សៀមរាប៖ រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកជំទាវ ភឿង សកុណា បានលើកឡើងថា ការប្រឹងប្រែងថែរក្សា និងលើកកម្ពស់អក្សសាស្ត្រ គឺជាការរក្សាដួងព្រលឹង នៃជនជាតិនោះ ឲ្យនៅតែស្ថិតស្ថេរជានិច្ច។
ថ្លែងនៅក្នុង ពិធីបើក «សំណេរអង្គរ» ឬពិធីប្រកួតសរសេរតាមអានអក្សរខ្មែរ លើកទី១ ដែលប្រារព្ធឡើងនៅលើស្ពានហាល នៃប្រាសាទអង្គរវត្ត ព្រឹកថ្ងៃទី២១ ខែមករា ឆ្នាំ២០២៤នេះ លោកជំទាវ ភឿង សកុណា បានលើកឡើងថា ក្នុងសម័យអណានិគមបារាំង គេចង់កែប្រែអក្សរសាស្ត្រខ្មែរ ទៅជាអក្សរឡាតាំង។ ប៉ុន្តែបុព្វបុរសខ្មែរ មានទាំងព្រះសង្ឃ ទាំងប្រជាជន បានខិតខំរួមគ្នាថែរក្សា ការពារអក្សរសាស្ត្រខ្មែរ និងជាអត្តសញ្ញាណជាតិ រហូតដល់បច្ចុប្បន្ន។
លោកជំទាវ រដ្ឋមន្ត្រី បន្តថា ជាតិមួយ ប្រទេសមួយ នៅពេលអក្សររបស់ខ្លួន ត្រូវបានយកចិត្តទុកដាក់ថែរក្សានិងលើកកម្ពស់ មានន័យថា ព្រលឹងនិងស្មារតីជនជាតិនោះនៅតែស្ថិតស្ថេរជានិច្ច។ ដូច្នេះ យើងជាកូនខ្មែរត្រូវរក្សាស្មារតីនេះ កុំឲ្យបាត់បង់ទុកជាកេរ្តិ៍សម្រាប់អ្នកជំនាន់ក្រោយ។ លោកជំទាវ ក៏បានថ្លែងនូវការកោតសរសើរចំពោះបេក្ខជន ក៏ដូចជាមាតាបិតា អាណាព្យាបាលរបស់បេក្ខជន ដែលបានជំរុញឲ្យមានការចូលរួមប្រកួតប្រជែងក្នុងពិធី សំណេរអង្គរនេះ ។
លោក លីម ប៊ុនហុក អ្នករៀបចំកម្មវិធី«សំណេរអង្គរ» លើកទី១ បង្ហាញថា សំណេរអង្គរ មានអ្នកចូលរួមជាង ៧០០នាក់ ហើយនេះជាព្រឹត្តិការណ៍ដ៏មានសារ:សំខាន់ក្នុងការលើកកម្ពស់អក្សរសាស្ត្រខ្មែរ ពិសេសគឺជួយឱ្យប្រជាពលរដ្ឋ មហាជនទូទៅកែប្រែទម្លាប់អក្ខរាវិរុទ្ធក្នុងការសរសេរ និងអានពាក្យខ្មែរឱ្យត្រឹមត្រូវឡើងវិញ។
អត្ថបទ និងរូបភាព៖ លោក ជា ស្រស់ និងលោកស៊ាន សុផាត
កែសម្រួល៖ លោក សេង ផល្លី
