នៅព្រឹកថ្ងៃទី០៨ ខែកុម្ភៈ ឆ្នាំ២០២៤នេះ ក្រុមប្រឹក្សាខេត្តសៀមរាប បានបើកកិច្ចប្រជុំសាមញ្ញលើកទី៥៧ ឆ្នាំទី៥ ជាឆ្នាំចុងក្រោយនៃអាណត្តិទី៣ ដើម្បីលើកយកបញ្ហាមួយចំនួនមកពិនិត្យពិភាក្សា និងដោះស្រាយ ក្រោមអធិបតីភាពឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោក អ៊ឹង គឹមលាង អភិបាលរងខេត្ត ដោយមានការចូលរួមពីសមាជិកសមាជិកា និងអ្នកពាក់ព័ន្ធជាច្រើនរូប។
កិច្ចប្រជុំនេះបានលើយកនូវបញ្ហាពាក់ព័ន្ធមួយចំនួនរបស់រដ្ឋបាលខេត្ត រួមមាន៖ បញ្ហាគំនូសចរាចរណ៍តាមផ្លូវក្នុងក្រុង និងផ្លូវជាតិ, ករណីការបម្រើសេវាច្រកចេញចូលតែមួយមានភាពយឺតយ៉ាវលើវិស័យសំណង់ សុរិយោដី, បញ្ហាការគ្រប់គ្រងផ្សារឃ្យុងយូរ, ការចេញប័ណ្ណសម្គាល់ដល់ក្រុមប្រឹក្សាឃុំសង្កាត់ ដែលជាអង្គបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ និងក្រុមប្រឹក្សាខេត្ត-ក្រុង-ស្រុក។ បន្ទាប់ពីអ្នកពាក់ពន្ធ័បានធ្វើការបំភ្លឺរួចមក សមាជិកអង្គប្រជុំ បានអនុម័តទៅលើពង្រាងរបាយការណ៍ប្រចាំខែមករា របស់រដ្ឋបាលខេត្ត ព្រមទាំងបានអនុម័តទៅលើខ្លឹមសារកិច្ចប្រជុំសាមញ្ញលើកទី៥៦ របស់ក្រុមប្រឹក្សាខេត្ត និងប្រតិទិនរៀបចំកសាងកម្មវិធីវិនិយោគ ៣ឆ្នាំរំកិល ២០២៥-២០២៧ របស់រដ្ឋបាលខេត្ត ព្រមទាំងបានអនុម័តលើសេចក្តីសម្រេច ស្តីពីការបង្កើតគណៈកម្មាធិការគ្រប់គ្រងមណ្ឌលអភិវឌ្ឍន៍ធនធានមនុស្សខេត្តសៀមរាប។
លោក អ៊ឹង គឹមលាង អភិបាលរងខេត្ត បានវាយតម្លៃខ្ពស់ទៅលើលទ្ធផលការងារប្រចាំខែមករា ព្រមទាំងបានជម្រុញដល់ថ្នាក់ដឹកនាំមន្ទីរអង្គភាព អាជ្ញាធរក្រុង ស្រុក សំខាន់គ្រប់ទីចាត់ការអង្គភាពចំណុះសាលាខេត្ត ដែលជាសេនាធិការជូនគណៈអភិបាលខេត្ត ត្រូវបង្កើនការយកចិត្តទុកដាក់ខ្ពស់ក្នុងកិច្ចកសាង និងអភិវឌ្ឍន៍ ដោយផ្តោតសំខាន់ទៅលើការងារសន្តិសុខ សណ្តាប់ធ្នាប់សាធារណៈ បញ្ហាអនាម័យ បរិស្ថានតាមក្រុងស្រុក និងអនុវត្តឲ្យខាងតែបាននូវទិសដៅរបស់រាជរដ្ឋាភិបាលនីតិកាលទី៧ ឲ្យទទួលបានជោគជ័យ សំខាន់លើការពន្លឿន ក្នុងការចុះបញ្ជីដីធ្លីឲ្យបានរួចរាល់នៅឆ្នាំ២០២៥។ អាជ្ញាធរមានសមត្ថកិច្ចនៅតាមបណ្តាក្រុង ស្រុក ត្រូវយកចិត្តទុកដាក់ខ្ពស់លើកការងារសន្តិសុខ សណ្តាប់ធ្នាប់ និងចរាចរណ៍ ក្នុងឱកាសបុណ្យចូលឆ្នាំចិនវៀតណាមនេះផងដែរ។
ថ្លែងបិទអង្គប្រជុំ ឯកឧត្តម អ៊ាន ឃុន បានបញ្ជាក់ថា តាមរយៈការចូលរួមធ្វើការពិនិត្យ ពិភាក្សា ឆ្លុះបញ្ចាំងមតិយោបល់ល្អៗ ប្រកបដោយក្រមសីលធម៌វិជ្ជាជីវៈ ពីសំណាក់សមាជិកសមាជិកាក្រុមប្រឹក្សាខេត្ត គណៈអភិបាលខេត្ត ប្រធានមន្ទីរអង្គភាព និងអ្នកពាក់ព័ន្ធទាំងអស់បានញ៉ាំងឲ្យដំណើរការនៃកិច្ចប្រជុំសាមញ្ញលើកទី៥៧ ប្រព្រឹត្តទៅតាមលំដាប់លំដោយ និងទទួលបានលទ្ធផលតាមការគ្រោងទុក។ ក្នុងខែមករា និងខែកុម្ភៈ ឆ្នាំ២០២៤នេះ រដ្ឋបាលខេត្តបានខិតខំក្នុងការបំពេញភារកិច្ចលើគ្រប់វិស័យ សំខាន់លើការបម្រើសេវាសាធារណៈ សន្តិសុខសណ្តាប់ធ្នាប់ ការអភិវឌ្ឍន៍មូលដ្ឋានបានល្អប្រសើរ។
ឯកឧត្តមប្រធានក្រុមប្រឹក្សា ក៏បានសង្កត់ធ្ងន់ផងដែរ លើការងារសន្តិសុខ សណ្តាប់ធ្នាប់ សុវត្ថិភាព ក្នុងពេលបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នៅតាមការិយាល័យបោះឆ្នោត។ ជាមួយគ្នានោះគ្រប់កាលៈទេសៈដែលប្រជាពលរដ្ឋជួបការលំបាក អាជ្ញាធរខេត្តបានយកចិត្តទុកដាក់ក្នុងការដោះស្រាយរាល់បញ្ហាដែលបានលើកឡើង ព្រោះបញ្ហាទាំងនេះ គឺជាបញ្ហារបស់ប្រជាពលរដ្ឋដែលតែងតែលើកឡើងជាអន្លើៗ និងបានដោះស្រាយប្រកបដោយប្រសិទ្ធភាព មានសាមគ្គីភាពផ្ទៃក្នុង និងមានស្មារតីទទួលខុសត្រូវក្នុងការបំពេញការងារស្របតាមគោលនយោបាយ ច្បាប់ និងលិខិតបទដ្ឋានគតិយុត្តពាក់ព័ន្ធនឹងកំណែទម្រង់វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិផងដែរ៕
អត្ថបទ និងរូបភាព៖ លោក ម៉ី សុខារិទ្ធ, លោក ស៊ាន សុផាត
កែសម្រួល៖ លោក អ៊ុន ណារាជ្យ
