គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស នៅរសៀលថ្ងៃទី១៨ ខែធ្នូ ឆ្នាំ២០២៣នេះ បានប្រារព្ភទិវាជាតិប្រយុទ្ធប្រឆាំងអំពើជួញដូរមនុស្ស ១២ធ្នូ ខួបលើកទី១៧ ឆ្នាំ២០២៣ នៅខេត្តសៀមរាប ក្រោមប្រធានបទ “បច្ចេកវិទ្យាជាមធ្យោបាយ ដើម្បីអភិវឌ្ឍន៍ជាតិ មិនមែនដើម្បីជួញដូរមនុស្ស” ដើម្បីផ្សព្វផ្សាយអំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងអំពើជួញដូរមនុស្សគ្រប់ទម្រង់ កលល្បិចពិសពុលយ៉ាងសម្បូរបែបប្រកបដោយគ្រោះថ្នាក់ និងធ្វើឲ្យមនុស្សជាច្រើនធ្លាក់ចូលក្នុងអន្ទាក់នៃអំពើជួញដូរមនុស្ស និងការកេងប្រវ័ញ្ចយ៉ាងសាហាវឃោរឃៅ។
លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាប្រធានអចិន្ដ្រៃយ៍ គណៈកម្មាធិការជាតិប្រយុទ្ធប្រឆំាងអំពើរជួញដូរមនុស្ស បានមានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចបវរធិបតី ហ៊ុន ម៉ាណែត បានតម្កល់នូវការប្តេជ្ញាចិត្តយ៉ាងមុតមាំ ក្នុងការការពារឲ្យបាននូវសន្តិភាពជាតិ សន្តិសុខសង្គម ស្ថេរភាពនយោបាយ កំណើនសេដ្ឋកិច្ចប្រកបដោយចីរភាព ដោយពង្រឹងកិច្ចសហប្រតិបត្តិការជាតិ និងអន្តរជាតិ កាន់តែទូលំទូលាយ និងការអភិវឌ្ឍន៍ធនធានមនុស្ស ប្រកបដោយថាមពល និងសក្តានុពល។ រាជរដ្ឋាភិបាលកម្ពុជា ដែលមានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ជាសេនាធិការ និងមានរចនាសម្ព័ន្ធ ប្រទាក់ក្រឡាតាំងពីថ្នាក់ជាតិ ដល់ថ្នាក់ក្រោមជាតិ និងមានកិច្ចសហការទូលំទូលាយ រហូតដល់ ថ្នាក់តំបន់ និងពិភពលោក ក្នុងគោលដៅ បង្ការទប់ស្កាត់ ប្រយុទ្ធប្រឆាំងដាច់ខាត អំពើជួញដូរមនុស្ស ដែលជាឧក្រឹដ្ឋ កម្មបែបទាសភាព និងបានបំផ្លាញដល់កិត្តិយស សេចក្តីថ្លៃថ្នូរ ផលប្រយោជន៍ និងរហូតដល់អាយុជីវិតជនរងគ្រោះយ៉ាងអមនុស្សធ៌ម។
លោកជំទាវ ជូ ប៊ុនអេង មានប្រសាសន៍បន្តថា ក្នុងរយៈពេល១០ខែ ក្នុងឆ្នាំ២០២៣នេះ គណៈកម្មាធិការជាតិប្រយុទ្ធប្រឆំាងអំពើរជួញដូរមនុស្ស មានទាំងយុទ្ធនាការថ្នាក់ជាតិ ថ្នាក់ក្រោមជាតិ តាមរយៈកម្មវិធីផ្សេងៗ មានជាអាទិ៍ តាមរយៈទិវាជាតិ ប្រយុទ្ធប្រឆាំងអំពើជួញដូរមនុស្ស កម្មវិធីវេទិកាជាតិអន្តរសាសនា ការគាំទ្រទិវាអន្តរជាតិដើម្បីសុវត្ថិភាពអ៊ីនធឺណិត និងវេទិកាសាធារណៈ នៃការអនុវត្តគោលនយោបាយភូមិ-ឃុំ-សង្កាត់ មានសុវត្ថិភាព និងសកម្មភាពចុះផ្សព្វផ្សាយអប់រំផ្ទាល់នៅតាមសហគមន៍ និងសាលារៀន ដែលរៀបចំដោយក្រសួងស្ថាប័នពាក់ព័ន្ធជាច្រើនជាដៃគូរ។ លើសពីនេះទៅទៀតការផ្សព្វផ្សាយតាមប្រព័ន្ធផ្សព្វផ្សាយសង្គម និងតាមរយៈសម្ភារៈផ្សព្វផ្សាយ ដូចជា spots អប់រំ និងខ្សែភាពយន្តខ្នាតខ្លី កម្មវិធីផ្សេងៗ សៀវភៅរូបភាព Banners, Postersជាច្រើនទំរង់។
លោកជំទាវ មានប្រសាសន៍ទៀតថា កន្លងមកជនរងគ្រោះ និងជនងាយរងគ្រោះ ដែលត្រូវបានបញ្ជូនមកពីបរទេសក្ដី ឬដែលត្រូវបានរកឃើញក្នុងប្រទេសក្ដី ជាជនជាតិខ្មែរក្តី ជាជនបរទេសក្ដី ត្រូវបានក្រសួងសង្គម កិច្ចអតីតយុទ្ធជន និងយុវនីតិសម្បទា សហការជាមួយ អាជ្ញាធរមូលដ្ឋាន និងអង្គការដៃគូដែល មានមណ្ឌលស្តារនីតិសម្បទាជនរងគ្រោះ ផ្តល់សេវាដើម្បីគាំពារជនរងគ្រោះ និងធ្វើសមាហរណកម្ម ជាបន្តបន្ទាប់។ ទោះបីជា អំពើជួញដូរមនុស្ស មិនទាន់ផុតរលត់ក្ដី ក៏ បេសកកម្មនេះ មិនទាន់ត្រូវបានបញ្ចប់ដែរ ហើយនឹងបន្តខិតខំបន្ថែមទៀតកាន់តែខ្លាំង ដែលនៅមានវិធានការបង្ការ ទប់ស្កាត់តាមរយៈវិធានការជំនាញ មានការបង្ការទប់ស្កាត់ ការធ្វើ ទេសន្តរប្រវេសន៍ ឬការឆ្លងដែនខុសច្បាប់ ដែលនាំឲ្យពលករប្រឈមនឹងភាពរងគ្រោះ ព្រមទាំងបង្ក្រាបជនខិលខូច ដែលកេងប្រវ័ញ្ចាលើពលករ ការធ្វើការធ្វើអធិការកិច្ច និងពង្រឹងប្រសិទ្ធភាព លើការអនុវត្តការងារ – ការតាមដានត្រួតពិនិត្យ ការអនុវត្តគោលនយោបាយ ឬផែនការជាដើម។ ទន្ទឹមនឹងនេះ គណៈកម្មាធិការជាតិ នៅគ្រប់កំរឹត បានតាមដាន បច្ចុប្បន្នភាពចំណាក និង ចំណូលស្រុក ស្ថានភាពនៃបទល្មើសជួញដូរមនុស្ស ល្បិចកលជនល្មើសជាដើម ។
លោកស្រី យូ សុភា អភិបាលរងខេត្តសៀមរាប មានប្រសាសន៍ថា ពីដំណាក់កាលមួយ ទៅដំណាក់កាលមួយ ទាមទារឲ្យអ្នកពាក់ព័ន្ធទាំងអស់ មានការចូលរួមសហការដោះស្រាយជុំវិញវិបត្តិទាំងអស់យ៉ាងយកចិត្តទុកដាក់ និងស្វិតស្វាញបំផុត ដើម្បីទប់ទល់នឹងឥទ្ធិពលអវិជ្ជមានទាំងឡាយ ដើម្បីរក្សាស្ថេរភាព និងប្រក្រតីភាពសង្គម កាត់បន្ថយកត្តាជំរុញឱ្យមានលំហូរទេសន្តរប្រវេសន៍ ដោយប្រថុយប្រថានប្រឈមនឹងគ្រោះថ្នាក់។ ក្នុងស្ថានភាពដ៏ប្រឈមនេះ ក្រុមទុច្ចរឹត និងបណ្តាញរបស់ខ្លួន បានព្យាយាមរកគ្រប់មធ្យោបាយ បង្កើតនូវបទល្មើសថ្មីៗ ព្រមជាមួយនឹងការប្រើប្រាស់បច្ចេកវិទ្យាទំនើប សម្រាប់ទាក់ទាញជនរងគ្រោះ ឱ្យធ្លាក់ចូលក្នុងកលល្បិចទុច្ចរិត ដើម្បីបម្រើមហិច្ឆតារបស់ខ្លួន ដែលបង្កឱ្យមានផលប៉ះពាល់យ៉ាងធំឆេងលើជនរងគ្រោះទាំងក្នុង និងក្រៅប្រទេស៕
អត្ថបទ និងរូបភាព៖ លោក ស៊ាន សុផាត , បូ សាវី
កែសម្រួល៖ លោក អ៊ុន ណារាជ្យ
