នៅថ្ងៃទី១២ ខែកុម្ភ: ឆ្នាំ២០២៤ គណៈកម្មការអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ចហិរញ្ញវត្ថុ ដឹកនាំដោយឯកឧត្តម ផូ ផារិទ្ធ រដ្ឋលេខាធិការក្រសួងអភិវឌ្ឍន៍ជនបទ បានចុះពិនិត្យ និងវាយតម្លៃផ្លូវក្រាលដីល្បាយគ្រួសមួយខ្សែ មានប្រវែង ៦.០០០ម៉ែត្រ ទទឹង៨ម៉ែត្រ សាងសង់លូមូលមុខពីរ ចំនួន២ន្លែង និងលូមូលមុខមួយចំនួន៤កន្លែង ស្ថិតនៅភូមិតាភ្ញា និងភូមិព្រៃធំ ឃុំគោកធ្លកលើ ស្រុកជីក្រែង ដែលអនុវត្តគម្រោងដោយ នាយកដ្ឋានវិស្វកម្ម ក្រសួងការពារជាតិ ប្រើប្រាស់ថវិការបស់រាជរដ្ឋាភិបាល តាមរយៈក្រសួងអភិវឌ្ឍន៍ជនបទ បន្ទាប់ពីបញ្ចប់សុពលភាពលើការងារស្ថាបនា និងថែទាំ។
យោងតាមរបាយការណ៍កិច្ចសន្យាស្ថាបនារបស់ក្រសួងអភិវឌ្ឍន៍ជនបទនិង នាយកដ្ឋានវិស្វកម្មក្រសួងការពារជាតិ បានបង្ហាញថា ផ្លូវក្រាលដីល្បាយគ្រួសនេះ បានចាប់ផ្ដើមសាងសង់នៅដើមខែមករាឆ្នាំ២០២៣ និងស្ថាបនារួចរាល់នៅថ្ងៃទី៣១ខែកក្កដាឆ្នាំ២០២៣ ដែលការស្ថាបនានេះ ត្រូវបានធានាគារគុណភាពរយៈពេល៦ខែ ទាំងគុណភាព បរិមាណ គំនូរប្លង់ ក៍ដូចជាលក្ខណៈបច្ចេកទេស បន្ទាប់ពីសាងសង់រួចមួយរយភាគរយ ។
ឯកឧត្តម ផូ ផារិទ្ធ រដ្ឋលេខាធិការក្រសួងអភិវឌ្ឍន៍ជនបទ មានប្រសាសន៍ថា ផ្លូវដែលទើបសាងសង់ថ្មីនេះ មានសារៈសំខាន់ណាស់សម្រាប់ប្រជាពលរដ្ឋនៅមូលដ្ឋានក្នុងការដឹកជញ្ជូនទំនិញដំណាំកសិកម្មគ្រប់ប្រភេទរបស់ប្រជាពលរដ្ឋនៅជនបទ ជាពិសេសការធ្វើដំណើររបស់សិស្សានុសិស្ស ទៅសាលារៀន ដូច្នេះសូមអំពាវនាវដល់អាជ្ញាធរមូលដ្ឋាន និងប្រជាពលរដ្ឋឲ្យចូលរួមថែរក្សាផ្លូវនេះឲ្យបានល្អសម្រាប់អនាគតវែងឆ្ងាយ៕
អត្ថបទ និងរូបភាព ៖ លោក ឈិត សាវី
កែសម្រួល ៖ លោក លីវ សាន្ត
