ការផ្គត់ផ្គង់ទឹកស្អាត និងការលើកកម្ពស់អនាម័យជនបទ គឺជាផ្នែកមួយយ៉ាងសំខាន់ដែលរាជរដ្ឋាភិបាល រួមនឹងអាជ្ញាធរមូលដ្ឋាន បាននឹងកំពុងយកចិត្តទុកដាក់យ៉ាងខ្លាំង ពោលគឺធ្វើយ៉ាងណាឲ្យការផ្គត់ផ្គង់សេវាផ្នែកនេះបានទៅដល់ដៃប្រជាពលរដ្ឋ និយាយជារួមគឺការសម្រចឲ្យបាននូវទស្សនៈវិស័យ “នៅឆ្នាំ២០២៥ ប្រជាជនគ្រប់រូបនៅសហគមន៍ជនបទ ត្រូវទទួលបានការផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្តរភាព”។
ថ្លែងក្នុងសិក្ខាសាលាស្តីពីការរៀបចំផែនសកម្មភាព ដើម្បីបញ្ចប់ការបន្ទោបង់ពាសវាលពាសកាល ODF ថ្នាក់ខេត្ត នាព្រឹកថ្ងៃទី១៥ ខែមករា ឆ្នាំ២០២៤នេះ នៅសណ្ឋាគារអេមព្រឹសអង្គរ ខេត្តសៀមរាប លោក អ៊ឺង គឹមលាង អភិបាលរងខេត្ត បានបញ្ជាក់ថា រដ្ឋបាលខេត្ត បានកំពុងយកចិត្តទុកដាក់យ៉ាងខ្លាំង ក្នុងការជម្រុញការអភិវឌ្ឍនៅតាមមូលដ្ឋាន សំដៅកាត់បន្ថយភាពក្រីក្ររនៅក្នុងប្រទេសកម្ពុជា ស្របទៅតាមគោលនយោបាយរបស់រាជរដ្ឋាភិបាលកម្ពុជា ស្របទៅនឹងទស្សនៈវិស័យប្រជាជននៅតាមសហគមន៍ជនបទ ត្រូវទទួលបានការផ្គត់ផ្គង់ទឹកស្អាតនៅឆ្នាំ២០២៥។
លោក អ៊ឺង គឹមលាង បានបន្តថា ដើម្បីសម្រេចទស្សនៈវិស័យនៃគោលនយោបាយនេះ រាជរដ្ឋាភិបាលបានអនុម័តផែនការយុទ្ធសាស្រ្តជាតិស្តីពីការផ្គត់ផ្គង់ទឹកស្អាត និងការលើកកម្ពស់អនាម័យជនបទ សម្រាប់ឆ្នាំ២០១៤-២០២៥ ក្នុងគោលបំណងធ្វើឲ្យប្រជាពលរដ្ឋនៅតាមជនបទទទួលបានសេវាទឹកស្អាត និងអនាម័យ១០០ភាគរយ។ ផែនការនេះនឹងរួមចំណែកដល់ការសម្រេចបានគោលដៅអភិវឌ្ឍន៍ប្រកបដោយចីរភាពរបស់កម្ពុជា ជាពិសេសគោលដៅទី៦ ដែលបានចែងថា ធានាការផ្គត់ផ្គង់ និងការគ្រប់គ្រងប្រកបដោយនិរន្តរភាពនូវទឹកស្អាត និងអនាម័យសម្រាប់ប្រជាពលរដ្ឋគ្រប់រូប ក៏ដូចជាគោលដៅដែលទាក់ទងនឹងការអប់រំ សុខភាព សមភាពយេនឌ័រ និងការប្រែប្រួលអាកាសធាតុ។
លោកអភិបាលរងខេត្ត បានបញ្ជាក់ថា កាលពីឆ្នាំ២០១៣ ខេត្តសៀមរាប អត្រាគ្របដណ្តប់ផ្នែកអនាម័យមានក្នុងកម្រិត ៣៦.៣០ភាគរយ ដោយក្នុងនោះពុំមានភូមិ ឃុំ ឬស្រុកណាមួយក្នុងខេត្តដែលបញ្ឈប់ការបន្ទោបង់ពាសវាលពាសកាលទេ។ ប៉ុន្តែ១០ឆ្នាំក្រោយ គឺឆ្នាំ២០២៣នេះ អត្រាគ្របដណ្តប់អនាម័យមាន ៩៣.៧៣ភាគរយ។ ក្នុងនោះខ្នងផ្ទះមានបង្គន់ប្រើប្រាស់ផ្ទាល់ខ្លួនមាន ២១៣.១២០បង្គន់ ខ្នងផ្ទះបានប្រើប្រាស់បង្គន់ ៨៧.០៨៩ខ្នងផ្ទះ និងខ្នងផ្ទះគ្មានបង្គន់ប្រើប្រាស់ ១៤.៨៣៥ខ្នងផ្ទះ។ ភូមិដែលបញ្ឈប់ការបន្ទោបង់ពាស់វាលពាសកាល(ODF) មានចំនួន ៤០៦ភូមិ ឃុំដែលបញ្ឈប់ការបន្ទោរបង់ពាស់វាលពាសកាលចំនួន ៣២ឃុំ ជាពិសេសគឺស្រុកដែលបញ្ឈប់ការបន្ទោបង់ពាសវាលពាសកាលមានចំនួន ៣ស្រុក គឺស្រុកអង្គរជុំ ស្រុកស្រីស្នំ និង ស្រុកបន្ទាយស្រី។ ដោយឡែក ភូមិមិនទាន់បានODF មានចំនួន ៥៣៦ភូមិ ឃុំមិនទាន់បាន ODF មាន៦៨ឃុំ និងស្រុកចំនួន៩ មិនទាន់បាន ODF ។
លោកបន្ថែមថា ដើម្បីសម្រេចឲ្យបានខេត្តសៀមរាប ជាខេត្តបញ្ចប់ការបន្ទោរបង់ពាសវាលពាសកាល ខេត្តបានលើកទឹកចិត្តសល់លោកអភិបាលក្រុងស្រុក ដាក់ចេញនូវផែនការយុទ្ធសាស្ត្រ ក៏ដូចជាសកម្មភាពរបស់ខ្លួន ដើម្បីឲ្យក្រុងស្រុករបស់ខ្លួននីមួយៗសម្រេចការបញ្ចប់ការបន្ទោរបង់ពាសវាលពាសកាល តាមផែនការកំណត់ដែលរាជរដ្ឋាភិបាលបានដាក់ចេញ ដោយជម្រុញពួកគាត់ធ្វើកិច្ចសន្យា ក្នុងការសាងសង់បង្គន់ និងបញ្ឈប់ការបន្ទោរបង់ពាសវាលពាសកាល សំខាន់ ចំពោះបងប្អូនមានលំនៅដ្ឋានបណ្តែតទឹក។ ក្នុងនោះលោកក៏បានជម្រុញដល់អាជ្ញាធរស្រុក ឃុំសង្កាត់ រួមគ្នាអនុវត្តផែនការនេះ ឲ្យបានសម្រេចបានមុនឆ្នាំ២០២៥ ដើមី្បឆ្ពោះទៅដណ្តើមជ័យលាភីនៅថ្នាក់ជាតិ ហើយក៏សូមឲ្យបងប្អូនជាអាជ្ញាធរឃុំសង្កាត់ ដែលជួបបញ្ហាប្រឈម ដើមី្បយករាល់បញ្ហាប្រឈមទាំងនោះដាក់ជូនទៅរដ្ឋបាលខេត្ត ធ្វើការប្រជុំដោះស្រាយជូនបងប្អូនផងដែរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
