ថ្លែងក្នុងឱកាសបើកសិក្ខាសាលាផ្សព្វផ្សាយលទ្ធផល នៃវេទិការាជរដ្ឋាភិបាល-ផ្នែកឯកជនលើកទី១៩ និងការពង្រឹងគុណភាពសេវាកម្មទេសចរណ៍ នៅខេត្តសៀមរាប នាថ្ងៃទី១៩ ខែកុម្ភៈ ឆ្នាំ២០២៤ ឯកឧត្តម សេង ម៉េងហុង រដ្ឋលេខាធិការ ក្រសួងទេសចរណ៍ បានជំរុញប្រតិបត្តិករទេសចរណ៍ឱ្យយកចិត្តទុកដាក់ពង្រឹងគុណភាពសេវាកម្មទេសចរណ៍ឱ្យបានមានស្តង់ដា និងឧត្តមានុវត្តខ្ពស់ ស័ក្កសមជាគោលដៅទេសចរណ៍អន្តរជាតិដ៏ទាក់ទាញ, ប្រកបដោយគុណភាព, ផ្តល់នូវធនធានទេសចរណ៍សម្បូរបែប, មានការទទួលស្គាល់ជាលក្ខណៈសកលលើការអភិរក្ស និងកិច្ចគំាពារសម្បត្តិបេតិកភណ្ឌវប្បធម៌ និងបរិស្ថានធម្មជាតិ, និងមានភ្ញៀវទេសចរមកកម្សាន្តកាន់តែច្រើនបន្ថែមទៀត។
ឯកឧត្តមរដ្ឋលេខាធិការ បានបង្ហាញថា សិក្ខាសាលានាពេលនេះដែរ រៀបចំទ្បើងក្នុងគោលបំណងដើម្បីពង្រឹងគុណភាពសេវាកម្មទេសចរណ៍ឱ្យឆ្លើយតបទៅនឹងការវិវត្ដនាពេលបច្ចុប្បន្ន និងដើម្បីផ្សព្វផ្សាយឱ្យកាន់តែទូលំទូលាយ នូវវិធានការគន្លឹះមុតស្រួចជាកញ្ចប់របស់រាជរដ្ឋាភិបាល ក្នុងការជួយស្តារស្ថានភាពទេសចរណ៍ខេត្តសៀមរាប។ ជាពិសេសតាមរយៈការផ្តើមដាក់ចេញនូវយុទ្ធនាការ “ទស្សនាសៀមរាប ២០២៤” ដោយផ្សារភ្ជាប់ជាមួយកញ្ចប់វិធានការស្តារ និងលើកស្ទួយវិស័យទេសចរណ៍ខេត្តសៀមរាបដូចជា៖ វិធានការសម្រួលការធ្វើដំណើរតាមច្រកទ្វារអន្តរជាតិផ្លូវគោក និងផ្លូវអាកាស, កញ្ចប់វិធានការលើកទឹកចិត្តផ្នែកពន្ធដារ, កញ្ចប់កម្មវិធីហិរញ្ញប្បទានក្នុងអត្រាការប្រាក់សមរម្យ, ការបញ្ចុះថ្លៃអគ្គិសនីសម្រាប់វិស័យទេសចរណ៍ និងវិធានការផ្សេងទៀតសម្រាប់ជួយខេត្តសៀមរាបក្នុងឆ្នាំ២០២៤ នេះ។
ឯកឧត្តមបានបន្ថែមថា ក្រោយការរៀបចំប្រកបដោយជោគជ័យ ពិធីប្រកាសបើកជាផ្លូវការ “ឆ្នាំនៃការផ្លាស់ប្ដូរប្រជាជននិងប្រជាជនកម្ពុជា-ចិន ២០២៤” កាលពីថ្ងៃទី១៣ ខែមករា ឆ្នាំ២០២៤ កន្លងមកថ្មីៗនេះ, ខេត្តសៀមរាបនឹងទទួលធ្វើជាម្ចាស់ផ្ទះក្នុងការរៀបចំពិធីបុណ្យទន្លេលើកទី៨ រយៈពេល០២ថ្ងៃ ចាប់ពីថ្ងៃទី១៦-១៧ ខែមីនា ឆ្នាំ២០២៤ ក្រោមប្រធានបទ “ទន្លេដើម្បីសន្តិភាព និងការអភិវឌ្ឍ” ដោយពិធីបើកផ្លូវការនឹងប្រារព្ធឡើងក្រោមអធិបតីភាពដ៏ខ្ពង់ខ្ពស់របស់ សម្តេចមហាបរវធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវ។
លោក ង៉ូវ សេងកាក់ អភិបាលរងខេត្តសៀមរាប បានមានប្រសាសន៍ថា ស័យឯកជនពិតជាបានរួមចំណែកយ៉ាងធំធេងជាមួយរាជរដ្ឋាភិបាលកម្ពុជា ក្នុងការអភិវឌ្ឍប្រទេស ឱ្យមានការរីកចម្រើនលើគ្រប់វិស័យ។ បច្ចុប្បន្ននេះ អាជ្ញាធរខេត្តកំពុងតែផ្សព្វផ្សាយតំបន់ទេសចរណ៍ក្រៅពីប្រាសាទ ដើម្បីឱ្យភ្ញៀវទេសចរបានដឹងទាក់ទាញភ្ញៀវទេសចរមកកម្សាន្តនៅខេត្តសៀមឱ្យបានច្រើនដូចមុនវិញ។ដូចនេះ វិស័យឯកជនត្រូវបន្តរួមគ្នាពង្រឹងគុណភាពសេវាកម្មទេសចរណ៍ឱ្យបានមានស្តង់ដា ដើម្បីស្ថានភាពទេសចរណ៍ខេត្តសៀមរាបឡើងវិញ៕
អត្ថបទ និងរូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ
