នៅថ្ងៃទី១៣ ខែកុម្ភៈ ឆ្នាំ២០២៤ មន្ទីររៀបចំដែនដីនគរូបនីយកម្ម សំណង និងសុរិយោដីខេត្តសៀមរាប សហការជាមួយរដ្ឋបាលស្រុកជីក្រែង បានប្រកាសបិទផ្សាយជាសាធារណៈនូវឯកសារនៃការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធជូនប្រជាពលរដ្ឋមកពីឃុំចំនួន៧ ក្នុងស្រុកជីក្រែង ខេត្តសៀមរាប ដើម្បីធ្វើការពិនិត្យ និងកែតម្រូវ។
លោក ស៊ុន សុជាតិ អនុមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានបញ្ជាក់ថា ការចុះបញ្ជីដីធ្លីមានលក្ខណៈជាប្រព័ន្ធនាពេលនេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានរៀបចំបិទផ្សាយជាសាធារណៈ នូវឯកសារនៃការវិនិច្ឆ័យ សម្រាប់បងប្អូនប្រជាពលរដ្ឋទាំងអស់ជាម្ចាស់ដី ឬ/និងអ្នកពាក់ព័ន្ធ ធ្វើការពិនិត្យផ្ទៀងផ្ទាត់ មើលទីតាំងដីនិងរូបរាងដីនៅលើប្លង់សុរិយោដី និងត្រូវពិនិត្យមើល ឈ្មោះ សាវតា ទំហំដី និងប្រភេទទ្រព្យ នៅក្នុងបញ្ជីឈ្មោះម្ចាស់ដី ព្រោះនេះគឺជាឱកាសចុងក្រោយសម្រាប់ម្ចាស់ដី ឬនិងអ្នកពាក់ព័ន្ធទាំងអស់មានសិទ្ធិធ្វើការកែ តម្រូវ ឬជំទាស់តវ៉ាបាន ក្នុងករណីដែលពិនិត្យមើលទៅឃើញថា មានកំហុសឆ្គង ហើយការបិទផ្សាយជាសាធារណៈ មានរយៈ ១៥ថ្ងៃ ដោយគិតចាប់ពីថ្ងៃទី១៣-២៧ ខែកុម្ភៈ ឆ្នាំ ២០២៤ ស្ថិតក្នុងបរិវេណវត្តព្រះឥន្ទឧស្សាហ៍ ហៅវត្តជីក្រែង។
លោកបន្តថា ការចុះបញ្ជីដីធ្លីមានលក្ខណៈជាប្រព័ន្ធសំរាប់ខេត្តសៀមរាប មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានធ្វើការបិទផ្សាយ និងចេញប័ណ្ណរួចកន្លងមក៖ ភូមិពោធ៍សេរី ឃុំកំពងក្តី បានធ្វើការបិទផ្សាយ និងចេញប័ណ្ណរួចចំនួន ៩០៧ក្បាលដី។ ឃុំកំពង់ក្តី បានធ្វើការបញ្ចប់ការងារវាស់វែង ប្រមូលទិន្នន័យ និងបានរៀបចំការបិទផ្សាយជាសាធារណនូវឯកសារនៃការវិនិច្ឆ័យលើភូមិចំនួន ០៧ភូមិ គឺភូមិរំលោង, ភូមិកំពង់ក្តី១, ភូមិកំពង់ក្ដី២, ភូមិពន្លឺព្រះផុស, ភូមិ សង្កែមានជ័យ, ភូមិតាពៀម, និងភូមិត្រពាំងជ្រៃ និងគ្រោងធ្វើការចែកវិញ្ញាបនបត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិ)។ ឃុំកំពង់ក្តី បានធ្វើការប្រកាសតំបន់សម្រាប់ធ្វើការវិនិច្ឆ័យចំនួន ០៨ ភូមិបន្ថែមទៀត គឺភូមិប្រាសាទ ភូមិត្រាចថ្មី ភូមិអង្សងពង ភូមិច្រាំងខ្ពស់ ភូមិចំបក់ធំ ភូមិស្លែង ភូមិសាលា និងភូមិរកា និងបានកំពុងធ្វើការអនុវត្តការងារ ចុះបញ្ជីដីធ្លីមានលក្ខណៈជាប្រព័ន្ធលើភូមិចំនួន ០៨ គឺភូមិប្រាសាទ បញ្ចប់ការងារវាស់វែងក្បាលដីចំនួន ៦២៦ ក្បាលដី, ភូមិត្រាចថ្មី បញ្ចប់ការងារវាស់វែងក្បាលដីចំនួន ៨៧៧ក្បាលដី, ភូមិអង្សងពង បញ្ចប់ការងារវាស់វែង ក្បាលដីចំនួន ៦៣៥ក្បាលដី, ភូមិច្រាំងខ្ពស់ បញ្ចប់ការងារវាស់វែងក្បាលដីចំនួន ៩៣២ក្បាលដី, ភូមិចំបក់ធំ បញ្ចប់ការងារវាស់វែងក្បាលដីចំនួន ៦១៧ក្បាលដី, ភូមិស្លែង កំពុងវាស់វែងបានក្បាលដីចំនួន ៣២៨ក្បាលដី,ភូមិសាលា បញ្ចប់ការងារវាស់វែងក្បាលដីចំនួន ៣៥៦ក្បាលដី, និងភូមិរការ កំពុងបន្តរការងារវាស់វែងបាន ក្បាលដីចំនួន ២៥០ក្បាលដីផងដែរ។
អភិបាលរងស្រុកជីក្រែង លោក ធូ ចន្ថុល មានប្រសាសន៍ថា ការបិទផ្សាយជាសាធារណៈនូវឯកសារនៃការវិនិច្ឆ័យនេះ មានរយៈពេល ១៥ថ្ងៃនេះ សម្រាប់ឱ្យបងប្អូនប្រជាពលរដ្ឋជាម្ចាស់ដី ឬនិងអ្នកកាន់កាប់ដី ព្រមទាំងស្ថាប័ន និងអង្គភាពពាក់ព័ន្ធទាំងអស់ ចូលរួមពិនិត្យផ្ទៀងផ្ទាត់មើលទិន្នន័យនេះឱ្យបានគ្រប់ៗគ្នា ដើម្បីធានាបាននូវភាពសុក្រឹត្យត្រឹមត្រូវ ក្នុងការចេញវិញ្ញាបនប័ត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិ)ផងដែរ។ លោកសង្ឃឹមនិងជឿជាក់ថា អ្នកដែលមានការពាក់ព័ន្ធទាំងអស់នឹងអញ្ជើញមកចូលរួមពិនិត្យមើលទិន្នន័យដែលបានបិទផ្សាយនេះ ដូចនៅលើបញ្ជីឈ្មោះម្ចាស់ដី ត្រូវពិនិត្យផ្ទៀងផ្ទាត់ឈ្មោះ សាវតា ទំហំដី ប្រភេទទ្រព្យ និងនៅលើប្លង់សុរិយោដី ត្រូវពិនិត្យមើល ទីតាំងដី រូបរាងដី ព្រោះនេះគឺជាឱកាសចុងក្រោយហើយដែលបងប្អូន មីងមា និងអ្នកដែលមានការពាក់ព័ន្ធទាំងអស់មានសិទ្ធិធ្វើការកែតំរូវ ឬជំទាស់តវ៉ាបានក្នុងករណីដែលពិនិត្យមើលទៅឃើញថា មានកំហុសឆ្គងនោះ អាចមកជួបគណៈកម្មការរដ្ឋបាលបាន៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ