មន្ត្រីជាន់ខ្ពស់ក្រសួងការពារជាតិ ជម្រុញដល់យុវជនជំនាន់ក្រោយខិតខំសិក្សារៀនសូត្រ ឱ្យក្លាយជាពលរដ្ឋល្អក្នុងការជួយអភិវឌ្ឍន៍ប្រទេសជាតិ និងចូលរួមនាំគ្នាថែរក្សាការពារសន្តិភាពនៅកម្ពុជាយើងឲ្យបានគង់វង្ស ប្រទេសមានសន្តិភាព ទើបមានការអភិវឌ្ឍន៍។
ក្នុងឱកាសជួបសំណេះសំណាលជាមួយសិស្សានុសិស្សនៃវិទ្យាល័យអង្គរធំ ខេត្ដសៀមរាប នៅថ្ងៃទី២២ ខែមករា ឆ្នាំ២០២៤នេះ ឯកឧត្តម ផៃ សុខខេង នាយករងខុទ្ទកាល័យ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានណែនាំដល់សិស្សានុសិស្សត្រូវបន្ដយកចិត្ដទុកដាក់ការសិក្សារៀនសូត្រ លះបង់ការដើរលេងច្រើន ហាមប៉ះពាល់គ្រឿងញៀន និងសូមឲ្យសិស្សានុសិស្ស អាណាព្យាបាល និងប្រជាពលរដ្ឋជួយបន្តរថែរក្សាការពារសន្តិភាព ព្រោះ
ប្រទេសមានសន្តិភាព ទើបមានការអភិវឌ្ឍន៍។
ឯកឧត្តម ផៃ សុខខេង មានប្រសាសន៍ថា រាជរដ្ឋាភិបាលអាណត្តិទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី បានយកចិត្តទុកដាក់ខ្លាំង ប្រកបដោយឆន្ទៈមុតស្រួច បន្តធ្វើកំណែទម្រង់លើវិស័យអប់រំជាតិ ក្នុងគោលដៅលើកកម្ពស់ការអប់រំឱ្យកាន់តែល្អប្រសើរឡើងថែមទៀត។ ពិសេសផ្ដោតទៅលើការបណ្តុះបណ្តាលផ្នែកធនធានមនុស្ស ដោយគិតគូរចាប់ពីបឋមសិក្សាឡើងទៅ ដោយរួមបញ្ចូលទាំងផ្នែកសីលធម៌ និងសុជីវធម៌ ហើយសូម្បីតែការប្រឡងចូលបម្រើការងារក្នុងក្របខណ្ឌរដ្ឋ ក៏ត្រូវធ្វើការប្រឡងចូលដែរ ដើម្បីចម្រាញ់ជ្រើសយកអ្នកមានសមត្ថភាពពិតប្រាកដ ដែលជាការផ្តល់ឱកាសដល់សិស្ស និស្សិតគ្រប់រូប ទាំងអ្នកក្រ និងអ្នកមាន។ ឯកឧត្តមក៏បានផ្តាំផ្ញើដល់ សិស្សានុសិស្សសូមខិតខំរៀនសូត្រគ្រេបយកចំណេះដឹង និងពង្រឹងផ្នែកសីលធម៌ សុជីវធម៌ ការទំនាក់ទំនង ដែលជាជំនាញ ជាទុនដ៏មានសារសំខាន់ និងផ្តាំផ្ញើដល់ក្មួយៗសិស្សានុសិស្សទាំងអស់ឱ្យត្រៀមលក្ខណៈសម្បត្តិគ្រប់គ្រាន់ ទាំងផ្នែកចំណេះដឹង ផ្នែកសុខភាព សម្រាប់ការប្រឡងសញ្ញាបត្រមធ្យមសិក្សាទុតិយភូមិខាងមុខ និងសូមជូនពរប្រឡងជាប់ទទួលបានលទ្ធផលល្អ និទ្ទេសល្អ គ្រប់ៗគ្នា។
លោកស្រី ឈន សុគន្ធា អភិបាលរងស្រុកអង្គរធំ ខេត្តសៀមរាប បានថ្លែងអំណរគុណដល់មន្ដ្រីជាន់ខ្ពស់ក្រសួងការពារជាតិដែលតែងតែចុះសំណេះសំណាល និងផ្ដល់បទពិសោធន៍ការសិក្សា ព្រមទាំងចែករំលែកគន្លឹះសំខាន់ក្នុងការប្រលងទទួលបានជោគជ័យ។ ការចូលរួមផ្ដល់បទពិសោធន៍ និងការចែករំលែកចំណេះដឹងពីស្ថាប័នពាក់ព័ន្ធ មានសារៈសំខាន់ក្នុងលើកទឹកចិត្ដដល់សិស្សានុសិស្សអោយបន្ដខិតខំក្រេបយកចំណេះដឹង ជាពិសេសធ្វើឱ្យពួកគាត់ប្រលងទទួលបានលទ្ធផលល្អ៕
អត្ថបទ និងរូបភាព៖ លោក បូ សាវី
កែសម្រួល៖ លោក លីវ សាន្ត
