សិស្សានុសិស្សនិទ្ទេស A ក្នុងខេត្តសៀមរាប បានលើកឡើងថា ដើម្បីជួយឱ្យការសិក្សារបស់សិស្សានុសិស្សទទួលបានជោគជ័យ គឺមានកត្តាជាច្រើនរួមសមគ្នា ដូចជា៖ ខ្លួនឯង គ្រួសារ សាលារៀន និងសង្គមជាតិ។ ប៉ុន្តែក្នុងនោះ “កត្តាខ្លួនឯង” គឺជាកត្តាសំខាន់ជាងគេដែលអាចធ្វើឱ្យសិស្សានុសិស្សទទួលបានជោគជ័យក្នុងការសិក្សានាពេលបច្ចុប្បន្ន និងទៅថ្ងៃអនាគត។
យុវជន ចំរើន បញ្ញារឹទ្ធ និង យុវតី ធៀង សៀវម៉ី ដែលជាសិស្សនិទ្ទេស A មកពីវិទ្យាល័យ ១០មករា ១៩៧៩ បានលើកឡើងថា ដើម្បីឲ្យការសិក្សាទទួលបានជោគជ័យ ទាមទារឲ្យសិស្សានុសិស្សគ្រប់រូបមានគោលដៅឱ្យច្បាស់លាស់ តាមរយៈការប្រើប្រាស់ពេលវេលា រៀបចំកាលវិភាគនៃការសិក្សាទាំងនៅសាលារៀន និងនៅផ្ទះ ដោយការខិតខំមើលមេរៀន ដោះស្រាយលំហាត់ ស្វែងយល់ពីព័ត៌មានជុំវិញខ្លួនឲ្យបានច្រើន។ ក្នុងនោះការសិក្សាទទួលបានជោគជ័យទៅបានដោយសារមានកត្តារួមផ្សំជាច្រើន តែ “កត្តាខ្លួនឯង” គឺជាកត្តាមួយដែលចាំបាច់បំផុតសម្រាប់សិស្សានុសិស្សទទួលបានជោគជ័យក្នុងការសិក្សា ព្រោះបើយើងគ្មានគោលដៅ និងឆន្ទៈក្នុងការសិក្សាទេ នោះយើងមិនអាចសម្រេចគោលដៅនៃការសិក្សាបានដែរ។ ពួកគាត់ក៏បានជម្រុញដល់ប្អូនៗសិស្សានុសិស្សជំនាន់ក្រោយ ត្រូវខិតខំរៀនសូត្រពីដើមឆ្នាំ ដើម្បីជាគ្រឹះដ៏រឹងមាំទៅថ្ងៃអនាគតទើបអាចសម្រេចគោលដៅបាន។
យុវតីមួយរូបទៀត ប្អូនស្រី សិទ្ធ សុផានីកា ជាសិស្សនិទ្ទេស A មកពីសាលាអន្តជាតិព្យូឈ័រប្រាយខេត្តសៀមរាប ក៏បានលើកឡើងដែលថា វិធីសាស្រ្តក្នុងកាសិក្សាដើម្បីទទួលបានជោគជ័យ គឹការខិតខំសិក្សាបន្ថែមដោយខ្លួនឯង តាមរយៈការសិក្សាស្រាវជ្រាវខ្លួនឯង និងមិត្តភក្តិ ហើយកុំបោះបង់នៅពេលយើងបរាជ័យ។ ក្នុងនោះដែរក្រៅពីកត្តាខ្លួនឯង កត្តាគ្រួសារ សាលារៀន និងសង្គម ក៏ជាកត្តាចាំបាច់ផងដែរ បើគ្មានកត្តានេះចូលរួមទេ យើងគ្រប់គ្នាក៏មិនអាចឈានទៅភាពជោគជ័យដែរ។
ព័ត៌មានជាតិ ថ្មីៗ
ក្នុងពិធីជួបសំណេះសំណាលជាមួយអាណាព្យាបាល និងសិស្សនិទ្ទេស A ក្នុងខេត្តសៀមរាប កាលពីថ្ងៃទី១១ ខែមករា ឆ្នាំ២០២៤នេះ សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្ត្រមណ្ឌលសៀមរាប បានគូរបញ្ជាក់ថា លទ្ឋផលដែលក្មួយៗទទួលបាននិទ្ទេស A គឺអាស្រ័យដោយការចូលរួមពីអ្នកពាក់ព័ន្ឋគ្រប់ផ្នែកគ្រប់វិស័យទៅលើកត្តាមួយចំនួនដូចជា៖ ទី១.កត្តាសាលារៀន មានបរិស្ថានអំណោយផលសម្រាប់បំពេញការងារ របស់គ្រូនិងការសិក្សារបស់សិស្ស និងមានរចនាសម្ព័ន្ឋសមស្រប អនាម័យ សុវត្ថិភាពការគាំទ្រការរៀននិងការបង្រៀន ការអនុវត្តកម្មវិធីសិក្សាច្បាស់លាស់។ ទី២.កត្តាគ្រូបង្រៀនមានគុណវុឌ្ឍ អភិវឌ្ឍវិជ្ជាជីវៈជាប្រចាំ មានវិធីសាស្ត្របង្រៀន និងចេះសិក្សាស្រាវជ្រាវបច្ចេកវិទ្យាក្នុងការបង្រៀន និងមានឥរិយាបទល្អ។ ទី៣.កត្តាសិស្សខ្លួនឯង មានការខិតខំប្រឹងប្រែងរៀនសូត្រ និងសិស្សមានការលូតលាស់កាយសម្បទា ប្រាជ្ញាវាងវៃ មានឥរិយាបទល្អ បែងចែកពេលវេលាសិក្សារៀនសូត្រគ្រប់គ្រាន់ និងត្រៀមខ្លួនសម្រាប់ការសិក្សា ទោះបីសាលារៀននៅជនបទជួបការលំបាកខ្លះក្តី ប៉ុន្តែមន្ទីរ ការិយាល័យអប់រំ យកចិត្តទុកដាក់ក្នុងការបំប៉នអាហារូបត្ថម្ភតាមលទ្ឋភាពជាក់ស្តែង និងទី៤.កត្តាគ្រួសារ គឺផ្តល់តម្លៃទៅលើការសិក្សារៀនសូត្រ ជួយគាំទ្រផ្នែកស្មារតី សម្ភារៈ និងចូលរួមយ៉ាងសកម្មក្នុងការថែទំាកុមារ ការធ្វើអនាម័យ និងផ្តល់ឱកាសដល់សិស្សានុសិស្ស បានរៀនសូត្រតាមកម្មវិធីនិងការណែនាំរបស់សាលា។
គួរឲ្យដឹងថា សម័យប្រឡងសញ្ញាបត្រមធ្យមសិក្សាទុតិយភូមិឆ្នាំ២០២២-២០២៣ ខេត្តសៀមរាប មានសិស្សប្រឡងសរុប ១០.៦៧៣នាក់ ស្រី៦.១៨៨នាក់។ ក្នុងនោះសិស្សប្រឡងជាប់និទ្ទេស A មានចំនួន ១៨៨នាក់ ស្រី១០៣នាក់ ,និទ្ទេស B ចំនួន ៦៤៦នាក់ ,និទ្ទេសC ចំនួន ១.៧៤២នាក់ ,និទ្ទេស D ចំនួន៣.០៩៤នាក់ និងនិទ្ទេស E ចំនួន ២.៩៦៣នាក់៕
អត្ថបទ៖ លោក អ៊ុន ណារាជ្យ
រូបភាព៖ សហការី
