ព្រឹត្ដិការណ៏ប្រឡងសរសេរតាមអានថ្នាក់ជាតិលើកដំបូង «សំណេរអង្គរ» បានបញ្ចប់ដោយជោគជ័យ និងបានផ្ដល់នូវបទពិសោធន៏ល្អៗ និងថែមទាំងចំណេះដឹងដ៏ល្អដល់បេក្ខជនលើកក្រោយថែមទៀត។
គួរឲ្យដឹងថា ការប្រឡង «សំណេរអង្គរ» ធ្វើឡើងកាលពីថ្ងៃទី២១ ខែមករា ឆ្នាំ២០២៤ នៅស្ពានរាលហាលខាងមុខអង្គរ ដោយរកឃើញបេក្ខជន៣នាក់ បានទទួលជ័យលាភី ក្នុងចំណោមបេក្ខជនជាង ៧០០នាក់មកពីតាមបណ្ដារាជធានីខេត្ដចូលរួមប្រឡង។
លោក ចេង រតនា ដែលទទួលបានជ័យលាភីលេខ១ មកពីរាជធានីភ្នំពេញ បានលើកឡើងក្រោយបញ្ចប់ការប្រឡងថា លោកមានមោទកភាពខ្លួនឯងដោយមិននឹកស្មានថាខ្លួនបានទទួលជ័យលាភីលេខ១ ខណៈដែលមានបេក្ខជនជិតមួយពាន់នាក់ចូលរួមការប្រឡង។ លោកបន្ដថា ការប្រលងសំណេរអង្គរនេះ មានជាប់ពាក់ព័ន្ធនឹងប្រាសាទអង្គរ ដែលនឹងធ្វើឱ្យប្រជាពលរដ្ឋខ្មែរយល់កាន់តែច្បាស់ពីអក្សរសាស្ដ្ររបស់ខ្លួន។
ដោយឡែកបេក្ខជនជ័យលាភីលេខ២ និងលេខ៣ ក៏លើកឡើងស្រដៀងគ្នាដែរថា ការចូលរួមប្រឡង«សំណេរអង្គរ» ដោយចង់ចូលរួមអភិរក្ស និងលើកស្ទួយអក្សរនិងវប្បធម៌ជាតិសាស្ដ្ររបស់ខ្លួន ខណៈដែលមានប្រជាពលរដ្ឋខ្មែរមួយចំនួនចាប់អារម្មណ៍អក្សរបរទេស។ ពួកគាត់បន្តថា ការប្រឡងថ្នាក់ជាតិលើកដំបូងពី «សំណេរអង្គរ» នេះ ពិតជាមានសារៈសំខាន់ណាស់ពីអក្សរសាស្ដ្រខ្មែរ ព្រោះការសរសេរតាមអាននេះ លើកឡើងពីតំបន់រមណីរដ្ឋានអង្គរដែលជាកេរតំណែលដ៍ល្បីល្បាញរបស់បុព្វបុរស់ខ្មែរពីជំនាន់មុន។ គ្មានបរទេសណាមកលើកស្ទួយអក្សរសាស្ដ្រខ្មែរ ក្រៅពីប្រជាពលរដ្ឋខ្មែរខ្លួនឯង ដូចនេះសុំស្នើរឱ្យប្រជាពលរដ្ឋខ្មែរ ក៍ដូចសិស្សានុសិស្សចូលរួមស្វែងយល់ពីអក្សរសាស្ដ្រជាតិខ្លួនឯងច្រើនជាងភាសាបរទេស។
បើតាមលោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា បានអានអត្ថបទប្រឡងទៅកាន់បេក្ខជនក្នុងរយៈពេលមួយម៉ោង ដែលអត្ថបទទាក់ទងនឹងរមណីយដ្ឋានអង្គរ ជាការរៀបចំសម្រិតសម្រាំងទុកដោយឯកឧត្តមឧបនាយករដ្ឋមន្រ្តី ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ក្រោមចំណងជើងថា «អង្គរ អាណាចក្រនៃអរិយធម៌ខ្មែរ»។ កម្មវិធីសំណេរអង្គរ ជាកម្មវិធីថ្មីដែលបង្កើតឡើងក្នុងបំណងលើកកម្ពស់អក្សរសាស្រ្តខ្មែរ តាមរយៈការប្រឡងប្រជែងសរសេរតាមអាន។ កម្មវិធីនេះក៏អាចនឹងក្លាយជាព្រឹត្តិការណ៍ថ្នាក់ជាតិ ជាប្រចាំឆ្នាំផងដែរនាពេលអនាគត៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
