ក្បាលដីរបស់ប្រជាពលរដ្ឋចំនួន ២.៨០៦ក្បាលដី ក្នុងភូមិរំលោង ភូមិកំពង់ក្តី១ ភូមិកំពង់ក្តី២ ភូមិពន្លឺព្រះផុស ភូមិសង្កែមានជ័យ ភូមិតាពៀម និងភូមិត្រពាំងជ្រៃ ឃុំកំពង់ក្តី ស្រុកជីក្រែង ខេត្តសៀមរាប តរូវបានបិទប្រកាសផ្សព្វផ្សាយជាសាធារណៈ ដើម្បីឲ្យបងប្អូនជាម្ចាស់ដីធ្វើការពិនិត្យព័ត៌មានលម្អិតពីដីរបស់ខ្លួន និងធ្វើការតវ៉ា ប្រសិនបើមានកំហុសឆ្គង គិតចាប់ពីថ្ងៃទី៥-១៩ ខែធ្នូ ឆ្នាំ២០២២៣ ក្នុងបរិវេណវត្តបុព្វទិសារាម ហៅវត្តកំពង់ក្ដី។
លោក ស៊ុន សុជាតិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានបង្ហាញថា ការបិទផ្សាយជាសាធារណៈនូវឯកសារការវិនិច្ឆ័យក្បាលដីនាពេលនេះ មានសារសំខាន់ណាស់ចំពោះប្រជាពលរដ្ឋ ដែលត្រៀមនឹងទទួលបានវិញ្ញាបនបត្រសំគាល់ម្ចាស់អចលនវត្ថុ ឬហៅសាមញ្ញថា ប្លង់រឹង។ ក្នុងរយៈពេល១៥ថ្ងៃនេះ បងប្អូនប្រជាពលរដ្ឋអាចមកពិនិត្យ ឬតវ៉ាក្នុងថ្ងៃឈប់សម្រាក ឬថ្ងៃបុណ្យក៏បាន ដោយមន្ត្រីរបស់យើងពុំមានការឈប់សម្រាកទេ។ ក្នុងការពិនិត្យផ្ទៀងផ្ទាត់នេះដែរ បងប្អូនប្រជាពលរដ្ឋត្រូវពិនិត្យព័ត៌មានសំខាន់ៗជាច្រើនដូចជា ឈ្មោះម្ចាស់ដី ទំហំដី រូបរាងដី ប្រភេទទ្រព្យ ដីមានជាប់ពាក់ព័ន្ធនឹងដីបុរាណដ្ឋាន។ល។ ប្រសិនបើបងប្អូនមានការលំបាកក្នុងការពិនិត្យ ឬពុំចេះអក្សរ សូមបងប្អូនស្នើដល់មន្ត្រីជំនាញជួយពន្យល់ និងណែនាំបន្ថែម។
លោកបញ្ជាក់ថា ប្រសិនបើបងប្អូនប្រជាពលរដ្ឋ មិនមានការតវ៉ាចំពោះព័ត៌មានក្បាលដីរបស់ខ្លួនក្នុងរយៈពេល១៥ថ្ងៃនេះទេ បានន័យថាព័ត៌មានក្បាលដីរបស់បងប្អូនត្រឹមត្រូវ។ បន្ទាប់ពីបិទបញ្ចប់ការផ្សាយជាសាធារណៈនេះ គណៈកម្មការរដ្ឋបាល នឹងលើកសំណើរជូនទៅ ឯកឧត្តមអភិបាល នៃគណៈអភិបាលខេត្តសៀមរាប ដើម្បីសម្រេចចេញវិញ្ញាបនបត្រសំគាល់ម្ចាស់អចលនវត្ថុជូនបងប្អូន។
លោក បូ ម៉េងទ្រី អភិបាលស្រុកជីក្រែង មានប្រសាសន៍ដែរថា ដំណើរការចុះបញ្ជីដីមានលក្ខណៈជាប្រព័ន្ធនេះ គឺជាការគិតគូររបស់រាជរដ្ឋាភិបាល ក៏ដូចជារដ្ឋបាលខេត្ត ដើម្បីលើកកម្ពស់ជីវភាពប្រជាពលរដ្ឋ និងផ្ដល់សិទ្ធពេញលេញក្នុងការចាត់ចែង និងជាម្ចាស់ដីស្របច្បាប់។ ក្នុងករណីមានការរំលោភបំពានលើដីរបស់បងប្អូន វិញ្ញាបនបត្រសំគាល់ម្ចាស់អចលនវត្ថុនេះ គឺជាឯកសារស្របច្បាប់អាទិភាព សម្រាប់បងប្អូនយកមកសំអាង។ លោកក៏បានអំពាវនាវដល់បងប្អូនប្រជាពលរដ្ឋក្នុងភូមិទាំងអស់ ជួយធ្វើការផ្សព្វផ្សាយបន្តឱ្យប្រជាពលរដ្ឋជាម្ចាស់ក្បាលដីទាំងអស់បានដឹង និងមកពិនិត្យព័ត៌មានលម្អិតដីរបស់ខ្លួនឱ្យបានទាន់ពេលវេលាត្រឹមថ្ងៃទី១៩ ខែធ្នូ ឆ្នាំ២០២៣ខាងមុខនេះ ដើម្បីធានាភាពសុក្រឹត ត្រឹមត្រូវ និងបង្ហាញពីកិច្ចសហការល្អរវាងអាជ្ញាធរ និងប្រជាពលរដ្ឋក្នុងមូលដ្ឋាន៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
