៈវេជ្ជសាស្ត្រនេះ ជាប្រធានបទ មួយផ្តល់នូវការចែករំលែកបទពិសោធន៍ និងចំណេះដឹងដល់សមាជិកគណៈគ្រូពេទ្យទាំងអស់ ក្នុងការពិនិត្យ ព្យាបាល ជូនបងប្អូនប្រជាពលរដ្ឋឲ្យមានប្រសិទ្ធភាពខ្ពស់។ ជាពិសេសការអភិវឌ្ឍន៍សមត្ថភាព និងជំនាញបែបទំនើបកម្ម វិទ្យាសាស្ត្រសម័យថ្មី សមាជិកគណៈគ្រូពេទ្យ ដើម្បីពង្រីកនូវសមត្ថភាព និងចំណេះដឹងដើម្បីយកទៅបំពេញសេចក្តីត្រូវការ ការពេញចិត្ត ការជឿជាក់ របស់អ្នកជំងឺ ឬអតិថិជនមកលើគ្រូពេទ្យ។
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
