ក្រុមការងាររួមនឹងកុមារជាច្រើននាក់មកពីអង្គការផ្សេងៗ នៃគម្រោងតុក្កតាយក្ស កំពុងមមាញឹករៀបចំតម្លើងជារូបតុក្កតាសត្វដាយណូស័រ ត្រៀមហែក្បួនដ៏ធំនៅក្នុងក្រុងសៀមរាប នាចុងខែកុម្ភៈនេះ ដើម្បីទាក់ទាញអ្នកទេសចរ និងដើម្បីបង្ហាញពីការច្ឆៃប្រឌិតរបស់កុមារកម្ពុជា។
បើតាមលោក អ៊ុន សាវ៉ាន់ តំណាងគម្រោងតុកតាយក្ស នៅថ្ងៃទី១៥ ខែកុម្ភៈនេះ បានឱ្យដឹងថា ការដង្ហែរក្បួនតុក្កតាយក្សនៅឆ្នាំ២០២៤នេះ មានចំនួន៩តុក្កតា ជារូបក្រុមប្រភេទសត្វដាយណូស័រ ដែលមានទំហំធំៗ រហូតដល់ប្រវែង១៥ ទៅ២០ម៉ែត្រ និងកំពស់រហូតដល់១០ម៉ែត្រ ដែលកំពុងតំឡើងដោយក្រុមកុមារប្រមាណ ៦៥០នាក់ មកពីសាលារដ្ឋ ឯកជន និងអង្គការក្រៅរដ្ឋាភិបាលចំនួន១៩ ។
លោក អ៊ុន សាវ៉ាន់ បានឲ្យដឹងទៀតថា ការយកប្រភេទសត្វដាយណូស័ររចនាជាតុក្កតាយក្សនេះ ចង់បង្ហាញសាធារណៈជនឱ្យបានយល់ដឹងថា សត្វដាយណូស័រ ជាមាតាបីតាសត្វដែលមានអាយុកាលរាប់លានឆ្នាំមកហើយ ដែលមានរូបរាងដូចសត្វនាពេលបច្ចុប្បន្ននេះ។ គម្រោងតុក្កតាយក្សនេះ នឹងដង្ហែរក្បួនដ៍ធំបំផុតនៅតំបន់អាស៊ី ដែលធ្វើឡើងនៅល្ងាចថ្ងៃទី២៤ ខែកុម្ភៈ ឆ្នាំ២០២៤នេះ ដើម្បីទាក់ទាញភ្ញៀវទេសចរជាតិ និងអន្ដរជាតិ ដោយមានអ្នកចូលរួមជាង១ពាន់នាក់ ក្នុងនោះមានសិស្សានុសិស្សប្រមាណ ៧០០នាក់ ជាពិសេសចង់បង្ហាញពីការច្ឆៃរូប សូន្យរូប តម្លើងរូបតុក្កតាយក្ខ ឬការអប់រំរបស់កុមារមានការលំបាកប៉ុណ្ណា។
លោកបន្តថា គម្រោងតុក្កតាយក្សនេះ នឹងជួយលើកស្ទួយសេដ្ឋកិច្ចប្រជាពលរដ្ឋ នឹងមានការទាក់ទាញអ្នកទេសចរផងដែរ ដូចនេះសូមអំពាវនាវដល់ភ្ញៀទេសចរជាតិនិងអន្ដរ សាធារណៈជនជួយគាំទ្រទាំងថវិកាតាមលទ្ធភាព ដើម្បីលើកទឹកចិត្ដ និងកម្លាំងដល់កុមារទាំងអស់ដែលបានចូលរួម៕
អត្ថបទ និងរូបភាព៖ លោក បូ សាវី
កែសម្រួល៖ លោក លីវ សាន្ត
