នៅព្រឹកថ្ងៃទី១០ ខែមករា ឆ្នាំ២០២៤នេះ សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ អនុប្រធានគណបក្សប្រជាជនកម្ពុជា និងជាតំណាងរាស្ត្រមណ្ឌលខេត្តសៀមរាប បានអញ្ជើញជាអធិបតីដ៏ខ្ពង់ខ្ពស់ ក្នុងពិធីមិទ្ទិញរំលឹកខួបលើកទី៤៥ នៃទិវាជ័យជម្នះ៧មករា (៧មករា១៩៧៩-៧មករា ២០២៤) ដែលរៀបចំឡើងដោយរដ្ឋបាលខេត្តសៀមរាប នៅសួនច្បារមាត់ស្ទឹងមុខព្រះរាជដំណាក់ក្រុងសៀមរាប ដោយមានការនិមន្ត និង អញ្ជើញចូលរួមពីសំណាក់ព្រះសង្ឃ ឯកឧត្តម លោកឧកញ៉ា លោកជំទាវ ជាសមាជិកព្រឹទ្ធសភា រដ្ឋសភា រដ្ឋមន្ត្រីនិងមន្ត្រីសំខាន់ៗនៃក្រសួងការពារជាតិ សមាជិក សមាជិកាក្រុមការងារចុះមូលដ្ឋានខេត្តសៀមរាប ប្រធាននិងសមាជិកសមាជិកាក្រុមប្រឹក្សាខេត្ត អភិបាលនិងអភិបាលរងខេត្ត លោក លោកស្រី ជាថ្នាក់ដឹកនាំមន្ទីរ អង្គភាពនានាក្នុងខេត្ត កងកម្លាំងប្រដាប់អាវុធទាំងបីប្រភេទ អាជ្ញាធរមូលដ្ឋាន លោកគ្រូអ្នកគ្រូ សិស្សានុសិស្ស ក្រុមយុវជនស្ម័គ្រចិត្ត និង ប្រជាពលរដ្ឋក្នុងក្រុងសៀមរាប សរុបប្រមាណជាង៣០០០នាក់ ។
តាមខ្លឹមសារនៃសុន្ទរកថា សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា សម្តេចពិជ័យសេនា ទៀ បាញ់ បានបញ្ជាក់ថា៖ថ្ងៃទី៧ ខែមករា ឆ្នាំ២០២៤ នេះ គឺជាខួបលើកទី៤៥ឆ្នាំនៃទិវាជាប្រវត្តិសាស្ត្ររបស់ប្រជាជនកម្ពុជាលើរបបប្រល័យពូជសាសន៍ប៉ុល ពត ដែលបានធ្វើឱ្យប្រជាជាតិខ្មែររស់រានមានជីវិតឡើងវិញទាន់ពេលវេលា រួចផុតពីទារុណកម្ម និងអំពើកាប់សម្លាប់ដ៏សាហាវយង់ឃ្នងបំផុត ហើយជ័យជម្នះនេះ ៧មករានេះ ក៏បានដណ្តើមមកជូនប្រជាជនវិញនូវសិទ្ឋិសេរីភាពគ្រប់បែបយ៉ាង ដែលត្រូវបាត់បង់ទាំងស្រុងក្នុងរបបប៉ុល ពត បានបញ្ចប់នូវសករាជដ៏ខ្មៅងងឹតបំផុតរបស់កម្ពុជាក្នុងរយៈពេល៣ឆ្នាំ ៨ខែ ២០ថ្ងៃ និង បានបើកឡើងនូវសករាជថ្មីគឺ ឯករាជ្យ សន្តិភាព សេរីភាព ប្រជាធិបតេយ្យនិងវឌ្ឍនភាពសង្គម។
សម្តេចពិជ័យសេនា ទៀ បាញ់ បានរម្លឹកឡើងថា កាលពី៤៥ឆ្នាំមុននេះ ក្នុងពេលប្រទេសកម្ពុជាធ្លាក់ក្នុងរបបកម្ពុជាប្រជាធិបតេយ្យ ឬហៅថារបបប្រល័យពូជសាសន៍ ដឹកនាំដោយ ប៉ុល ពត ប្រជាពលរដ្ឋខ្មែរគ្រប់រូប រួមទាំងកុមារតូចៗ បានរស់នៅក្រោមការបង្ខិតបង្ខំឲ្យធ្វើការលើសកម្លាំង គ្មានថ្ងៃឈប់សម្រាក ទទួលទានអាហារមិនគ្រប់គ្រាន់ គ្មានមន្ទីរពេទ្យ គ្មានសាលារៀន និង សិទ្ធិសេរីភាពទាំងអស់ ប៉ុន្តែក្រោយពីប្រទេសជាតិត្រូវបានរំដោះ នៅថ្ងៃ៧ មករា ឆ្នាំ១៩៧៩ ក្រោមការដឹកនាំរបស់គណបក្សប្រជាជនកម្ពុជា គឺពលរដ្ឋមានសិទ្ធិសេរីភាពពេញលេញឡើងវិញ ហើយប្រទេសជាតិទាំងមូលមានសុខសន្តិភាព និងការអភិវឌ្ឍរីកចម្រើនគ្រប់វិស័យមកទល់សព្វថ្ងៃ ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា ដែលបានធ្វើឲ្យកម្ពុជាមានកិត្យានុភាព និងមានមុខមាត់សារជាថ្មីលើឆាកអន្តរជាតិ។
សម្តេចពិជ័យសេនា ទៀ បាញ់ បញ្ជាក់ថា៖ ជាការពិតគឺយើងគ្រប់រូបបានចាកចេញពីផ្ទៃម្តាយរបស់យើងជាកំណើតទី១ ប៉ុន្តែថ្ងៃជ័យជម្នះ៧មករា១៩៧៩ ជាថ្ងៃកំណើតទី២របស់យើង ដែលកំណើតទីពីរនេះ ពិតមានអត្ថន័យធំធេងណាស់ ព្រោះត្រូវបានសង្គ្រោះអាយុជីវិតរួចពីសេចក្តីស្លាប់ ហើយបើគ្មានថ្ងៃជ័យជម្នះ៧មករាទេក៏ គឺគ្មានអ្វីៗគ្រប់យ៉ាងដូចថ្ងៃនេះដែរ ថ្វីត្បិតតែយុវជនជំនាន់ក្រោយៗកើតមិនទាន់របបប្រល័យពូជសាសន៍ តែអ៊ំពូមីងមានអាយុជិត៦០ឆ្នាំរបស់ក្មួយៗចៅៗ សុទ្ឋតែដឹងយ៉ាងច្បាស់នូវសច្ចៈភាពប្រវត្តិសាស្ត្រដ៏ជូរចត់ សាហាវព្រៃផ្សៃនេះ។
ក្នុងឱកាសនោះដែរ សម្តេចពិជ័យសេនា ទៀ បាញ់ បានបង្ហាញនូវក្តីសោមនស្សរីករាយ ដែលរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានកំណត់យក ថ្ងៃទី២៩ ខែធ្នូ ជារៀងរាល់ឆ្នាំជា «ទិវាសន្តិភាពនៅកម្ពុជា» ដែលជាថ្ងៃឈប់សម្រាក និងជាទិវាបុណ្យជាតិផ្លូវការមួយនៅព្រះរាជាណាចក្រកម្ពុជា ហើយការនិយាយលើកឡើងដដែលៗ អំពីថ្ងៃជ័យជម្នះ៧មករា វាជាការក្រើនរំឭកដល់យុវជនជំនាន់ក្រោយ ឲ្យចងចាំនូវអ្វីដែលកម្ពុជាបានជួបប្រទះ នោះ គឺ៧មករា បានរំដោះប្រទេសកម្ពុជាចេញពីរបបវាលពិឃាដដ៏សាហាវឃោឃៅ ដែលបានធ្វើបាបប្រជាពលរដ្ឋខ្មែរក្នុងទូទាំងប្រទេស ៕
អត្ថបទ និង រូបថត ៖ សហការី
កែសម្រួល ៖ លោក លីវ សាន្ត