នៅថ្ងៃទី២១ ខែធ្នូ ឆ្នាំ២០២៣នេះ ឯកឧត្តម ប្រាក់ សំអឿន រដ្ឋលេខាធិការក្រសួងមហាផ្ទៃ រួមដំណើរ ដោយឯកឧត្តម ប្រាក់ សោភ័ណ អភិបាលខេត្តសៀមរាប រួមនិងមន្ទីរ អង្គភាព អាជ្ញាធរពាក់ព័ន្ធ បានចុះពិនិត្យស្ថានភាពភូមិសាស្ត្រ និង ជីវភាពរស់នៅរបស់ប្រជាពលរដ្ឋ នៅតាមបណ្ដាភូមិសាស្ត្រស្រុក ដែលពាក់ព័ន្ធ ដើម្បីពិនិត្យ និងពិភាក្សា លើការរៀបចំបង្កើត ក្រុងរុនតាឯក។
ថ្លែងក្នុងកិច្ចប្រជុំនៅសាលាខេត្តសៀមរាប នាថ្ងៃដដែលនោះ ឯកឧត្តម ប្រាក់ សោភ័ណ បានគូសបញ្ជាក់ថា ភូមិធម្មជាតិរុនតាឯក ស្ថិតនៅក្នុងភូមិតានី ឃុំរុនតាឯក ស្រុកបន្ទាយស្រី ដែលមានប្រជាពលរដ្ឋរស់នៅ ៤៤២គ្រួសារ និងបានធ្វើការអភិវឌ្ឍ ជាភូមិធម្មជាតិរុនតាឯក ដោយអាជ្ញាធរជាតិអប្សរា។ បន្ថែមពីនោះ បងប្អូនដែលបានស្ម័គ្រចិត្តផ្លាស់ទីលំនៅពីតំបន់រមណីយដ្ឋានអង្គរ ត្រូវបានរាជរដ្ឋាភិបាលផ្ដល់គោលនយោបាយរយៈពេលវែង ដើម្បីមកតាំងទីលំនៅក្នុងតំបន់នេះផងដែរ។ ឯកឧត្តម បន្ថែមថា ក្នុងពេលបច្ចុប្បន្ន ប្រជាពលរដ្ឋបានទៅរស់នៅតំបន់រុនតាឯក មានចំនួន ៦ពាន់៤៤៥គ្រួសារ ដោយក្រុមការងារ បានរៀបចំនូវហេដ្ឋារចនាសម្ព័ន្ធផ្លូវ ថ្នល់ ប្រព័ន្ធទឹកកខ្វក់ ប្រព័ន្ធទឹកស្អាត បណ្តាញអគ្គិសនី សាលាស្រុក សាលារៀន មណ្ឌលសុខភាព វត្តអារាម និងផ្សារជាដើម។
ព័ត៌មានជាតិ ថ្មីៗ
ចំពោះការរៀបចំក្រុងរុនតាឯក ក្នុងជំហានដំបូង នាពេលខាងមុខ ឯកឧត្តម អភិបាលខេត្ត ស្នើដល់ក្រុមការងារ អនុវត្តលើឃុំ២ គឺ ឃុំរុនតាឯក ស្រុកបន្ទាយស្រី និង ឃុំបល័ង្គ ស្រុកប្រាសាទបាគង។
ថ្លែងក្នុងកិច្ចប្រជុំនេះដែរ ឯកឧត្តម ប្រាក់ សំអឿន បានលើកឡើងថា ក្នុងដំណើរចុះជួបបងប្អូនប្រជាពលរដ្ឋ ពួកគាត់មានចិត្តត្រេកអរ និងសាទរចំពោះគម្រោងរបស់រាជរដ្ឋាភិបាល ដែលនឹងបង្កើតកន្លែងពួកគាត់កំពុងរស់នៅជា ក្រុងរុនតាឯក។
ឯកឧត្តម រដ្ឋលេខាធិការ ក៏បានបញ្ជាក់ដែរថា ដោយផ្អែកទៅលើការវិនិច្ឆ័យក្នុងការបង្កើតជាក្រុង ដោយផ្តោតទៅលើចំនួន ប្រជាពលរដ្ឋជាធំ និង សក្តានុពលផ្នែកសេវាកម្ម ពាណិជ្ជកម្ម ប្រព័ន្ធរោងចក្រ ឧស្សាហកម្ម ដែលមានកសិកម្ម៣០%យ៉ាងច្រើន ។ ជាក់ស្ដែង តាមការចុះពិនិត្យទៅលើឃុំ៣ គឺមានតែឃុំពីរប៉ុណ្ណោះ ដែលអាចបង្កើតជាក្រុងបាននោះ គឺឃុំ រុនតាឯក ស្រុកបន្ទាយស្រី និង ឃុំ បល័ង្គ ស្រុកប្រាសាទបាគង ដែលជាឃុំមានហេដ្ឋារចនាសម្ព័ន្ធសមស្រប ទៅនឹងលក្ខខណ្ឌ។ ក្នុងនោះដែរ ឯកឧត្តម ក៏បានជម្រុញ និង ណែនាំដល់អាជ្ញាធរខេត្ត ត្រូវធ្វើការពិភាក្សាឲ្យបានជាក់ លាក់ ជាមួយក្រុមប្រឹក្សាខេត្ត ក្នុងការដាក់ឈ្មោះក្រុងថ្មីនេះ ព្រមទាំងត្រូវពន្លឿនក្នុងការរៀបចំធ្វើសំណើរជាបន្ទាន់ ដើមី្បដាក់ ជូនដល់រាជរដ្ឋាភិបាល ស្មើសុំទៅរដ្ឋសភា សុំការសម្រេចជាផ្លូវការ ។
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
