កិច្ចប្រជុំជាអន្តរក្រសួងរបស់ថ្នាក់ដឹកនាំនិង មន្ត្រីជំនាញ គ្រប់ផ្នែកជំនាញ ជាមួយ ក្រសួងព័ត៌មាន ក្នុងការពិនិត្យត្រៀមរៀបចំ កិច្ចប្រជុំសន្និសីទកំពូលប្រព័ន្ធផ្សព្វផ្សាយអាស៊ី ហៅកាត់ថា AMS ANGKOR លើកទី១៦ ឆ្នាំ ២០១៩ បានដំណើរការទៅ នៅព្រឹក ថ្ងៃទី០៩ ខែឧសភា ឆ្នាំ ២០១៩ នាទីស្តីការក្រសួង ព័ត៌មាន ក្រោមវត្តមាន ប្រធាន អង្គប្រជុំ ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន ។
កិច្ចប្រជុំអន្តរក្រសួងនេះ មានការចូលរួមពីតំណាងក្រសួងការបរទេស និងកិច្ចសហប្រត្តិការអន្តរជាតិ ក្រសួងវប្បធម៏ និងវិចិត្រសិល្បៈ ក្រសួងទេសចរណ៏ អគ្គស្នងការនគរបាលជាតិ និងអាជ្ញាធរកំចាត់មីនកម្ពុជា ។
គួរបញ្ជាក់ដែរថា កិច្ចប្រជុំសន្និសីទកំពូល ប្រព័ន្ធផ្សព្វផ្សាយអាស៊ី (AMS ANGKOR) លើកទី ១៦ នេះ គឺកម្ពុជានឹងធ្វើជាម្ចាស់ផ្ទះ ក្នុងនោះក្រសួងព័ត៌មាន ជាអ្នកទទួលរៀបចំ ចូលរួមកិច្ចសហការជាមួយ វិទ្យាស្ថានតំបន់អាស៊ីប៉ាស៊ីហ្វិច ដើម្បីអភិវឌ្ឍន៍ប្រព័ន្ធផ្សព្វផ្សាយ ហៅកាត់ថា A I B D។ ដំណើរការនៃកម្មវិធីកិច្ចប្រជុំនេះ (AMS ANGKOR 2019) នឹងប្រព្រឹត្តទៅ ចាប់ពីថ្ងៃទី ៩ រហូតដល់ ថ្ងៃទី១៥ ខែមិថុនា ឆ្នាំ២០១៩ នាទឹកដីអង្គរ ខេត្តសៀមរាប ដោយគ្រោងអញ្ជើញអ្នកចូលរួមមក ពីបណ្តាប្រទេសនានាជុំវិញពិភពលោកបណ្តា រដ្ឋមន្ត្រីព័ត៌មានក្នុងប្រទេសអាស៊ាន និងប្រទេសមួយចំនួនទៀតក្នុងតំបន់។
ឯកឧត្តម រដ្ឋមន្ត្រី ខៀវ កាញារីទ្ធ មានប្រសាសន៏ គួសបញ្ជាក់ថា នេះជាលើក ដំបូងហើយ ដែលកម្ពុជា នឹងធ្វើជាម្ចាស់ផ្ទះ រៀបចំ កិច្ចប្រជុំសន្និសីទកំពូលប្រព័ន្ធផ្សព្វផ្សាយអាស៊ី (AMS ANGKOR) លើកទី១៦នេះ ហើយកិច្ចប្រជុំដ៏ធំមួយនេះ នឹងធ្វើពិធីបើកក្រោម វត្តមានដ៏ខ្ពង់ខ្ពស់ របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា ។
បើតាមខ្លឹមសារក្នុងកិច្ចប្រជុំពិនិត្យត្រៀមរៀបចំ សន្និសីទកំពូលប្រព័ន្ធផ្សព្វផ្សាយអាស៊ី (AMS ANGKOR) លើកទី១៦នេះ គ្រោងនឹងមាន ស្ថាប័នសារព័ត៌មានអន្តរជាតិធំៗ មន្ត្រីជំនាញផ្នែកផ្សព្វផ្សាយ សារព័ត៌មាន សាស្ត្រាចារ្យ អ្នកបច្ចេកទេសខាង ព័ត៌មាន ទូរគមនាគមន៍ ICT និង អ្នកកាសែត បរទេស មកពីជាង ៤០ ប្រទេស ពិសេសបណ្តារដ្ឋមន្ត្រីព័ត៌មានមួយចំនួន មកពីបណ្តាប្រទេសក្នុងតំបន់អាស៊ាន និងប្រទេសមួយចំនួនទៀត រួមជាមួយ អ្នកកាសែតកម្ពុជាប្រមាណ ៥០០ នាក់ ក៏នឹងអញ្ជើញមកចូលរួមក្នុងកិច្ចប្រជុំនេះផងដែរ។ ប្រទេសកម្ពុជា គឺជាសមាជិកគណះ កម្មាធិការប្រតិបត្តិ នៃ វិទ្យាស្ថានតំបន់អាស៊ី ប៉ាស៊ីហ្វិចដើម្បីអភិវឌ្ឍន៏ប្រព័ន្ធផ្សព្វ ផ្សាយ ហៅកាត់ថា A I B D ហើយសម្រាប់កិច្ចប្រជុំដ៏សំខាន់នេះ នឹងជាការទាក់ទាញ ទាំងផ្នែកទេសចរណ៏ និងនយោបាយ នៅក្នុងប្រទេសកម្ពុជា បើសិនជា វាប្រព្រឹត្តទៅប្រកបដោយផ្លែផ្កា ។
ទាក់ទងទៅនឹងលទ្ធផលនៃកិច្ចប្រជុំ អន្តរក្រសួង នេះដែរ ឯកឧត្តម ហាស់ សំអាត អនុរដ្ឋលេខាធិការ ក្រសួងព័ត៌មាន បានធ្វើការបញ្ជាក់បន្ថែមថា៖
(សំឡេង នៅក្នុងវីដេអូខាងលើ)
អត្ថបទ និង រូបភាព៖ ក្រសួងព័ត៌មាន
