តាមរបាយការណ៍របស់គ្រឹះស្ថានអង្គរ ដែលចេញផ្សាយនៅថ្ងៃទី១ ខែមករា ឆ្នាំ២០២៤នេះ បានបញ្ជាក់ថា ពេញមួយឆ្នាំ២០២៣ គ្រឹះស្ថានអង្គរ បានរកចំណូលពីការលក់សំបុត្រជូនអ្នកទេសចរបរទេសចូលទស្សនារមណីយដ្ឋានអង្គរ ចំនួន ៣៧.១៩៨.៩៨៨ដុល្លារអាមេរិក ស្មើនឹងជាង ២០០ភាគរយ បើធៀបទៅនឹងឆ្នាំ២០២២។
របាយការណ៍បន្ថែមថា ក្នុងឆ្នាំ២០២៣ មានទេសចរបរទេសសរុប ៧៩៨.០៦៩នាក់ បានចូលទិញសំបុត្រទស្សនារមណីយដ្ឋានអង្គរ ដែលចំនួននេះកើនឡើង ១៧៧,៧៣ភាគរយ ធៀបនឹងឆ្នាំ២០២២ ខណៈដែលការលក់សំបុត្រទៅប្រាសាទកោះកេរបានចំនួន ២២២.០៩០ដុល្លារ លើអ្នកទេសចរបរទេសចំនួន ១៤.៨០៦នាក់ និង រកចំណូលពីការលក់សំបុត្រទូកនៅតំបន់ចុងឃ្នៀស បានចំនួន ៥៦៤.៦៧១ដុល្លាអាម៉េរិក។
របាយការណ៍បន្តថា ថវិកាដែលបានមកពីការលក់សំបុត្រទស្សនេះ ក៏បានឧបត្ថម្ភចូលនិធិគន្ធបុប្ផា សម្រាប់ឆ្នាំ២០២៣ សរុបមានចំនួន ១.៥៩៦.១៣៨ដុល្លារអាម៉េរិកផងដែរ៕
អត្ថបទ និងរូបភាព ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
