អគារសិក្សាមួយខ្នង៥បន្ទប់ សាលប្រជុំ បណ្ណាល័យ សួនកំសាន្ត ទីធ្លាវាយប៉េងប៉ុង វាយសី និងតារាងបាល់បោះស្ថិតនៅសាលាបឋមសិក្សាស្វាយធំ ឃុំកណ្តែក ស្រុកប្រាសាទបាគង ខេត្តសៀមរាប ត្រូវបានដាក់ឱ្យដំណើរការឡើងវិញជាផ្លូវការ នៅរសៀលពីថ្ងៃទី១៧ ខែធ្នូឆ្នាំ២០២៣នេះ ក្រោមអធិបតីភាព ឯកឧត្តម ម៉ម ប៊ុននាង ប្រធានគណៈកម្មការទី១០ និងជាអនុប្រធានក្រុមមិត្តភាពរវាងព្រឹទ្ធសភាកម្ពុជា និងសភាប្រឹក្សានយោបាយចិន ឯកឧត្តម កាវ អ៉ីនឡុង អនុប្រធានសភាប្រឹក្សានយោបាយ និងជាប្រធានក្រុមប្រឹក្សាមូលនិធិចិនដើម្បីសន្តិភាពនិងការអភិវឌ្ឍ និងលោក ពិន ប្រាកដ អភិបាលរងខេត្តសៀមរាប។
លោក ពិន ប្រាកដ បង្ហាញថា តាមរយៈគម្រោងអគារសិក្សា”មិត្តភក្តិលើផ្លូវសូត្រ”បានរួមចំណែកធ្វើឲ្យការសិក្សារបស់សិស្សានុសិស្សនៅទីនេះ កាន់មានភាពល្អប្រសើរ។ លោកក៏បានថ្លែងចំពោះឯកឧត្តម កឹមរ័ត្ន វិសិដ្ឋ ប្រធានក្រុមប្រឹក្សាភិបាលវេទិកាសម្ព័ន្ធសង្គមស៊ីវិល ដែលតែងកៀរគរបណ្តាសង្គមស៊ីវិលនានារបស់ប្រទេសចិន រួមមានមូលនិធិចិនដើម្បីសន្តិភាពនិងការអភិវឌ្ឍ មូលនិធិចិនដើម្បីអភិវឌ្ឍជនបទ មូលនិធិ Peace Land មន្ទីរពេទ្យបេះដូង Fuwai អង្គការ YUNDI របស់ខេត្តយូណាន ដើម្បីចូលរួមបំពេញបាននូវតម្រូវការជាក់ស្តែងជូនប្រជាជន និងសិស្សានុសិស្សនៅក្នុងខេត្តសៀមរាប។
តាមការលើកឡើងរបស់ ឯកឧត្តម ស៊ី ជានគ័រ អគ្គលេខាធិការមូលនិធិចិន ដើម្បីសន្តិភាពនិងការអភិវឌ្ឍ បង្ហាញថា ក្រោមកិច្ចសហការយ៉ាងជិតស្និទ្ធជាមួយវេទិកាសម្ព័ន្ធសង្គមស៊ីវិល ទើបមូលនិធិចិនដើម្បីសន្តិភាពនិងការអភិវឌ្ឍបានអនុវត្តន៍គម្រោងផ្លូវសូត្រជាង១០គម្រោង ដោយជោគជ័យនៅក្នុងប្រទេសកម្ពុជា ដោយរួមមាន គម្រោងភូមិគំរូមិត្តភាពកម្ពុជា-ចិនដើម្បីកាត់បន្ថយភាពក្រីក្រ គម្រោងទឹកស្អាត និងគម្រោងអគារសិក្សា”មិត្តភក្តិលើផ្លូវសូត្រ” រួមជាមួយគម្រោងលើកកម្ពស់ជីវភាពរស់នៅរបស់ប្រជាជនកម្ពុជា ដែលប្រើប្រាស់ថវិកាសរុបជាង៤០លានយ័ន ដែលបានផ្តល់អត្ថប្រយោជន៍ដល់ប្រជាជនកម្ពុជាជាង១០ម៉ឺននាក់។ គម្រោងទាំងនេះ បានរួមចំណែកយ៉ាងសកម្មដល់ការលើកកម្ពស់ “ទំនាក់ទំនងរវាងប្រជាជន និងប្រជាជន” នៃប្រទេសទាំងពីរ កម្ពុជានិងចិន។
ឯកឧត្តម បន្ថែមថា ការអភិវឌ្ឍន៍ទាំងនេះ គឺជាឆន្ទៈដើម្បីបម្រើដល់ផលប្រយោជន៍ប្រជាជននៅមូលដ្ឋាន ក៏ដូចជារួមកម្លាំងជាមួយបណ្តាអង្គការសង្គមស៊ីវិល សហជីពនានាក្នុងប្រទេសកម្ពុជា ក្នុងការបង្កើតឱ្យមានសុខដុមនីយកម្មក្នុងវិស័យសង្គមស៊ីវិល វេទិកាសម្ព័ន្ធសង្គមស៊ីវិលនានា ក៏ដូចជាចូលរួមចំណែកជាមួយរាជរដ្ឋាភិបាលកម្ពុជា ក្នុងការអភិវឌ្ឍសេដ្ឋកិច្ច-សង្គម ប្រកបបរិយាប័ន្ន។
សូមរំលឹកថា សាលាបឋមសិក្សាស្វាយធំ បានដំណើរការតាំងពីឆ្នាំ១៩៧៩មក ហើយនៅឆ្នាំសិក្សា២០២៣-២០២៤ មានថ្នាក់រៀនចាប់ពីកម្រិតមត្តេយ្យសិក្សា និងបឋមសិក្សា សរុបចំនួន៣៤បន្ទប់ និងមានសិស្សមានចំនួន១ ៤៥០នាក់។
អត្ថបទ និងរូបភាព÷ លោក យូ វង្ស និងលោក បូ សាវី
កែសម្រួល÷ លោក សេង ផល្លី
