ក្រុមការងារជូសជុលប្រាសាទបុរាណរបស់អាជ្ញាធរជាតិអប្សរា កាលពីពេលថ្មីៗនេះ បានប្រទះឃើញចម្លាក់បដិមារបុរាណធ្វើពីថ្មភក់ចំនួន ៦ដុំ នៅក្នុងការដ្ឋាន ខណ:ដែលអ្នកជំនាញកំពុងតែជួសជុលនៅការដ្ឋានប្រាសាទតាព្រហ្ម។
បុរាណវិទូនៃនាយកដ្ឋានអភិរក្សប្រាសាទ និងបុរាណវិទ្យារបស់អាជ្ញាធរជាតិអប្សរា អ្នកស្រី នេត ស៊ីមន នៅថ្ងៃទី២០ ខែធ្នូ ឆ្នាំ២០២៣នេះ បានឲ្យដឹងថា ចម្លាក់ថ្មបុរាណដែលគេប្រទះឃើញនោះ មានរូបព្រះពុទ្ធគង់ភ្នែនប្រក់នាគនៅកណ្តាល និងខាងឆ្វេងមានរូបប្រាជ្ញាបារមី និងខាងស្តាំមានរូបលោកកេស្វរៈចំនួន២ រូបលោកកេស្វរៈចំនួន១រូប ព្រះពុទ្ធគង់ភ្នែនប្រក់នាគបាក់ព្រះកេសទម្រង់សមាធិ និងបាក់ព្រះហស្តទាំងសងចំនួន២ និងថ្មកំពូលហោជាង ដែលមានចម្លាក់រូបព្រះពុទ្ធគង់ភ្នែន មានទេពទ្រពីក្រោម១ផ្ទាំងទៀត។
បុរាណវិទូដដែល បានឲ្យដឹងទៀតថា រូបចម្លាក់ទាំងនោះបានកប់នៅក្រោមកំណកដីរបស់ខឿនខ្លោងទ្វារខាងត្បូង នៃប្រាសាទតាព្រហ្ម ហើយក្រុមការងារបានប្រទះឃើញនៅពេលដែលអាជ្ញាធរជាតិអប្ស រាសហការជាមួយស្ថាប័នស្រាវជ្រាវបុរាណវិទ្យាឥណ្ឌា(ASI) ចាប់ផ្ដើមការងារជួសជុលខ្លោងទ្វារនេះឡើងវិញ ដោយបានរើថ្មនៃរចនាសម្ពន្ធខ្លោងទ្វារដែលនៅរាយប៉ាយ ដើម្បីរៀបចំទៅតាមទីតាំងដើមឡើងវិញ តាមបច្ចេកទេសអាណាស្ទីឡូ កាលពីពាក់កណ្ដាលខែវិច្ឆិកា។
ព័ត៌មានជាតិ ថ្មីៗ
អ្នកស្រី នេត ស៊ីមន បានឱ្យដឹងទៀតថា ចម្លាក់ដែលក្រុមការងារប្រទះឃើញទាំងនោះ គឺគេបានសំអាត និងរក្សាទុក ដើម្បីរង់ចាំពេលជួសជុលរួចរាល់នឹងតម្កល់នៅទីតាំងឡើងវិញទៅតាមពេលវេលានិងឱកាសសមគួរណាមួយ៕
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក អ៊ុន ណារាជ្យ
