នៅក្នុងពិធីសំណេះសំណាលជាមួយសិស្សានុសិស្ស ប្រឡងមធ្យមសិក្សាទុតិយភូមិទទួលបាននិទ្ទេស អេ នៅខេត្តសៀមរាបនាថ្ងៃទី១១ខែមករាឆ្នាំ២០២៤ សម្តេចពិជ័យ សេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប ក្នុងនាមរាជរដ្ឋាភិបាល ក្រុមការងារចុះជួយខេត្តសៀមរាប បានសម្តែងសេចក្តីសោមនស្សរីករាយ និងចូលរួមអបអរសាទរចំពោះសិស្សានុសិស្សខេត្តសៀមរាបចំនួន១៨៨រូប ក្នុងចំណោមសិស្សនិទ្ទេស អេ ចំនួន១៦៧៣រូប ក្នុងទូទាំងប្រទេស នៃលទ្ធផលប្រឡងមធ្យមសិក្សាទុតិយភូមិ សម័យ ប្រឡងថ្ងៃទី០៦ ខែ វិច្ឆិកា ឆ្នាំ២០២៣ កន្លងទៅនេះ លទ្ឋផលនេះបានបង្ហាញឱ្យឃើញពីការរួមចំណែកក្នុងការអភិវឌ្ឍវិស័យអប់រំនៅកម្ពុជាកាន់តែមានការរីកចម្រើនថែមទៀត។
សម្តេចពិជ័យសេនា ទៀ បាញ់ បានកោតសរសើរ និងវាយតម្លៃខ្ពស់ចំពោះឯកឧត្តម លោកជំទាវ អស់លោក លោកស្រី ថ្នាក់ដឹកនាំគ្រប់លំដាប់ថ្នាក់ ពិសេសលោកគ្រូ អ្នកគ្រូ មាតាបិតា និងអាជ្ញាធរមានសមត្ថកិច្ចទាំងអស់ ដែលបានខិតខំប្រឹងប្រែងបង្ហាត់បង្រៀន ទំនុកបម្រុង សហការជិតស្នីទ្ធចូលរួមយ៉ាងសកម្មបំពេញការងារក្នុងវិស័យអប់រំ យុវជន និងកីឡា ប្រកបដោយជោគជ័យ ។ សមិទ្ធផលនេះជាការចូលរួមចំណែក និងជួយគាំទ្រលើគ្រប់ផ្នែកនិង ជាសក្ខីកម្ម បង្ហាញពីប្រសិទ្ធភាពនៃការអប់រំ ប្រកបដោយគុណភាព បានកើតចេញពីសមត្ថភាព និងកិច្ចខិតខំប្រឹងប្រែងរបស់សិស្សានុសិស្ស លោកគ្រូ អ្នកគ្រូ ក្នុងការចូលរួមលើកកម្ពស់គុណភាពវិស័យអប់រំ ដើម្បីជម្រុញកំណើនសេដ្ឋកិច្ច និងការអភិវឌ្ឍន៍ ប្រកបដោយចីរភាព ។
សម្តេចពិជ័យសេនា ទៀ បាញ់ មានប្រសាសន៍ថា៖លទ្ឋផលដែលក្មួយៗទទួលបាននិទ្ទេស អេទាំង១៨៨រូបនេះ គឺអាស្រ័យដោយការចូលរួមពីអ្នកពាក់ព័ន្ឋគ្រប់ផ្នែក គ្រប់វិស័យទៅលើកត្តាមួយចំនួនដូចជា ទី១ កត្តាសាលារៀន មានបរិស្ថានអំណោយផលសម្រាប់បំពេញការងារ របស់គ្រូនិងការសិក្សារបស់សិស្ស និងមានរចនាសម្ព័ន្ឋសមស្រប អនាម័យ សុវត្ថិភាពការគាំទ្រការរៀននិងការបង្រៀន ការអនុវត្តកម្មវិធីសិក្សាច្បាស់លាស់ ។ទី២ កត្តាគ្រូបង្រៀនមានគុណវុឌ្ឍ អភិវឌ្ឍវិជ្ជាជីវៈជាប្រចាំ មានវិធីសាស្ត្របង្រៀន និងចេះសិក្សាស្រាវជ្រាវបច្ចេកវិទ្យាក្នុងការបង្រៀន និងមានឥរិយាបទល្អ។ទី៣កត្តាសិស្ស មានការខិតខំប្រឹងប្រែងរៀនសូត្រ និងសិស្សមានការលូតលាស់កាយសម្បទា ប្រាជ្ញាវាងវៃ មានឥរិយាបទល្អ បែងចែកពេលវេលាសិក្សារៀនសូត្រគ្រប់គ្រាន់ និងត្រៀមខ្លួនសម្រាប់ការសិក្សា ទោះបីសាលារៀននៅជនបទជួបការលំបាកខ្លះក្តី ប៉ុន្តែមន្ទីរ ការិយាល័យអប់រំ យកចិត្តទុកដាក់ក្នុងការបំប៉នអាហារូបត្ថម្ភតាមលទ្ឋភាពជាក់ស្តែង។ទី៤កត្តាគ្រួសារ គឺផ្តល់តម្លៃទៅលើការសិក្សារៀនសូត្រ ជួយគាំទ្រផ្នែកស្មារតី សម្ភារៈ និងចូលរួមយ៉ាងសកម្មក្នុងការថែទំាកុមារ ការធ្វើអនាម័យ និងផ្តល់ឱកាសដល់សិស្សានុសិស្ស បានរៀនសូត្រតាមកម្មវិធីនិងការណែនាំរបស់សាលា។
សម្តេចពិជ័យសេនា បន្ថែមថា៖រាជរដ្ឋាភិបាលអាណត្តិទី៧នៃរដ្ឋសភា ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិតី ហ៊ុន ម៉ាណែត នាយករដ្ឋមន្ត្រី បានដាក់ចេញកម្មវិធីនយោបាយយុទ្ឋសាស្ត្របញ្ចកោណដំណាក់កាលទី១ បានកំណត់យកអាទិភាពគន្លឺ៥គឺមនុស្ស ផ្លូវ ទឹក ភ្លើង និងបច្ចេកវិទ្យា ក្នុងនោះ មនុស្សជាអាទិភាពទីមួយសំដៅបង្កើនគុណភាពអប់រំ ទាំងបណ្តុះបណ្តាលបច្ចេកទេស វិជ្ជាជីវៈដើម្បីឆ្លើយតបទៅនឹងទីផ្សារការងារ តាមរយៈការយកចិត្តទុកដាក់ទៅលើការអប់រំ និងបណ្តុះបណ្តាលវិជ្ជាជីវៈទាំងគ្រឺះស្ថានសិក្សារដ្ឋនិងឯកជន។សម្តេចពិជ័យសេនា ទៀ បាញ់ មានជំនឿយ៉ាងមុតមាំថា ក្មួយៗដែលទទួលបាននិទ្ទេសAទាំង១៨៨រូបនេះ នឹងខិតខំបន្តការសិក្សាទៅមុខទៀត ដើម្បីទទួលបានចំណេះដឹង ចំណេះធ្វើ សម្រាប់ដឹកនាំនាវាកម្ពុជា ឆ្ពោះទៅរកការអភិវឌ្ឍន៍ជាមួយធនធានរបស់ក្មួយៗដែលមាន ប្រកបដោយប្រសិទ្ធភាពខ្ពស់ សម្រាប់បន្តវេន កសាង ការពារ អភិវឌ្ឍន៍សង្គមជាតិ ឲ្យឆ្លើយតបបានទៅនឹងបរិបទ នៃការវិវត្តន៍ក្នុងតំបន់ និងពិភពលោក និងបានចាត់ទុកថា ក្មួយៗទាំងអស់គឺជាមូលដ្ឋានគ្រឹះដ៏សំខាន់នាពេលអនាគតនៃប្រទេសជាតិ។
ជាការលើកទឹកចិត្តដល់សិស្សានុសិស្ស សម្តេចពិជ័យសេនា បានឧបត្ថម្ភដល់សិស្សានុសិស្សជាប់និទ្ទេសAទាំង១៨៨រូប ដោយសិស្សម្នាក់ៗទទួលបានម៉ូតូម៉ាកហុងដាវេវមួយគ្រឿងភ្ជាប់ដោយស្លាកលេខ, មួកសុវត្ថិភាព០១,ប្រេងសាំង៥២លីត្រ និងលិខិតសសើរផងដែរ ។
របាយការណ៍របស់លោក លី ប៊ុនណា ប្រធានមន្ទីរអប់រំ យុវជន និងកីឡាខេត្ត បានឲ្យដឹងផងដែរថា សម័យប្រឡងសញ្ញាបត្រ មធ្យមសិក្សាទុតិយភូមិឆ្នាំ២០២២-២០២៣ នៅថ្ងៃទី០៦ ខែ វិច្ឆិកា ឆ្នាំ២០២៣ ខេត្តសៀមរាប មានសិស្សប្រឡងសរុប ១០ពាន់៦៧៣នាក់ ស្រី៦ពាន់១៨៨ នាក់ ។ លទ្ធផល សិស្សប្រឡងជាប់ចំនួន៨ពាន់៦៣៣នាក់ ស្រី៥ពាន់២១៤នាក់ ស្មើនឹង៨០,៨៩% ស្រី៨៤,២៦%។ ក្នុងនោះសិស្សប្រឡងជាប់និទ្ទេស A ចំនួន ១៨៨នាក់ ស្រី ១០៣នាក់ ,និទ្ទេស B ចំនួន ៦៤៦នាក់ ស្រី ៤០៧នាក់ ,និទ្ទេសC ចំនួន ១ពាន់៧៤២នាក់ ស្រី១ពាន់១៤៦នាក់ និទ្ទេស Dចំនួន៣ពាន់៩៤នាក់ ស្រី១ពាន់៩០៣នាក់ និងនិទ្ទេសE ចំនួន ២ពាន់៩៦៣នាក់ ស្រី ១ពាន់៦៥៥នាក់៕
