តាមទំនៀមទម្លាប់ កូនចៅជាប់សែស្រឡាយចិន ឬវៀតណាម នៅប្រទេសកម្ពុជា តែងប្រារព្ធបុណ្យចូលឆ្នាំថ្មីប្រពៃណីចិន-វៀតណាម ជារៀងរាល់ឆ្នាំនៅតាមលំនៅឋាន កន្លែងប្រកបមុខរបរ និងតូច ធំទៅតាមលទ្ធភាពរបស់ពួកគេរៀងៗខ្លួន។ ជាក់ស្ដែងក្នុងក្រុងសៀមរាប ប្រជាពលរដ្ឋជាច្រើន បានសម្រុកទៅទិញម្ហូបអាហារ នំ ចំណី គ្រឿងរណ្ដាប់ផ្សេងៗ ដើម្បីសែនដល់ជីដូនជីតា ញាតិ មិត្ត ក៏ដូចជាជួបជុំទទួលទានអាហារក្នុងក្រុមគ្រួសារ ដែលជាទំនៀមទម្លាប់ប្រពៃណីរបស់ជនជាតិចិន វៀតណាម។
ចំពោះសកម្មភាពលក់ដូររបស់ជីវករនៅតាមទីផ្សារ ក្នុងក្រុងសៀមរាប នៅថ្ងៃទី៧ ខែកុម្ភៈម្សិលមិញនេះ បានលើកឡើងខុសៗគ្នាពីតម្លៃនៃប្រភេទទំនិញ ដោយមួយចំនួនបង្ហាញថា មានការឡើងថ្លៃ មួយចំនួនតម្លៃនៅដដែល និងទំនិញមួយចំនួនទៀតចុះថោកជាងឆ្នាំ២០២៣។
ដោយឡែក ចំពោះទំហំ នៃការចាយវាយរបស់ប្រជាពលរដ្ឋ ក្នុងឱកាសបុណ្យចូលឆ្នាំថ្មីប្រពៃណីចិន-វៀតណាមក្នុងឆ្នាំនេះ អាជីវករនៅតាមទីផ្សារ លើកឡើងថាមានការកាត់បន្ថយច្រើន ដោយគាត់យល់ឃើញថា អាចបណ្ដាលមកពីផលប៉ះពាល់សេដ្ឋកិច្ចក្នុង និងក្រៅប្រទេស និងឥទ្ធិពលនៃវិបត្តិជំងឺកូវីដកាលពឆ្នាំកន្លងទៅ។
គួរជម្រាបថា ពិធីបុណ្យចូលឆ្នាំប្រពៃណីចិន-វៀតណាម ជាពិធីបុណ្យដ៏សំខាន់មួយ របស់ជនជាតិទាំងពីរ។ សម្រាប់ឆ្នាំ២០២៤នេះ ពិធីសែនបុណ្យចូលឆ្នាំប្រពៃណីចិន-វៀតណាម នឹងចាប់ផ្ដើមនៅថ្ងៃទី៩ ខែកុម្ភៈ។
