សិស្សានុសិស្សជាង ៣០០នាក់ នៅសាលាបឋមសិក្សា និងអនុវិទ្យាល័យ តាប៉ាង ក្នុងឃុំអំពិល ស្រុកប្រាសាទបាគង ខេត្ដសៀមរាប កាលពីរសៀលថ្ងៃទី៤ ខែធ្នូ ឆ្នាំ២០២៣ ទទួលបានអំណោយជាសម្ភារៈសិក្សាពីសប្បុរសជននៃអង្គការមូលនិធិរ៉ូតារី មកពីប្រទេសចិន ដើម្បីលើកទឹកចិត្ដដល់ពួកគាត់ដែលកំពុងសិក្សានិងខ្វះខាតក្នុងគ្រួសារ។
លោក លី ឃុនថៃ ប្រធានកិត្ដិយ សសមាគមមូលនិធិទ្រទ្រង់ការអភិវឌ្ឍន៍នៃកម្ពុជា មានប្រសាសន៍ សម្ភារៈសិក្សាទាំងនេះ បានមកពីសប្បុរសជន នៃក្រុមមូលនិធិរ៉ូតារី ដែលពួកគាត់មានក្ដីស្រលាញ់ និងចូលចិត្ដប្រជាពលរដ្ឋដោយបេះដូង ព្រោះកុមារកម្ពុជាចូលចិត្ដសិក្សា ជាពិសេសពួកគាត់ចង់ជួយសម្រួលដល់ពីជីវភាពរបស់កុមារនៅតាមជនបទ។ ហើយចំពោះសម្ភារៈសិក្សានេះ បានចែកជូនដល់សិស្សានុសិស្សនាពេលនេះ គឺជាលើកទីមួយ ហើយពួកគាត់មានគម្រោងនាំយកសម្ភារៈជាច្រើនទៀតចែកជូនដល់សាលារៀន។
លោក លី ឃុនថៃ បន្ដថា ក្រុមមូលនិធិ រ៉ូតារី ក្រោយពីសំណេះសំណាលជាមួយសិស្សានុសិស្សហើយ ពួកគាត់ក៍ទៅទស្សនាប្រាសាទអង្គរវត្ដផងដែរ ព្រោះពួកគាត់ចង់ឃើញវប្បធម៌របស់កម្ពុជាជាយូរមកហើយ ហើយក៏ចង់បង្ហាញថា មិត្ដភាព និងការទំនាក់ទំនងរវាងប្រទេសកម្ពុជា-ចិន កាន់តែមានភាពល្អប្រសើរពីមួយឆ្នាំទៅមួយឆ្នាំ។ ពួកគាត់សន្យាថា នឹងចូលរួមផ្សព្វផ្សាយពីវប្បធម៌ខ្មែរទៅកាន់ពិភពលោកផងដែរ។
ព័ត៌មានជាតិ ថ្មីៗ
លោក សោម សុភ័ណ្ឌ នាយកសាលាអនុវិទ្យាល័យតាប៉ាង ឃុំអំពិល បានបង្ហាញនូវការអរគុណចំពោះសប្បុរសជនសមាគមមូលនិធិទ្រទ្រង់ការអភិវឌ្ឍនៅកម្ពុជា និងអង្គការ ដែលបានចូលរួមឧបត្ថម្ភជាសម្ភារៈសិក្សា។ ហើយសម្ភារៈទាំងនោះ រួមមាន កាបូបស្ពាយ កាបូបដាក់ប៊ិច ខ្មៅដៃ ប៊ិច កូល័រ ជ័រលុប និងថវិកាចំនួន ១.០០០ដុល្លារអាមេរិក សម្រាប់ទិញកុំព្យូទ័រ និងម៉ាស៊ីនព្រីនដើម្បីប្រើប្រាស់ក្នុងអនុវិទ្យាល័យតាប៉ាងផងដែរ។ លោកបន្ដថា ការជួយជ្រោមជ្រែងដល់អនុវទ្យាល័យនេះ ជាការចូលរួមចំណែកផ្ដល់កម្លាំងចិត្ដសិស្សដែលកំពុងខ្វះខាត ជាពិសេសការទំនាក់ទំនងមិត្ដភាពរវាងប្រទេសទាំងពីរកាន់តែមានភាពជិតស្និតបន្ថែមទៀត។លោក៍បានអំពាវដល់សប្បុរសជនជាតិ និងអន្ដរជាតិ បន្ដជួយដល់សាលានេះបន្ថែមទៀតបើទោះបីតិចឬច្រើនក្ដី៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
