នារសៀលថ្ងៃទី០៥ ខែធ្នូ ឆ្នាំ២០២៣ ទេសរដ្ឋមន្រ្តី លី ធុច អនុប្រធានទី១ អាជ្ញាធរមីនកម្ពុជា បានអញ្ជើញប្រកាសទទួលស្គាល់ស្រុកពួក ខេត្តសៀមរាប ជាស្រុកអស់មីន បន្ទាប់ពីផ្ទៃដីចុងក្រោយរបស់ស្រុកត្រូវបានក្រុមប្រតិបត្តិធ្វើការបោសសម្អាតរួចរាល់ បន្ទាប់ពីក្រុងសៀមរាប និងស្រុកក្រឡាញ់។
ក្នុងឱកាសនោះ ឯកឧត្តម បណ្ឌិត លី ធុច បានបញ្ជាក់ថា ស្រុកពួក គឹជាស្រុកទី៣ បន្ទាប់ពីក្រុងសៀមរាប និងស្រុកក្រឡាញ់ ដែលធ្វើការបោសសម្អាតមីនចុងក្រោយរបស់អង្គការ HALO Trust ក្នុងទំហំផ្ទៃដីជាង ៣លានម៉ែត្រក្រឡា និងរួមជាមួយអង្គភាពស៊ីម៉ាក់ មជ្ឈមណ្ឌលជាតិរក្សាសន្តិភាព និងអង្គការ NPA ។ ហើយក្នុងនាមសម្តេចធិបតី និងប្រជាជនខេត្តសៀមរាប ឯកឧត្តម បានសំដែងនូវអំណរគុណយ៉ាងជ្រាលជ្រៅជូនចំពោះរដ្ឋាភិបាល និងប្រជាជននៃប្រទេសអាល្លឺម៉ង់ ចក្រភពអង់គ្លេស សហរដ្ឋអាមេរិក អៀរឡង់ និងស្វីស ក៏ដូចជាការលះបង់របស់អ្នកដោះមីនទាំងអស់ ដែលបានចូលរួមគាំទ្រ និងបំពេញការងារដោយផ្ទាល់ ក្នុងការធានាសុវត្ថិភាពដល់ប្រជាពលរដ្ឋនៅស្រុកពួក ខេត្តសៀមរាប។
ឯកឧត្តម ទេសរដ្ឋមន្រ្តី បានបញ្ជាក់ទៀតថា ថ្មីៗនេះ កម្ពុជាបានទទួលការគាំទ្រ និងវាយតម្លៃខ្ពស់ពីបណ្តាប្រទេសជារដ្ឋភាគី នៃអនុសញ្ញាហាមការប្រើប្រាស់មីនប្រឆាំងមនុស្សដែលមាន ១៦៤ប្រទេស បោះឆ្នោតជ្រើសតាំងជាប្រធាន និងម្ចាស់ផ្ទះរៀបចំកិច្ចប្រជុំត្រួតពិនិត្យឡើងវិញលើកទី៥ ឆ្នាំ២០២៤ នៃអនុសញ្ញា ដោយជ្រើសយកខេត្តសៀមរាប ជាទីតាំងរៀបចំកិច្ចប្រជុំកំពូលសៀមរាប-អង្គរន។ កិច្ចប្រជុំនេះ គឺជាកាដូរពិសេសមួយជូនបងប្អូនប្រជាពលរដ្ឋខេត្តសៀមរាបទាំងមូល របស់ សម្តេចធិបតី នាយករដ្ឋមន្រ្តី និងស្របនឹងការដាក់ចេញយុទ្ធសាស្រ្តរបស់សម្តេច ទស្សនាសៀមរាបឆ្នាំ២០២៤ ដើម្បីជំរុញសកម្មភាពទេសចរណ៍ក្នុងខេត្តសៀមរាប។ ការរៀបចំកិច្ចប្រជុំកំពូលសៀមរាប-អង្គរ នឹងបង្ហាញទៅកាន់ពិភពលោក ឱ្យបានដឹងពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងប្រែក្លាយអតីតតំបន់សមរភូមិប្រយុទ្ធ និងមានការគំរាមដោយសារមីន ឱ្យទៅជាតំបន់ដែលពោរពេញដោយស្នាមញញឹម និងមានសុខសន្តិភាពពេញលេញ។
ព័ត៌មានជាតិ ថ្មីៗ
ឯកឧត្តម បណ្ឌិត ក៏បានបន្ថែមថា ការងារបោសសម្អាតមីននេះ គឺធ្វើឡើងដើម្បីឱ្យអនាគតរបស់ប្រជាពលរដ្ឋ និងក្មួយៗទាំងអស់មានការរីកចំរើន ជីវភាពរស់នៅកាន់តែប្រសើរឡើង និងរួចផុតពីគ្រោះថ្នាក់ដោយសារមីន និងសំណល់ជាតិផ្ទុះពីសង្រ្គាម ស្របតាមបំណងប្រាថ្នារបស់ សម្តេចធិបតី ដែលតែងតែយកចិត្តទុកដាក់ដល់ស្ថានភាពរស់នៅរបស់ប្រជាពលរដ្ឋនៅគ្រប់ទីកន្លែង និងគ្រប់ពេលវេលា។
ក្នុងនាមអាជ្ញាធរខេត្ត លោក ពិន ប្រាកដ អភិបាលរងខេត្តសៀមរាប មានប្រសាសន៍ថា ខេត្តសៀមរាប ក្រោមការខិតខំប្រឹងប្រែងរបស់រាជរដ្ឋាភិបាលកម្ពុជា ចាប់តាំងពីឆ្នាំ១៩៩២ រហូតមកដល់បច្ចុប្បន្ននេះ ការងារបោសសម្អាតមីន និងសំណល់ជាតិផ្ទុះពីសង្រ្គាម បានធ្វើការបោសសម្អាតមីនលើទំហំផ្ទៃដីសរុបជាង ១ម៉ឺន ៣ពាន់ហិកតា រកឃើញមីនថ្មើជើង ចំនួន ២៣.៤៦៨គ្រាប់, មីនតោន ៧២៣គ្រាប់, សំណល់ជាតិផ្ទុះពីសង្រ្គាមគ្រប់ប្រភេទចំនួន ១១៧.៤៦៩គ្រាប់ ក្នុងនោះអ្នកទទួលផលមានចំនួន ២២៨.៩៦៥គ្រួសារ។
លោកអភិបាលរងខេត្តបន្តថា ដោយទ្បែកសម្រាប់ផែនការប្រចំាឆ្នាំ២០២៤ រដ្ឋបាលខេត្ត គ្រោងនឹងស្នើសុំអនុម័តផែនការបោសសម្អាតមីន និងចម្ការគ្រាប់លើចំនួន ៦៦ទីតាំងបន្ថែមទៀត ដែលបានរកឃើញថា អាចមានមីន និងសំណល់ជាតិផ្ទុះពីសង្រ្គាម លើផ្ទៃដីសរុបចំនួន ១១.០៣៥.០០0ម៉ែត្រការ៉េ។ ទន្ទឹមនឹងនោះ តាមរយៈយន្តការសកម្មភាពកម្ចាត់មីន និងគ្រាប់យុទ្ធភ័ណ្ឌមិនទាន់ផ្ទុះ រដ្ឋបាលខេត្តបាននឹងកំពុងបន្តធ្វើការបោសសម្អាតមីន ការផ្សព្វផ្សាយ អប់រំពីគ្រោះថ្នាក់ដោយសារមីន ដោយសហការជាមួយក្រុមការងារផែនការសកម្មភាពមីន អាជ្ញាធរថ្នាក់មូលដ្ឋាន អង្គភាពពាក់ព័ន្ធចូលរួមសហការអនុវត្តជាបន្តបន្ទាប់រហូតមកដល់បច្ចុប្បន្ននេះ៕
អត្ថបទ និងរូបភាព៖ លោក យូ វង្ស, លោក ជា ស្រស់
កែសម្រួល៖ លោក អ៊ុន ណារាជ្យ
