នៅរសៀលថ្ងៃទី០៤ ខែធ្នូ ឆ្នាំ២០២៣នេះ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប បានអញ្ជើញដឹកនាំកិច្ចប្រជុំបោះឆ្នោតជ្រើសរើស ប្រធាន-អនុប្រធានការិយាល័យប្រជាពលរដ្ឋ ដោយមានការចូលរួមពី ឯកឧត្តមលោកជំទាវសមាជិកក្រុមប្រឹក្សាខេត្ត សមាជិកគណៈកម្មការបោះឆ្នោតជ្រើសរើស ប្រធាន-អនុប្រធាន ការិយាល័យប្រជាពលរដ្ឋខេត្ត និងនាយករងរដ្ឋបាលសាលាខេត្ត នាយក-នាយករងទីចាត់ការធនធានមនុស្ស និងរដ្ឋបាលខេត្ត។
ឯកឧត្តម អ៊ាន ឃុន មានប្រសាសន៍ថា ការបោះឆ្នោតជ្រើសរើសប្រធាន-អនុប្រធាន ការិយាល័យប្រជាពលរដ្ឋ គឺបានរៀបចំកិច្ចប្រជុំជាច្រើនដងកន្លងរួចមកហើយ តាមរយៈកិច្ចប្រជុំផ្សព្វផ្សាយអំពីការជ្រើសរើសតំណាងអង្គការសង្គមស៊ីវិលជាតិ ដោយក្នុងនោះ មានអង្គការសង្គមស៊ីវិលជាតិ ចូលរួមជាគណៈកម្មការបោះឆ្នោតជ្រើសរើស ប្រធាន អនុប្រធានការិយាល័យប្រជាពលរដ្ឋ។ ការរៀបចំបោះឆ្នោតជ្រើសរើសនេះ គឺធ្វើឡើងស្របតាមសេចក្តីណែនាំ លេខ ០២៤សណន របស់ក្រសួងមហាផ្ទៃផង។
ឯកឧត្តម អ៊ាន ឃុន មានប្រសាសន៍ទៀតថា កាជ្រើសរើស ប្រធាន-អនុប្រធាន ការិយាល័យប្រជាពលរដ្ឋ គឺជាការងារស្នូលសំខាន់របស់ការិយាល័យ គឺដើរតួយ៉ាងសំខាន់ ក្នុងការទទួលពាក្យបណ្ដឹង សម្របសម្រួលដោះស្រាយបណ្ដឹងក្រៅប្រព័ន្ធតុលាការ ដែលពាក់ព័ន្ធទៅនឹងការផ្ដល់សេវាសាធារណៈជូនប្រជាពលរដ្ឋ ក៏ដូចជាការគ្រប់គ្រងរដ្ឋបាលថ្នាក់ក្រោមជាតិ។ ឯកឧត្តម ក៏បានផ្ដាំផ្ញើដល់សមាជិកគណៈកម្មការនៃការរៀបចំការបោះឆ្នោតជ្រើសរើសការិយាល័យប្រជាពលរដ្ឋ នាពេលនេះ សូមធ្វើឡើងដោយសុក្រឹត្យ ច្បាស់លាស់ និងយុត្តិធម៌ ឲ្យស្របទៅនឹងការសម្រេចចិត្តរបស់ ឯកឧត្តម លោកជំទាវ លោក លោកស្រី ដែលបានបោះឆ្នោតជូនទៅដល់បុគ្គលដែលមានសមត្ថភាពគ្រប់គ្រាន់ ដើម្បីបំពេញតួនាទីរបស់ខ្លួនឲ្យមានប្រសិទ្ធភាពខ្ពស់។
សូមជម្រាបថា បេក្ខជនឈរឈ្មោះជាប្រធាននាពេលនេះមានចំនួន ៣រូប ក្នុងនោះមាន៖ ១.លោក ទីវ សារ៉ូន, ២.លោក នេត ផល្គុន និង៣. លោក សៅ សាវុធ ចំណែកបេក្ខជនឈរឈ្មោះជាអនុប្រធាន មានចំនួន ៤រូប រួមមាន៖ ១.លោក ទីវ សារ៉ូន, ២.លោក សៅ សាវុធ , ៣.លោកស្រី ស៊ឹម សុវណ្ណារី និង៤.លោក ស៊ុម ស៊ីណា។ ក្រោយការបោះឆ្នោត លោក នេត ផល្គុន បានជាប់ឆ្នោតជាប្រធានការិយាល័យប្រជាពលរដ្ឋខេត្តសៀមរាប និង លោកស្រី ស៊ឹម សុវណ្ណារី ជាអនុប្រធាន ការិយាល័យប្រជាពលរដ្ឋខេត្ត។
ក្រោយបញ្ចប់ការបោះឆ្នោត និងប្រកាសលទ្ធផល ឯកឧត្តម ប្រធានក្រុមប្រឹក្សាខេត្ត បានណែនាំដល់ក្រុមលេខាធិការដ្ឋានក្រុមប្រឹក្សាខេត្ត រៀបចំធ្វើលិខិតស្នើសុំទៅក្រសួងមហាផ្ទៃ ដើម្បីឲ្យមានការប្រកាសជាផ្លូវការទៅតាមនីតិវិធីនៃច្បាប់៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
