ការផ្តល់ប័ណ្ណសរសើរ និងរង្វាន់ដល់សិស្សពូកែ គឺជាការលើកទឹកចិត្តឲ្យសិស្សានុសិស្សកាន់តែខិតខំរៀនសូត្រឱ្យកាន់តែពូកែ អាចក្លាយជាធនធានដ៏សំខាន់សម្រាប់កិច្ចអភិវឌ្ឍន៍ជាតិ ហើយដើម្បីសម្រេចបានការងារនេះ យើងមានកត្តាជាច្រើនដូចជា៖ កត្តាមាតាបិតា, កត្តាសាលារៀន, កត្តាខ្លួនឯង. កត្តាគ្រូបង្រៀន និងកត្តាដែលសំខាន់ ជាពិសេសនោះគឺ កត្តាប្រទេសជាតិ។
ក្នុងពិធីប្រគល់ប័ណ្ណសរសើរ និងរង្វាន់លើកទឹកចិត្តដល់ប្អូនៗសិស្សានុសិស្សដែលមានភាពវ័យឆ្លាត និងពូកែជិត ១០០នាក់ នៃសាលាអន្តរជាតិ អេអិលអេ ខេត្តសៀមរាប កាលពីរសៀលថ្ងៃទី០៧ ខែមករា ឆ្នាំ២០២៤នេះ លោក នង វុត្ថា នាយកស្ថាបនិកនៃសាលាអន្តរជាតិ អេអិលអេ បានបញ្ជាក់ថា ការរៀបចំប្រគល់ប័ណ្ណសរសើរដល់សិស្សពូកែនាពេលនេះ គឺមានគោលបំណងដើម្បីលើក កំពស់វិស័យអប់រំ បណ្តុះស្មារតីឱ្យប្អូនៗសិស្សានុសិស្សឱ្យចេះស្រលាញ់ការសិក្សា។ ចំពោះគោលការណ៍ និងភាពជោគជ័យរបស់សាលា គឺបានពង្រីកគុណភាពនៃការអប់រំ វិន័យ និងសុជីវធម៌ ជាពិសេសគឺសិលធម៌ក្នុងការរស់នៅ។ មិនតែប៉ុណ្ណោះមាតាបិតា និងអាណាព្យាបាលសិស្សក៏ជាកម្លាំងចលករមួយដ៏សំខាន់ក្នុងការជម្រុញឱ្យប្អូនៗសិស្សានុសិស្សខិតខំប្រឹងប្រែង ដើម្បីទទួលបាននូវលទ្ធផលដ៏ប្រសើរ។
លោក កុយ ផល ប្រធានការិយាល័យអប់រំក្រៅប្រព័ន្ធ នៃមន្ទីរអប់រំ យុវជន និងកីឡា ខេត្តសៀមរាប មានប្រសាសន៍ថា រាជរដ្ឋាភិបាលអាណត្តិទី៧ បានដាក់ចេញយុទ្ធសាស្ត្របញ្ចកោណដំណាក់កាលទី១ ដែលមានបាវចនា កំណើនការងារ សមធម៌ ប្រសិទ្ធ ភាព និងចីរភាព ដើម្បីកសាងមូលដ្ឋានគ្រឹះឆ្ពោះទៅសម្រេចចក្ខុវិស័យឆ្នាំ២០៣០ គឺការពង្រឹងគុណភាពអប់រំ កីឡា វិទ្យាសាស្រ្ត និងបច្ចេកវិទ្យា ដែលមានកំណែទម្រង់សាលារៀន និងពង្រឹងគុណភាពអប់រំជាអាទិភាពខ្ពស់បំផុត។
លោក កុយ ផល បានមានប្រសាសន៍បន្តថាប្អូនៗ សិស្សានុសិស្សពូកែដែព ទទួលបានជ័យលាភីនាពេលនេះ គឺជាការទទួលបានពីការខិតខំប្រឹងប្រែងរៀនសូត្ររបស់ប្អូនៗដែលបាន ខិតខំសិក្សារៀនសូត្រពេញមួយឆ្នាំសិក្សា ហើយបានទទួលលទ្ធផលជាទីមោទនៈ។ ហើយភាពជោគជ័យ នៃការខិតខំប្រឹងប្រែងរបស់ប្អូនៗមិនត្រឹមតែទទួលបាននូវមោទនៈភាពសម្រាប់ខ្លួនឯងតែប៉ុណ្ណោះទេតែជា មោទនភាព និងកិត្តិយសរបស់ក្រុមគ្រួសារ មាតា បិតា និងអាណាព្យាបាល ព្រមទាំងលោកគ្រូ អ្នកគ្រូ និងសាលាផងដែរលោក។ ជំរុញដល់ប្អូនៗសិស្សានុសិស្សទាំងអស់យកត្រូវចិត្តទុកដាក់ខិតខំរៀនសូត្របន្ថែមទៀត គោរពវិន័យសាលា យកចិត្ត ទុកដាក់ស្តាប់ការពន្យល់របស់លោកគ្រូអ្នកគ្រូ ស្តាប់ការទូន្មានរបស់ឱពុកម្ដាយអាណាព្យាបាល ហើយត្រូវបន្ត ប្រឹងប្រែងរៀនសូត្របន្ថែមទៀត ដើម្បីក្លាយខ្លួនជាកូនល្អ សិស្សល្អ ពលរដ្ឋល្អទៅថ្ងៃអនាគត់បានក្លាយជាធនធាន មនុស្សប្រកបដោយគុណភាព និងសិលធម៌ខ្ពស់ ដើម្បីចូលរួមអភិវឌ្ឍប្រទេសជាតិផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
