អង្គការអប់រំ វិទ្យាសាស្ត្រ និងវប្បធម៌ នៃសហប្រជាជាតិ ដែលហៅកាត់ថា UNESCO សហការជាមួយក្រសួងព័ត៌មាន អង្គការជនពិការកម្ពុជា CDPO និងមន្ទីរព័ត៌មានខេត្តសៀមរាប បើកសិក្ខាសាលាមួយស្តីពីការទទួលព័ត៌មាន និងការអភិវឌ្ឍប្រកបដោយបរិយាបន្នពិការភាព មានរយៈពេលពីរថ្ងៃគឺនៅថ្ងៃទី២១-២២ ខែធ្នូ ឆ្នាំ២០២៣នេះ នៅសណ្ឋាគារសុខាខេត្តសៀមរាប ដោយមានការចូលរួមពីសំណាក់ថ្នាក់ដឹកនាំ និងមន្ត្រីរាជការមកពីមន្ទីរព័ត៌មានខេត្ត ចំនួន៨ រួមមានខេត្តសៀមរាប ឧត្តរមានជ័យ បន្ទាយមានជ័យ ប៉ៃលិន បាត់ដំបង ពោធិសាត់ ព្រះវិហារ និងខេត្តកំពង់ធំ។
ព័ត៌មានជាតិ ថ្មីៗ
លោកស្រី ឆាយ ដាវីន តំណាងអង្គការយូណេស្កូ មានប្រសាសន៍ថា អង្គការយូណេស្កូបានដើរតួនាទីយ៉ាងសំខាន់ក្នុងការលើកកម្ពស់សិទ្ឋិទទួលបានព័ត៌មានប្រកបដោយបរិយាបន្ន ស្របពេលនៅក្នុងពិភពលោកយើងឃើញថាមានច្បាប់និងគោលនយោបាយផ្សេងៗពាក់ព័ន្ឋទៅនឹងពិការភាព ដោយឡែកនៅកម្ពុជាក៏បានបង្កើតច្បាប់ លិខិតបទដ្ឋាន ឯកសារគតិយុត្តិជាយូរមកហើយ ហើយមកដល់ពេលនេះ ជាវេលាមួយដែលយើងត្រូវធ្វើការរួមគ្នា ក្នុងការកំណត់បញ្ហា តម្រូវការនិងជជែកគ្នាពីដំណោះស្រាយដែលអាចដាក់ចេញជាផែនការសកម្មភាពបន្ទាប់។
លោកស្រី ឆាយ ដាវីន បន្តថា ក្នុងគោលបំណងផ្តល់ជូនដល់មន្ត្រីព័ត៌មាននៅថ្នាក់ក្រោមជាតិ នូវចំណេះដឹង ធនធានសមត្ថភាពចាំបាច់ និងបច្ចេកវិទ្យាឌីជីថល លើការអភិវឌ្ឍ បរិយាបន្នពិការភាព និងការទទួលបានព័ត៌មាន និងពង្រឹងសមត្ថភាពមន្ត្រីព័ត៌មាននៅថ្នាក់ក្រោមជាតិ ដើម្បីឆ្លើយតបកាន់តែល្អប្រសើរឡើងចំពោះតម្រូវការព័ត៌មានរបស់ជនមានពិការភាព ប្រកបដោយបរិយាបន្ន ។
ឯកឧត្តម លីវ សុខុន ទីប្រឹក្សាក្រសួង និងជាប្រធានមន្ទីរព័ត៌មានខេត្តសៀមរាប មានប្រសាសន៍ថា សិក្ខាសាលានេះ ពិតជាមានសារៈសំខាន់ណាស់សម្រាប់ថ្នាក់ដឹកនាំនិងមន្ត្រីព័ត៌មាន ក្នុងការទទួលបានចំណេះដឹងថ្មីៗបន្ថែមទៀត ពាក់ព័ន្ធនឹងវិស័យព័ត៌មាន ជាពិសេសស្តីពីសកម្មភាពជនមានពិការភាព សំដៅជំរុញលើកទឹកចិត្តដល់ការផលិតព័ត៌មានអំពីសកម្មភាពជនមានពិការភាព ទៅក្នុងបណ្តាញប្រព័ន្ឋផ្សព្វផ្សាយនានា ទាំងនៅថ្នាក់ក្រោមជាតិ ថ្នាក់ជាតិ ថ្នាក់តំបន់ និងសកលលោក។
ឯកឧត្តម រំពឹងថា តាមរយៈសិក្ខាសាលានេះ នឹងប្រមូលបានធាតុចូល ចែករំលែកបទពិសោធ និងបញ្ហាប្រឈមដែលកំពុងជួបប្រទះ។ ការចែករំលែកទាំងនេះ គឺជាការត្រួសត្រាយផ្លូវ ដើម្បីឲ្យការសិក្សាស្រាវជ្រាវសម្រេចទៅមុខបាននិង សម្រាប់ជាតម្រាយផ្លូវដល់កម្មវិធីសិក្ខាសាលានៅពេលក្រោយៗទៀតពាក់ព័ន្ឋទៅនឹង ការទទួលព័ត៌មានប្រកបដោយបរិយាបន្នសម្រាប់ពិការភាព៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
