យោងតាមរបាយការណ៍របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត បានឲ្យដឹងថា នៅទូទាំងប្រទេសកម្ពុជាក្នុងឆ្នាំ២០២៣ ករណីជំងឺគ្រុនចាញ់មានការថយចុះរហូត៦៦ភាគរយ បើធៀបទៅនឹងឆ្នាំ២០២២ ខណៈមន្ត្រីជាន់ខ្ពស់ក្រសួងសុខាភិបាលជំរុញដល់មន្ត្រីក្រោមឱវាទពង្រឹងសមត្ថភាពបន្ថែមទៀត ដើម្បីសម្រេចបានគោលដៅឆ្នាំ២០២៥ កម្ពុជាគ្មានជំងឺគ្រុនចាញ់។
ថ្លែងក្នុងពិធីបើកសន្និបាតបូកសរុបការងារឆ្នាំ២០២៣ និងទិសដៅការងារឆ្នាំ២០២៤ របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត នៅក្រុងសៀមរាប នាថ្ងៃទី២០ ខែកុម្ភៈ ឆ្នាំ២០២៤នេះ លោកបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត បានឲ្យដឹងថា ករណីជំងឺគ្រុនចាញ់ក្នុងឆ្នាំ២០២៣ មានចំនួន១.៣៨៤ករណី មានការថយចុះ ៦៦% បើប្រៀបធៀបឆ្នាំ២០២២។ ក្នុងនោះប្រភេទជំងឺគ្រុនចាញ់សន្ធំ (Plasmodium Falciparum) និងចំរុះមាន ៣ភាគរយ និងជំងឺគ្រុនចាញ់ប្រភេទលាប់ (P. Vivax) មាន ៩៥ភាគរយ។
លោកបណ្ឌិត ហ៊ុយ រ៉េកុល បានលើកឡើងថា ចំពោះរាល់លទ្ធផលការងារ និងសមិទ្ធិផលរបស់កម្មវិធីជាតិប្រយុទ្ធនឹងជំងឺគ្រុនចាញ់ កម្មវិធីជាតិប្រយុទ្ធនឹងជំងឺគ្រុនឈាម និងកម្មវិធីជាតិប្រយុទ្ធនឹងជំងឺដង្កូវព្រូន ដែលកំពុងទទួលបានដំណើរការអភិវឌ្ឍជោគជ័យជាបន្តបន្ទាប់ក្នុងយន្តការប្រតិបត្តិការកាន់តែរលូន ល្អប្រសើរ មានគុណភាព និងប្រសិទ្ធិភាពខ្ពស់ ដើម្បីឈានទៅធានាបានលើនិរន្តរភាពសកម្មភាពការងារវិនិយោគដែលមានគោលការណ៍ ប្រកាន់ខ្ជាប់នូវម្ចាស់ការ និងភាពជាអ្នកដឹកនាំរៀងៗខ្លួន ប្រកបដោយ ភក្តីភាព សាមគ្គីភាព តស៊ូអត់ធ្មត់ ហ្មត់ចត់ និងឆន្ទៈទទួលខុសត្រូវខ្ពស់។ ជាមួយនោះកម្មវិធីជាតិប្រយុទ្ធនឹងជំងឺគ្រុនចាញ់សម្រេចបានជោគជ័យនូវសូចនាករគន្លឹះ២ រួចជាស្រេចនៅឆ្នាំ២០១៥ ស្តីពីការទប់ស្កាត់ការរីករាលដាលភាពស៊ាំថ្នាំអាតេម៉ីសេនីនជាមួយមេរោគគ្រុនចាញ់ និងនៅឆ្នាំ២០១៨ បានបញ្ចប់ការស្លាប់ដោយជំងឺគ្រុនចាញ់ ដែលបានសម្រេចជោគជ័យ៣ឆ្នាំមុនគោលដៅគ្រោងឆ្នាំ២០២០។
ក្នុងឱកាសនោះដែរ ឯកឧត្តមវេជ្ជបណ្ឌិត ម៉ៅ តាន់អ៊ាង អនុរដ្ឋលេខាធិការក្រសួងសុខាភិបាល បានជំរុញដល់មន្ត្រីគ្រប់លំដាប់ថ្នាក់ត្រូវខិតខំពង្រឹងសមត្ថភាពបន្ថែមទៀត ស្របទៅនឹងគោលដៅកម្ពុជា ប្រយុទ្ឋនឹងជំងឺគ្រុនចាញ់ ដើម្បីឆ្ពោះទៅលុបបំបាត់ជំងឺនេះ និងជំងឺព្រូនស៊ីស្តូទាំងស្រុងនៅប្រទេសកម្ពុជានាឆ្នាំ២០២៥ ក៏ដូចជាការងារប្រយុទ្ឋនឹងជំងឺគ្រុនឈាម គ្រុនឈិក និងជំងឺដង្កូវព្រូនផងដែរ។ សកម្មភាព និងការចូលរួមចំណែកអនុវត្តទទួលខុសត្រូវពេញលេញទាំងនេះ នឹងនៅតែកើតមានជាបន្តបន្ទាប់សម្រាប់រាល់ការងារវិនិយោគប្រតិបត្តិការលើកម្មវិធីជាតិទាំងបី ក្នុងទិសដៅលុបបំបាត់ កាត់បន្ថយអត្រាឈឺ និងអត្រាស្លាប់ដោយជំងឺគ្រុនចាញ់ ជំងឺគ្រុនឈាម និងជំងឺដង្កូវព្រូន។ ពិសេសការឈានឆ្ពោះទៅគ្មានជំងឺគ្រុនចាញ់ និងគ្មានជំងឺស៊ីស្តូនាឆ្នាំ២០២៥ ដែលជាជ្រុងមួយនៃការចូលរួមចំនែកកាត់បន្ថយភាពក្រីក្ររបស់ប្រជាជន ដែលកំពុងរស់នៅយ៉ាងសប្បាយរីករាយក្នុងបរិបទសេរីភាព សាមគ្គីភាព សេចក្តីថ្លៃថ្នូ វឌ្ឍនភាព និងសន្តិភាពទូទាំងប្រទេស ក្រោមការដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្រ្តី៕
អត្ថបទ និងរូបភាព៖ លោក ជា ស្រស់, លោក យូ វង្ស
កែសម្រួល៖ លោក អ៊ុន ណារាជ្យ
