ប្រជាពលរដ្ឋដែលរស់នៅក្នុងតំបន់ធម្មជាតិរុនតាឯក បានលើកឡើងថា ការបើកដំណើរការរថយន្តក្រុងដឹកអ្នកដំណើរមិនគិតថ្លៃរបស់រដ្ឋបាលខេត្តសៀមរាប ពីក្រុងរុនតាឯកតេជោសែន-ក្រុងសៀមរាប ពិតជាបានជួយសម្រាលការចំណាយប្រចាំថ្ងៃរបស់ពួកគាត់បានច្រើន និងសូមអរគុណដល់រដ្ឋបាលខេត្ត ជាពិសេសប្រមុខរាជរដ្ឋាភិបាល ដែលបានផ្ដល់សេវាកម្មនេះដល់ពួកគាត់ សម្ដេចហ៊ាននិយាយ ហើយធ្វើមែន។
លោកស្រី ម៉ែន ម៉ៃណាស់ រស់នៅក្នុងភូមិធម្មជាតិរុនតាឯក នៅរសៀលថ្ងៃទី១៥ខែកុម្ភៈ ឆ្នាំ២០២៤នេះ បានលើកឡើងថា សម្រាប់ការធ្វើដំណើរទាំងទៅ និងមកពីសំណាក់រថយន្តក្រុងមិនគិតថ្លៃនេះ ពិតជាល្អសម្រាប់លោកស្រី ព្រោះលោកស្រីធ្វើការនៅក្រុងសៀមរាប ដូចនេះពេលមានសេវាធ្វើដំណើរដោយមិនគិតថ្លៃបែបនេះ ពិតជាជួយកាត់បន្ថយការចំណាយប្រចាំថ្ងៃបានច្រើនសម្រាប់ពលរដ្ឋ។ លោកស្រី ក៏សូមថ្លៃអំណរគុណដល់ថ្នាក់ដឹកនាំ ដែលបានសន្យាជាមួយប្រជាពលរដ្ឋហើយ ថ្នាក់ដឹកនាំបានធ្វើមែន ធ្វើឲ្យប្រជាពលរដ្ឋមានទំនុកចិត្តកាន់តែខ្លាំង។ ជាមួយនោះលោកស្រីក៏បានសំណូមពរ សូមឲ្យមានពេលវរលាចេញដំណើរបន្ថែមទៀត ជាពិសេសពេលយប់ និងជិតភ្លឺ ដើម្បីងាយស្រួលដល់អ្នកដែលរស់នៅតំបន់រុនតាឯក ហើយប្រកបរបបនៅក្រុងសៀមរាប ងាយស្រួលទទួលសេវា និងចំណេញកាន់តែច្រើន។
ពលរដ្ឋមួយរូបទៀត រស់នៅក្នុងតំបន់រុនតាឯកដូចគ្នា កញ្ញា ណារិទ្ធ បានបង្ហាញពីអារម្មណ៍រីករាយក្នុងការទទួលសេវានៃការធ្វើសំណើរមិនគិតថ្លៃនេះ ពិរាជរដ្ឋាភិបាល ក៏ដូចជារដ្ឋបាលខេត្តសៀមរាប ធ្វើវាបានជួយកាត់បន្ថយការចំណាយក្នុងការធ្វើដំណើរបានច្រើនសម្រាប់គាត់នៅពេលធ្វើដំណើរមកក្រុងសៀមរាប។ សម្រាប់ការធ្ចើដំណើរនេះដែរ តៃកុងឡានពួកគាត់ក៏មានការយកចិត្តទុកដាក់ខ្ពស់ក្នុងការបើកបរ ហើយនៅក្នុងរថយន្តគឺមានផាសសុខភាព រថយន្តទូលាយងាយស្រួលដល់ប្រជាពលរដ្ឋដាក់អីវ៉ាន់ទៀតផង។ កញ្ញាក៏បានថ្លៃអំណរគុណដល់អាជ្ញាធរខេត្ត ជាពិសេសប្រមុខរាជរដ្ឋាភិបាល សម្ដេចតេជោ និងសម្ដេចធបតី ដែលបានយកចិត្តទុកដាក់ពីសុខទុក្ខរបស់ប្រជាពលរដ្ឋ ជាពិសេសការផ្ដល់ជូននូវសេវាធ្វើដំណើរមិនគិតថ្លៃនេះ គឺបានជួយឲ្យប្រជាពលរដ្ឋចំណេញថវិកាស្ទើតែ១០០ភាគរយ ពីការធ្វើដំណើរនេះ។
សូមជម្រាបថា រាជរដ្ឋាភិបាលកម្ពុជា បានផ្តល់រថយន្តក្រុង ចំនួន៥០គ្រឿង ដល់រដ្ឋបាលខេត្តសៀមរាប សម្រាប់ដឹកអ្នកដំណើរទៅមកដោយឥតគិតថ្លៃរវាងក្រុងសៀមរាប និងក្រុងរុនតាឯកតេជោសែន ហើយបន្ទាប់ទៀត រដ្ឋបាលខេត្តសៀមរាប ក៏គ្រោងនឹងពង្រីកសេវាកម្មនេះ ទៅកាន់តំបន់ពាក់ស្នែង និងក្នុងក្រុងសៀមរាបផងដែរ។ ការផ្តល់ជូននេះ មិនត្រឹមជាការផ្តល់ជូនប្រជាពលរដ្ឋនៅក្រុងរុនតាឯកប៉ុណ្ណោះទេ សម្រាប់បងប្អូនប្រជាពលរដ្ឋដែលមានបំណងធ្វើដំណើរតាមខ្សែរត់ ដែលរដ្ឋបាលខេត្តបានកំណត់ក៏ទទួលបានការធ្វើដំណើរដោយឥតគិតថ្លៃផងដែរ៕
អត្ថបទ៖ លោក អ៊ុន ណារាជ្យ
រូបភាព៖ លោក យូ វង្ស
