ព្រឹត្តិការណ៍រំលឹកគុណអង្គរលើកទី៣ នឹងរៀបចំឡើងនៅខាងមុខងអង្គរវត្ដនាពេលដ៏ខ្លីខាងមុខនេះ ដើម្បីជាការរំលឹកគុណដល់អតីតព្រះមហាក្សត្រគ្រប់ជំនាន់ ព្រលឹងបុព្វការីជន និងដើម្បីអរគុណដល់សន្ដិភាព ជាពិសេសអបសាទរការចុះរមណីយដ្ឋានអង្គរក្នុងបញ្ជីបេតិកភណ្ឌពិភពលោក ដែលមកដល់ពេលនេះមានរយៈពេល៣១ឆ្នាំ។
អគ្គនាយកអាជ្ញាធរជាតិអប្សរា ឯកឧត្តម ហង់ ពៅ បានឱ្យដឹងថា ព្រឹត្ដិការណ៍រំលឹកគុណអង្គរ នឹងធ្វើឡើងចាប់ពីថ្ងៃទី៧-១៦ ខែធ្នូ ឆ្នាំ២០២៣ ដោយមានកម្មវិធីជាច្រើន បង្ហាញដល់អ្នកទេសចរជាតិ និងអន្ដរជាតិ ឱ្យបានយល់ដឹងពីវប្បធម៌ខ្មែរ រួមមានកម្មវិធីសាសនា ការសម្ដែងសិល្បៈបុរាណនៅពេលរាត្រី។ ចំណែកពិធីបួងសួងព្រឹត្តិការណ៍រំលឹកគុណអង្គរ ក៏មានពិធីរាប់បាតព្រះសង្ឃ កម្មវិធីបែបសាសនាសំខាន់ៗ ការតាំងពិព័ណ៌បង្ហាញសមិទ្ធផលការងារបស់អាជ្ញាធរជាតិអប្សរា ស្នាដៃសិល្បៈជាច្រើនដែលបានចុះក្នុងបញ្ជីបេតិកភណ្ឌអរូបីនៃអង្គការយូណេស្កូ ការដង្ហែរក្បួនព្យុះហយាត្រារបស់សិស្សានុសិស្ស ១.២០០នាក់ ទៅក្រុងសៀមរាប ដោយភ្ជាប់ពាក្យស្លោកគោលអរគុណ អរគុណសន្ដិភាព ដោយភ្ជាប់ខ្លឹមសារថែរក្សាបរិស្ថាន។ ដោយឡែករាត្រីសមោសរសប្បុរសធម៌ ដើម្បីមន្ទីរពេទ្យកុមារគន្ធបុប្ផា ព្រមទាំងការសម្ដែងល្ខោនយីកេមហាជន ល្ខោនស្បែកធំជាដើម។
ឯកឧត្តម អគ្គនាយក ក៏បានអំពាវដល់ប្រជាពលរដ្ឋ អ្នកទេសចរជាតិ និងអន្ដរជាតិព្រមទាំងសាធារណជនអញ្ជើញចូលរួមឲ្យបានច្រើនកុះករ ដែលពិធីនេះនឹងប្រព្រឹត្តទៅក្រោមអធិបតីដ៏ខ្ពង់ខ្ពស់ លោកជំទាវ ពេជ ចន្ទមុន្នី ហ៊ុន ម៉ាណែត និងលោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា រួមនឹងថ្នាក់ដឹកនាំខេត្តសៀមរាប ថ្នាក់ដឹកនាំអាជ្ញាធរជាតិអប្សរា តំណាងអង្គការយូណេស្គូប្រចាំកម្ពុជា មន្រ្តីរាជការគ្រប់លំដាប់ថ្នាក់ ភ្ញៀវទេសចរជាតិនិងភ្ញៀវអន្តរជាតិចូលរួមផងដែរ៕
ព័ត៌មានជាតិ ថ្មីៗ
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
