ព្រះគ្រូចៅអធិការ អាចារ្យ គណៈកម្មការ អាជ្ញាធរគ្រប់លំដាប់ថ្នាក់ ព្រមទាំងពុទ្ធបរិស័ទចំណុះជើងវត្តវត្តប្រាសាទគោកចក ក្នុងសង្កាត់គោកចក ក្រុងសៀមរាប បានមូលមតិគ្នាប្រារព្ធធ្វើពិធីបុណ្យទេសនាមហាវេស្សន្តរជាតក ទៅតាមប្រពៃណីព្រះពុទ្ធ សាសនា និងរាប់បាត្រព្រះសង្ឃ១០៨អង្គ ដែលពិធីបុណ្យនេះប្រារព្ភទៅរយៈពេល៣ថ្ងៃ ចាប់ពីថ្ងៃទី១៧-១៩ ខែកុម្ភៈ ឆ្នាំ២០២៤ ដើម្បីឧទ្ទិសកុសលផលបុណ្យជូនដល់ញាតិកាគ្រប់សន្តានដែលបានចែកឋានទៅកាន់បរលោក។
ព្រះចៅអធិការវត្តប្រាសាទគោកចក ព្រះគ្រូវិចិត្រវង្សា ហែម គឹមសាន មានសង្ឃដីកាថា ការប្រារព្ធធ្វើបុណ្យទេសនាមហាវេស្សន្តរជាតក និងរាប់បាត្រប្រគេនព្រះសង្ឃ ១០៨អង្គនាពេលនេះ គឺដើម្បីបានបច្ច័យយកមកសង់ថ្លៃគ្រឿងសំណង់នៃការជួសជុលធ្វើឈាបនដ្ឋាន រួមទាំងក្រាលការ៉ូឡានៅបរិវេលាកន្លែងបូជាសពបន្តទៀតដែលមានចំនួន ១.៥០០ម៉ែត្រការ៉េ ដែលត្រូវចំណាយបច្ច័យអស់ ៩.០០០ ដុល្លារផងដែរ។
ព័ត៌មានជាតិ ថ្មីៗ
ព្រះគ្រូវិចិត្រវង្សា មានសង្ឃដីកាបញ្ជាក់ថា ពិធីបុណ្យទេសនាមហាវេស្សន្តរជាតក គឺបុណ្យប្រពៃណីបែបព្រះពុទ្ធសាសនា ហើយគឺជាប្រវត្តិរឿងសន្សំកុសលជាតិចុងក្រោយបង្អស់របស់ព្រះវេស្សន្តរ ជាព្រះពោធិសត្វដែលបានបំពេញបារមីដ៏មហស្ចារ្យ ពោល គឺទានបារមី ដើម្បីបានត្រាស់ជាព្រះសម្មាសម្ពុទ្ធក្នុងជាតិមុខ។ ជាតក គឺមានផ្ទៃរឿងវែងអន្លាយរហូតដល់១៣កណ្ឌ រៀបរាប់ដំណើរជីវិត និងការបំពេញទានរបស់ព្រះវេស្សន្តររាប់តាំងពីដំរីបច្ច័យនាគបរិច្ចាគសត្តសតកមហាទាន ប្រទានសេះ រាជរថ រហូតទីបំផុតបានដាក់ទានជាលី និងគ្រឹស្នាជាបុត្រ ព្រមទាំងប្រកាសនឹងបរិច្ចាគនាងមទ្រី និងខ្លួនព្រះអង្គថ្វាយជាទានផង។ ចិត្តសន្ធាប់ពេញទានដ៏ជ្រះថ្លារបស់ព្រះអង្គ មានតាំងពីគង់នៅនគរស្រីពិរាស្ត្ររហូតក្នុងដំណើរតាមផ្លូវទៅគង់នៅក្នុងព្រៃភ្នំគិរីវង្គត។ បើធៀបនឹងជាតកផ្សេងទៀតក្នុងបណ្តាទសជាតក ឬជាតកទាំង ១០ មហាវេស្សន្តរជាតក ហាក់ដូចជាពេញនិយមក្រៃលែងក្នុងសង្គមពុទ្ធសាសនាតាំងពីដើមរៀងមក។
ព្រះអង្គបន្តថា ចំពោះពិធីរាប់បាត្រព្រះសង្ឃ ១០៨នេះ គឺមានគោលបំណងដឹកនាំបងប្អូនប្រជាពុទ្ឋបរិស័ទ ឧទិ្ទសថ្វាយព្រះរាជមហាកុសលដល់ព្រះមហាក្សត្រគ្រប់ជំនាន់ និងបុព្វបុរសខ្មែរយើង ដែលបានធ្វើការកសាងប្រាង្គប្រាសាទ ទុកជាមរតកដ៏មានតម្លៃដ៏មហាសាលសម្រាប់កូនចៅជំនាន់ក្រោយ ហើយដែលបានក្លាយជាសម្បត្តិបេតិកភណ្ឌពិភពលោករបស់មនុស្សជាតិ។ ម៉្យាងទៀតក៏ឧទ្ទិសផលបុណ្យកុលស ជូនដល់ដួងវិញ្ញាណខ័ន្ឋ ដល់បុព្វការីជន ញាតិមិត្ត ដែលបានចែកឋាន រំលាយកាយទៅលោកខាងមុខ សូមឲ្យរួចចាកផុតពីអបាយភូមិទាំងឡាយ បានទៅកាន់សុគតិភពថ្មី កុំបីឃ្លាងឃ្លាតឡើយ៕
អត្ថបទ និងរូបភាព៖ សហការី
កែសម្រួល៖ លោក អ៊ុន ណារាជ្យ
