ស្រុកជីក្រែង ត្រូវបានវាយតម្លៃថាជាស្រុក ដែលមានសក្ដានុពលជាងគេ ក្នុងការដាំដុះដំណាំស្រូវ តាមបច្ចេកទេសកសិកម្មឆ្លាតវៃ ដែលធន់ទៅនឹងអាកាសធាតុ ក្នុងចំណោមបណ្ដា ក្រុង ស្រុកចំនួន ៧ ដែលអង្គការ រីដា (READA) បានជ្រើសរើស។ នេះបើតាមការបញ្ជាក់ពីលោក តិច រតនា ប្រធានសម្របសម្រួលគម្រោងកសិកម្មឆ្លាតវៃ (CSA) អង្គការ រីដា នៅថ្ងៃទី១៩ ខែមករា ឆ្នាំ២០២៤។
លោក តិច រតនា បន្ថែមថា គម្រោងអនុវត្តន៍កសិកម្មឆ្លាតវៃ មានសហគមន៍ចូលរួមសរុបចំនួន ២៣ ដែលស្ថិតនៅក្នុង ក្រុងសៀមរាប ស្រុកប្រាសាទបាគង ស្រុកបន្ទាយស្រី ស្រុកពួក ស្រុកសូទ្រនិគម ស្រុកអង្គរធំ និងស្រុកជីក្រែង។ ក្នុងនោះ សហគមន៍កសិកម្មចំនួន១០ ស្ថិតនៅក្នុងស្រុកជីក្រែង ទទួលបានការវាយតម្លៃ សម្រាប់ការអនុវត្ត លើការដាំដុះតាមបច្ចេកទេសកសិកម្មឆ្លាតវៃ។ ក្នុងនោះ គម្រោងបានណែនាំដល់សហគមន៍កសិកម្មផលិតស្រូវផ្ការំដួល ជាប្រភេទចំណាត់ថ្នាក់ ពូជសុទ្ធគ្រឹះ និងពូជសុទ្ធវិញ្ញាបនបត្រ ដែលចំណាត់ថ្នាក់ទាំង០២កម្រិតនេះ កសិករអាចទុកពូជសម្រាប់ដាំដុះ បន្ដបាន ២ ទៅ៣ ជំនាន់ទៀត ចំពោះ តម្លៃស្រូវទទួលបានតម្លៃខ្ពស់ ចន្លោះពី ១៤០០៛ ទៅ ២០០០៛ ក្នុងមួយគីឡូក្រាម សម្រាប់ស្រូវសើម។ លោកបន្តថា កត្តាដែលធ្វើស្រុកជីក្រែង ទទួលបានទិន្នផលស្រូវខ្ពស់ ក្នុងឆ្នាំ២០២៣ នេះ ដោយសារកសិករទទួលបានចំណេះដឹងពីគម្រោងកសិកម្មតាមបែបឆ្លាតវៃ ជាពិសេសគឺការប្រើប្រាស់ពូជសុទ្ធ ព្រមទាំងកត្តាគួបផ្សំមួយចំនួនទៀតដូចជា មានប្រព័ន្ធធារាសាស្ត្រគ្រប់គ្រាន់ ធម្មជាតិអំណោយផល រីឯតម្លៃវិញ មួយផ្នែកបណ្ដាលមកពីប្រទេសកសិម្មមួយចំនួន ក្នុងពិភពលោកផ្អាកការនាំចេញកសិផលរបស់ពួកគេ។
ជារួមលោក តិច រតនា បង្ហាញថា សម្រាប់ឆ្នាំ២០២៣ ទិន្នផលស្រូវ របស់សហគមន៍ទាំង២៣ របស់គម្រោង មានការកើនឡើងប្រមាណជា ១១ភាគរយ ចំណែកឯតម្លៃស្រូវវិញមានការកើនឡើងប្រមាណពី ២៥ ទៅ ៣០ភាគរយធៀបនឹងឆ្នាំ២០២២។
ប្រធានសម្របសម្រួលគម្រោងរូបនេះ ក៏បានផ្ដល់អនុសាសន៍ដល់កសិករ ដែលធ្វើកសិកម្មតាមទម្លាប់ទាំងអស់ សូមងាកមកធ្វើកសិកម្មបែបឆ្លាតវៃ ដោយប្រើប្រាស់ពូជសុទ្ធល្អ និងត្រូវចេះបន្សុទ្ធពូជទុកដោយខ្លួនឯង ដើម្បីកាត់បន្ថយថ្លៃដើមនៃការផលិត។
លោកបន្តថា ផ្ទុយទៅវិញ ប្រសិនបើ កសិករដាំដុះដោយប្រើពូជស្រូវមិនសុទ្ធល្អ ទោះបីទទួលបានទិន្នផលខ្ពស់ក្តី ក៏មិនប្រាកដថាទទួលបានប្រាក់ចំណេញខ្ពស់ដែរ។ មួយវិញទៀត សូមកសិករទាំងអស់ ប្រើប្រាស់ធាតុចូលកសិកម្មប្រកបដោយភាពសន្សំសំចៃ ដើម្បីរួមចំណែកក្នុងការកាត់បន្ថយការប្រែប្រួលអាកាសធាតុផង។
អត្ថបទ និងរូបភាព៖ អ្នកស្រី កើត សុនី និងលោក ស៊ុំ គីន
កែសម្រួល៖ លោក សេង ផល្លី
