នៅព្រឹកថ្ងៃទី១៥ ខែធ្នូ ឆ្នាំ២០២៣ មន្ទីររៀបចំដែនដី នគរូបនីយកម្ម សំណង និងសុរិយោដីខេត្តសៀមរាប និងរដ្ឋបាលស្រុកពួក បានប្រកាសបិទផ្សាយជាសាធារណៈនូវឯកសារនៃការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ សម្រាប់ភូមិចំនួន៥ មាន៖ ភូមិកំពងតាយ៉ង ភូមិតាទក ភូមិគោកដូង ភូមិពួកថ្មី និងភូមិចំបក់ហែរ ស្ថិតនៅក្នុងឃុំពួក ស្រុកពួក ខេត្តសៀមរាប សរុបចំនួន ៧.៥៤៦ក្បាលដី ដើម្បីឲ្យបងប្អូនជាម្ចាស់ដី ឬអ្នកកាន់កាប់ដី ធ្វើការពិនិត្យ និងតវ៉ា។
លោក ប៊ូ ជុំសម្បត្តិ អនុមន្ទីររៀបចំដែនដី ខេត្តសៀមរាប បានឲ្យដឹងថា ការងារចុះបញ្ជីដីធ្លីមានលក្ខណៈជាប្រព័ន្ធ សំរាប់ខេត្តសៀមរាប មន្ទីររៀបចំដែនដីខេត្ត បានធ្វើការបិទផ្សាយ និងចេញប័ណ្ណរួចបានចំនួន ១០៤ភូមិរួចមកហើយ ក្នុងនោះ៖ ក្រុងសៀមរាប ៩សង្កាត់ ស្មើនឹង ៥៩ភូមិ, ស្រុកសូទ្រនិគម ២ឃុំ ស្មើនឹង ២០ភូមិ, ស្រុកប្រាសាទបាគង ៣ឃុំ ស្មើនឹង ៨ភូមិ, ស្រុកក្រឡាញ់ ១ឃុំ ស្មើនឹង ៨ភូមិ, ស្រុកពួក ១ឃុំ ស្មើនឹង ៦ភូមិ និង ស្រុកជីក្រែង ១ភូមិ។
លោក ស៊ីន ចាន់ថុល អភិបាលស្រុកពួក បានបញ្ជាក់ថា ការបិទផ្សាយជាសាធារណៈនូវឯកសារនៃការវិនិច្ឆ័យនេះ មានរយៈពេល ១៥ថ្ងៃ ចាប់ពីថ្ងៃទី១៥-៣០ ខែធ្នូ ឆ្នាំ២០២៣ ដោយគិតរួមទាំងថ្ងៃបុណ្យ និងថ្ងៃឈប់សំរាក ដែលមានទីតាំងស្ថិតនៅក្នុងបរិវេណវត្តឥស្សារារាម ហៅវត្តពួក ដើម្បីឲ្យបងប្អូនជាម្ចាស់ដី ឬអ្នកកាន់កាប់ដី ព្រមទាំងស្ថាប័ន និងអង្គភាពពាក់ព័ន្ធទាំងអស់ ចូលរួមពិនិត្យផ្ទៀងផ្ទាត់មើលទិន្នន័យនេះឱ្យបានគ្រប់ៗគ្នា ដើម្បីធានាបាននូវភាពសុក្រឹត្យត្រឹមត្រូវ ក្នុងការចេញវិញ្ញាបនបត្រ័សម្គាល់ម្ចាស់អចលនវត្ថុ។
លោកអភិបាលស្រុក សង្ឃឹមជឿជាក់ថា អ្នកដែលមានការពាក់ព័ន្ធទាំងអស់នឹងអញ្ជើញមកចូលរួមពិនិត្យមើលទិន្នន័យដែលបានបិទផ្សាយនេះ ដូចជានៅលើបញ្ជីឈ្មោះម្ចាស់ដី ត្រូវពិនិត្យផ្ទៀងផ្ទាត់ឈ្មោះ សាវតា ទំហំដី ប្រភេទទ្រព្យ និងនៅលើប្លង់សុរិយោដី ត្រូវពិនិត្យមើល ទីតាំងដី រូបរាងដី ព្រោះនេះគឺជាឱកាសចុងក្រោយហើយដែលបងប្អូន មីងមា និងអ្នកដែលមានការពាក់ព័ន្ធទាំងអស់មានសិទ្ធិធ្វើការកែតំរូវ ឬជំទាស់តវ៉ាបានក្នុងករណីដែលពិនិត្យមើលទៅឃើញថា មានកំហុសឆ្គងនោះ អាចមកជួបគណៈកម្មការរដ្ឋបាលបាន៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
