ជាមួយនឹងការយកចិត្តទុកដាក់ខ្ពស់លើវិស័យអប់រំ ពី សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា តាមរយៈជំនួបសំណេះសំណាលជាមួយ បេក្ខជនប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០២២-២០២៣ ដែលទទួលបាននិទ្ទេស A សរុបចំនួន ១ ៦៧៣នាក់ ទូទាំងប្រទេសរួចមក ដោយឡែក អាជ្ញាធរខេត្តសៀមរាប ក៏បានរៀបចំពិធីសំណេះសំណាលជាមួយសិស្សានុសិស្ស ដែលទទួលបាននិទ្ទេស A នៅមណ្ឌលសៀមរាបសរុបចំនួន ១៨៨នាក់ ក្រោមអធិបតីភាព សម្ដេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រនៃកម្ពុជា និងជាអ្នកតំណាងរាស្ត្រមណ្ឌលសៀមរាប។
ជាមួយភាពរីកចម្រើន នៃវិស័យអប់រំក្នុងខេត្តសៀមរាប គ្រឹះស្ថានសិក្សាឯកជន បានបន្តបើកដំណើរការជាបន្តបន្ទាប់នៅគ្រប់កម្រិត ទន្ទឹមនោះ លទ្ធផលនៃការប្រឡងជាប់សញ្ញាបត្រមធ្យមសិក្សាទុតិយភូមិ ឆ្នាំសិក្សា២០២២-២០២៣ ក៏ទទួលបានការរួមចំណែកយ៉ាងសំខាន់ពីគ្រឹះស្ថានសិក្សាឯកជន ដើម្បីលើកកម្ពស់វិស័យអប់រំក្នុងខេត្តផងដែរ នេះបើតាមការលើកឡើង លោកស្រី ម៉ននី រង្សី អភិបាលរងខេត្តសៀមរាប ក្នុងពិធីប្រគល់បណ្ណសរសើរប្រចាំឆ្នាំសិក្សា២០២២-២០២៣ និងរង្វាន់លើកទឹកចិត្តជូនដល់សិស្សានុសិស្ស នៃសាលាវេសហ្គេតអន្តរជាតិ នៅថ្ងៃទី១៣ ខែមករា ឆ្នាំ២០២៤។
យោងតាមរបាយការណ៍សង្ខេប របស់សាលាវេសហ្គេតអន្តរជាតិ បង្ហាញថា៖ ឆ្នាំសិក្សា២០២២-២០២៣ កន្លងទៅនេះ សាលាវេសហ្គេតអន្តរជាតិ គ្រប់សាខាទាំងអស់ បានទទួលសិស្សានុសិស្សចុះឈ្មោះចូលរៀនក្នុងកម្មវិធីសិក្សាចំណេះទូទៅភាសាខ្មែរ កម្មវិធីសិក្សាភាសាបរទេស សរុបប្រមាណ ២១០០នាក់។ ចំពោះ លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ ទទួលបានសិស្សប្រឡងជាប់ប្រមាណ ៨៦ ភាគរយ ក្នុងនោះសិស្សទទួលបាននិទ្ទេស A មានចំនួន ៤ នាក់។
លោកស្រី ម៉ននី រង្សី បញ្ជាក់ថា រាជរដ្ឋាភិបាលកម្ពុជាថ្មី និតីកាលទី៧ បានអនុញ្ញាតឱ្យវិស័យអប់រំឯកជនចូលរួមអភិវឌ្ឍធនធានមនុស្ស ចាប់ពីកម្រិតមតេយ្យសិក្សា ដល់កម្រិតឧត្តមសិក្សា ព្រោះវិស័យអប់រំឯកជន បានដើរតួនាទីយ៉ាងសំខាន់ ក្នុងការរួមចំណែកដល់ការអភិវឌ្ឍប្រទេសជាតិ តាមរយៈការផ្ដល់ចំណេះដឹងចាប់ពីកុមារតូច រហូតដល់មនុស្សពេញវ័យ និងការអប់រំពេញមួយជីវិត។ ការរីកចម្រើនលើវិស័យអប់រំ និងវិស័យផ្សេងៗទៀត ក្នុងខេត្តសៀមរាប ក៏ដូចជានៅទូទាំងប្រទេស គឺផ្តើមចេញពីឆន្ទៈដ៏មោះមុតរបស់រាជរដ្ឋាភិបាល ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី បានកសាងមាតុភូមិកម្ពុជាឱ្យទទួលបាននូវសុខសន្តិភាព និងការអភិវឌ្ឍប្រកបដោយភាពរីកចម្រើនថ្កុំថ្កើងរុងរឿង។
គួរជម្រាបថា រយៈពេល ៥ឆ្នាំចុងក្រោយ លើកឡើងឆ្នាំ២០២០ ជាឆ្នាំនៃវិបត្តិកូវីដ១៩ សិស្សានុសិស្សដែលបានបេក្ខជនប្រឡងសញ្ញាបត្រមធ្យមសិក្សាទុតិយភូមិ ទទួលបាននិទ្ទេសA មានការកើនឡើងស្ទើររៀងរាល់ឆ្នាំ ក្នុងនោះ៖ ឆ្នាំ២០១៨ ចំនួន ២១នាក់ ឆ្នាំ២០១៩ ចំនួន ៣៨នាក់ ឆ្នាំ២០២១ ចំនួន ១៥៣ នាក់ , ឆ្នាំ២០២២ ចំនួន ១១១នាក់ និង ឆ្នាំ២០២៣ ចំនួន ១៨៨នាក់៕
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
