រដ្ឋបាលស្រុកបន្ទាយស្រី ខេត្តសៀមរាប នៅរសៀលថ្ងៃទី១១ ខែមករា ឆ្នាំ២០២៤នេះ បានប្រារព្ធពិធីមិទ្ទីញរំលឹកខួបលើកទី៤៥ នៃទិវាជ័យជំនះ ៧មករា ១៩៧៩ ៧មករា ២០២៤ ក្រោមវត្តមាន ឯកឧត្តម សែមសុវណ្ណនី ប្រធានក្រុមការងាររាជរដ្ឋាភិបាលចុះមូលដ្ឋានស្រុកបន្ទាយស្រី និងមានការចូលរួមពីថ្នាក់ដឹកនាំ អាជ្ញាធរមូលដ្ឋាន ប្រជាពលរដ្ឋ និងសិស្សានុសិស្សជាច្រើននាក់។
លោក រិន ឡូត អភិបាលស្រុកបន្ទាយស្រី បានឲ្យដឹងថា ស្រុកបន្ទាយស្រី គិតចាប់ពីថ្ងៃរំដោះ ៧មករា ១៩៧៩ មកដល់បច្ចុប្បន្ននេះ មានការអភិវឌ្ឍន៍ឥតឈប់ឈរ ទាំងហេដ្ឋារចនាសម្ព័ន្ធផ្លូវថ្នល់ សាលារៀន មន្ទីរពេទ្យ វត្តអារាម ។ល។ ដែលនេះសុទ្ធសឹងតែជាការកើតចេញដោយសារប្រទេសជាតិមានសុខសន្តិភាព។ ស្របទៅនឹងការរីកចម្រើនលើការអភិវឌ្ឍន៍ រដ្ឋបាលស្រុក រួមនឹងអាជ្ញាធរគ្រប់ជាន់ថ្នាក់ បានបន្តខិតខំប្រឹងប្រែងរួមគ្នាក្នុងការបំពេញតួនាទី ភារកិច្ច ស្របតាមបទប្បញ្ញត្តិនានា ដែលមានចែងក្នុងច្បាប់ បទបញ្ជា សេចក្តីណែនាំ កម្មវិធីនយោបាយ យុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាលសម្រាប់នីតិកាលទី៧ នៃរដ្ឋសភា កម្មវិធីកំណែទម្រង់នានា ពិសេស លើកកម្ពស់ការផ្តល់សេវាសាធារណៈ និងការអភិវឌ្ឍមូលដ្ឋាន ឆ្លើយតបទៅនឹងសេចក្តីត្រូវការរបស់ប្រជាពលរដ្ឋប្រកប ដោយគុណភាព ប្រសិទ្ធភាព តម្លាភាព គណនេយ្យភាព និងសមធម៌សង្គម។
លោកអភិបាលស្រុក បានឲ្យដឹងទៀតថា ទន្ទឹមនឹងការអភិវឌ្ឍន៍នេះ រដ្ឋបាលស្រុក ក្រោមការចុះជួយពីសំណាក់ក្រុមការងារចុះមូលដ្ឋានស្រុកបន្ទាយស្រី ដែលមាន ឯកឧត្តម សែម សុវណ្ណនី ជាប្រធាន បានបន្តការយកចិត្តទុកដាក់ខ្ពស់ ក្នុងការចុះជួយប្រជាពលរដ្ឋនៅតាមមូលដ្ឋានដែលរងជួបការលំបាក មានជីវភាពខ្វះខាត កំពុងមានជំងឺ ស្ត្រីឆ្លងទន្លេ ជួបគ្រោះថ្នាក់ គ្រោះធម្មជាតិផ្សេងៗ ដូចភ្លៀងរលឹម និងបានបង្កើតនូវសមទ្ធិផលជាច្រើនទៀត ដូចជាកសាងសាលាសន្សំបុណ្យ សាងសង់សាលាឆាន់ សាងសង់ផ្លូវដីស ជួសជុលផ្លូវក្រាលគ្រួសក្រហម បានបំពាក់បង្គោលអំពូលសូឡាតាមបណ្តាឃុំទាំង៦ និងដាំដើមផ្កាក្ងោកដើមផ្កាសាគូរ៉ាជាង១,០០០ដើម តាមដងផ្លូវជាតិ ដើម្បីទាក់ទាញភ្ញៀវទេសចរណ៍ជាតិ និងអន្តរជាតិជាច្រើនមកទស្សនានៅប្រាសាទ បន្ទាយស្រី ក៏ដូចជារម្យណីយដ្ឋាននានា ក្នុងមូលដ្ឋានស្រុកបន្ទាយស្រី ទៀតផង។
ឯកឧត្តម សែម សុវណ្ណនី ជាប្រធានក្រុមការងារចុះមូលដ្ឋានស្រុកបន្ទាយស្រី មានប្រសាសន៍ថា ជាការពិតណាស់ យើងគ្រប់រូបបានចាកចេញពីផ្ទៃម្តាយរបស់យើងជាកំណើតទី១ ប៉ុន្តែថ្ងៃជ័យជម្នះ ៧មករា ១៩៧៩ ជាថ្ងៃកំណើតទី២ របស់យើង ហើយក៏ជាថ្ងៃដែលមានអត្ថន័យធំធេងណាស់ ព្រោះត្រូវបានសង្គ្រោះអាយុជីវិតរួចពីសេចក្តីស្លាប់ ហើយបើគ្មានថ្ងៃជ័យជម្នះ ៧មករា ទេក៏គ្មានអ្វីៗគ្រប់យ៉ាងដូចថ្ងៃនេះដែរ។ ថ្វីត្បិតតែយុវជនជំនាន់ក្រោយៗកើតមិនទាន់របបប្រល័យពូជសាសន៍ តែអ៊ំពូមីងមានអាយុជិត៦០ឆ្នាំរបស់ក្មួយៗចៅៗ សុទ្ឋតែដឹងយ៉ាងច្បាស់នូវសច្ចៈភាពប្រវត្តិសាស្ត្រដ៏ជូរចត់ សាហាវព្រៃផ្សៃនេះ។
ក្នុងឱកាសនោះដែរ ឯកឧត្តម សែម សុវណ្ណនី ក៏បានបង្ហាញនូវក្តីសោមនស្សរីករាយ ដែលរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានកំណត់យក ថ្ងៃទី២៩ ខែធ្នូ ជារៀងរាល់ឆ្នាំជា «ទិវាសន្តិភាពនៅកម្ពុជា» ដែលជាថ្ងៃឈប់សម្រាក និងជាទិវាបុណ្យជាតិផ្លូវការមួយនៅកម្ពុជា ហើយការនិយាយលើកឡើងដដែលៗ អំពីថ្ងៃជ័យជម្នះ៧មករា វាជាការក្រើនរំឭកដល់យុវជនជំនាន់ក្រោយ ឲ្យចងចាំនូវអ្វីដែលកម្ពុជាបានជួបប្រទះ នោះ គឺ៧មករា បានរំដោះប្រទេសកម្ពុជាចេញពីរបបវាលពិឃាដដ៏សាហាវឃោឃៅ ដែលបានធ្វើបាបប្រជាពលរដ្ឋខ្មែរក្នុងទូទាំងប្រទេស៕
អត្ថបទ និងរូបភាព៖ លោក អ៊ុន ណារាជ្យ
