មន្ត្រីរបស់គណបក្សប្រជាជនកម្ពុជា គ្រប់ជាន់ថ្នាក់ ដែលមានតួនាទីតាមក្រសួង ស្ថាប័ន និងរដ្ឋបាលថ្នាក់ក្រោមជាតិ ត្រូវរួមគ្នាបន្តថែរក្សាពង្រឹងសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សាធារណៈក្នុងសង្គម និងត្រូវខិតខំលើកកម្ពស់ ស្មារតីទទួលខុសត្រូវ ក្នុងការបំពេញការងាររបស់រដ្ឋ ទៅតាមតួនាទីភារកិច្ចរៀងៗខ្លួន ដោយត្រូវចូលរួមអនុវត្តន៍នូវកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ឲ្យសម្រេចបានជោគជ័យទៅតាមការរំពឹងទុក។
សម្ដេចពិជ័យសេនា ទៀ បាញ់ អនុប្រធានគណបក្សប្រជាជនកម្ពុជា បានថ្លែងបែបនេះ ក្នុងឱកាសដែលសម្ដេចអញ្ជើញជួបសំណេះសំណាលជាមួយសមាជិកក្រុមប្រឹក្សាឃុំ-សង្កាត់ របស់គណបក្សប្រជាជនកម្ពុជា នៅក្រុងសៀមរាប នាព្រឹកថ្ងៃទី២១ ខែមករា ឆ្នាំ២០២៤។
ក្នុងនាមសម្ដេចតេជោ ហ៊ុន សែន ប្រធានគណបក្ស ប្រជាជនកម្ពុជា សម្ដេចពិជ័យសេនា ទៀ បាញ់ បានកោតសរសើរ និង វាយតម្លៃខ្ពស់ចំពោះឯកឧត្តម លោកឧកញ៉ា លោកជំទាវ លោក លោកស្រី ជាថ្នាក់ដឹកនាំ សមាជិកគណបក្សគ្រប់ថ្នាក់ នៅទូទាំងខេត្តសៀមរាប ដែលបានខិតខំបំពេញការងារប្រកបដោយស្មារតីទទួលខុសត្រូវខ្ពស់ទាំងការងារបក្ស និងការងាររដ្ឋបាល ព្រមទាំងសម្រេចបានសមិទ្ធផលជាច្រើននាពេលកន្លងមក។
ក្នុងឱកាសនោះ ឯកឧត្តម ប្រាក់ សោភ័ណ ប្រធានគណៈកម្មាធិការគណបក្សប្រជាជន ខេត្តសៀមរាប ក៏បានលើកឡើងផងដែរ ពីព្រឹត្តិការណ៍បោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ខាងមុខ ដោយបេក្ខជនឈរឈ្មោះ របស់គណបក្សប្រជាជនកម្ពុជា នៅភូមិភាគទី៤ មានចំនួន ៥ខេត្ដ រួមមានខេត្ដសៀមរាប បាត់ដំបង ប៉ៃលិន បន្ទាយមានជ័យ និងឧត្ដរមានជ័យ សរុប ២០រូប ក្នុង នោះពេញសិទ្ធចំនួន ១០រូប និងបម្រុងចំនួន ១០រូប។
ឯកឧត្ដម បញ្ជាក់ថា សម្រាប់ខេត្តសៀមរាប មានអង្គបោះឆ្នោតសរុបចំនួន ៦៧៤រូប ក្នុងនោះគណបក្សប្រជាជនកម្ពុជាមានចំនួន ៥២០រូប៕
អត្ថបទ និងរូបភាព៖ លោក ទ្រា ពន្លឺ លោក បូ សាវី និងលោក ម៉ី សុខារិទ្ធ
កែសម្រួល៖ លោក សេង ផល្លី
