ប្រជាពលរដ្ឋប្រមាណជិត ៥០គ្រួសារ តំណាងឲ្យប្រជាពលរដ្ឋប្រមាណ២០០គ្រួសារ រស់នៅក្នុងភូមិអារញ្ញ សង្កាត់សៀមរាប ក្រុងសៀមរាប កាលពីរសៀលថ្ងៃទី១២ ខែកុម្ភៈ ឆ្នាំ២០២៤នេះ បានប្រមូលផ្ដុំគ្នា នៅខាងមុខសាលាសង្កាត់សៀមរាប ដើម្បីស្នើសុំផ្លាស់ប្ដូរលោក មួង មាន មេភូមិអារញ្ញ ដោយពួកគាត់បានលើកឡើងថា មេភូមិរូបនេះ ពុំបានយកចិត្តទុកដាក់ ពីសុខទុក្ខរបស់ប្រជាពលរដ្ឋនៅក្នុងមូលដ្ឋាន។
ការស្នើសុំផ្លាស់ប្ដូរលោក មេភូមិអារញ្ញនេះ តំណាងប្រជាពលរដ្ឋបញ្ជាក់ថា រយៈពេលកន្លងមកនេះ ក្នុងមូលដ្ឋានរបស់ពួកគាត់ ពុំមានការរីកចម្រើនអ្វីទាល់តែសោះ បើប្រៀបធៀបទៅនឹងបណ្ដាភូមិផ្សេងៗទៀតក្នុងសង្កាត់សៀមរាប។ ចំពោះការលើកកម្ពស់ជីវភាព ដូចជាការផ្ដល់បណ្ណក្រីក្រជូនប្រជាពលរដ្ឋមានភាពមិនប្រក្រតី ដោយសារតែមានប្រជាជនខ្លះមានជីវភាពខ្វះខាត ជាស្ត្រីមេម៉ាយ មានកូនក្នុងបន្ទុកច្រើន និងមានជំងឺប្រជាកាយទៀត តែពួកគាត់មិនបានទទួលបានបណ្ណក្រីក្រឡើយ តែបែរជាអ្នកខ្លះមានជីវភាពធូរធារទទួលបានទៅវិញ។
ដោយឡែក លោក មួង មាន បំភ្លឺថា នៅឆ្នាំ២០២២ មានបានប្អូនមួយចំនួនបានស្នើសុំបណ្ណហានិភ័យ និងខ្លះទៀតសុំបណ្ណក្រីក្រ ដោយលោកបានធ្វើការចុះបញ្ជី ដើម្បីត្រៀមធ្វើបណ្ណហានិភ័យ និង បណ្ណក្រីក្រ ជូនពួកគាត់នៅពេលក្រោយ។ ចំពោះការអភិវឌ្ឍក្នុងមូលដ្ឋាន លោកទទួលសំណើ និងចូលរួមជានិច្ច ពុំមានការរាំងស្ទះ ដូចការលើកឡើងនោះទេ។
ជុំវិញការលើកឡើង និងស្នើសុំរបស់ប្រជាពលរដ្ឋទាំង២០០គ្រួសារ លោក ម៉ៃ សាម៉េត ចៅសង្កាត់សៀមរាប បានទទួលយកសំណើ ប៉ុន្តែលោកបានស្នើដល់ប្រជាពលរដ្ឋ រៀបចំឯកសារឱ្យមានភាពច្បាស់លាស់ឡើងវិញ ដោយក្នុងសំណើមានស្នាមមេដៃតែ ១២៣នាក់ រីឯស្នាមមេដៃមួយចំនួន ជាស្នាមមេដៃថតចម្លង ស្នាមមេដៃមួយចំនួន មើលក្រយ៉ៅដៃមិនច្បាស់។ ដោយឡែក ចំពោះនីតិវិធី ក្នុងការផ្លាស់ប្ដូរសមាសភាពមេភូមិ គឺតម្រូវឱ្យក្រុមប្រឹក្សាតំណាងឲ្យប្រជាពលរដ្ធទូទាំងសង្កាត់ ធ្វើការសម្រេចដោយធ្វើការបោះឆ្នោតសម្ងាត់។
ពាក់ព័ន្ធនឹងការផ្ដល់បណ្ណក្រីក្រជូនប្រជាពលរដ្ឋ លោកចៅសង្កាត់ បំភ្លឺថា ក្រុមការងារបានអនុវត្ត កាលពីមុនពេលរីករាលដាលនៃជំងឺកូវីដ-១៩ ដោយកំណត់យកទៅតាមប្រជាពលរដ្ឋ ដែលមានជីវភាពខ្វះខាតជាក់ស្ដែង តាមរយៈក្រុមការងារសង្កាត់ ជាអ្នកចុះសម្ភាសន៍ ជាមួយអនុភូមិ ដោយមានការថតនូវសម្ភារៈសំខាន់នៅតាមផ្ទះប្រជាពលរដ្ឋនីមួយៗ។ លុះដល់ឆ្នាំ២០២៣ ក្រុមការងារក៏បានធ្វើការជំរឿនឡើងវិញ ចំពោះអ្នកដែលមានបណ្ណក្រីក្រ ដែលបានផ្ដល់ជុនមុនវិបត្តិកូវីដ ដើម្បីដឹងពីស្ថានភាពរបស់ប្រជាពលរដ្ឋ និងបញ្ជូនទៅកាន់ក្រសួងផែនការពិនិត្យឡើងវិញ។ ការផ្ដល់បណ្ណក្រីក្រនេះដែរ អាជ្ញាធរសង្កាត់ និងភូមិ ពុំមែនជាអ្នកសម្រេចផ្ដល់ជូនបងប្អូនប្រជាពលរដ្ឋនោះទេ ដោយគ្រាន់តែជាភាគីសហការជាមួយក្រុមការងារពាក់ព័ន្ធចុះធ្វើការសម្ភាសន៍ និងបញ្ជូនរបាយការណ៍ទៅក្រសួងផែនការតែប៉ុណ្ណោះ។
អត្ថបទ និងរូបភាព ៖ អ៊ុន ណារាជ្យ
កែសម្រួល ៖ សេង ផល្លី
