អគារសិក្សាចំនួន៣ខ្នង មាន៨បន្ទប់ រួមទាំងសមិទ្ធិផលជាច្រើនទៀត ដែលជាជំនួយរបស់សមាគមអន្តរជាតិ រ៉ូតារី ៣៦២០ តាមរយៈអង្គការមិត្ដកម្ពុជា ត្រូវបានបើកសម្ភោធដាក់ឱ្យប្រើប្រាស់ជាផ្លូវការ នៅថ្ងៃទី២០ ខែកុម្ភៈ ឆ្នាំ២០២៤នេះ ជូនដល់សាលាបឋមសិក្សាល្វា ឃុំមោង ស្រុកស្រីស្នំ ខេត្តសៀមរាប បន្ទាប់ពីសាងសងរួចរាល់ជាស្ថាបពរ។
លោក ផាក ហុងឆន់ តំណាងក្រុមសមាគមអន្ដរជាតិរ៉ូតារី ៣៦២០ បញ្ជាក់ថា ការផ្ដលល់អាគារសិក្សានេះ គឺដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងការលើកកម្ពស់វិស័យអប់រំនៅកម្ពុជា ជួយជម្រុញនិងលើកទឹកចិត្ដឱ្យកុមារចង់ទៅសាលារៀន ដែលពួកគាត់ជាទំពាំងស្នងឬស្សី ជាសរសរទ្រូងនៃប្រទេសជាតិ។អគារសិក្សានេះ មាន៣ខ្នង ស្មើនឹង៨បន្ទប់ និងសមិទ្ធផលជាច្រើនទៀត ដែលសម្ពោធដាក់ឲ្យប្រើប្រាស់នាពេលនេះ មានតម្លៃជាង១០ម៉ឺនដុល្លា។
លោកក៏បានសម្ដែងនូវក្ដីរីករាយ ដែលបានជួយអភិវឌ្ឍន៍វិស័យអប់រំនៅកម្ពុជា ជាពិសេសសាលារៀននៅជនបទដាច់ស្រយ៉ាល។ ហើយក្រុមសប្បុរសជននៃសមាគមន៍នេះ នឹងបន្តជួយដល់រោងបាយនៅក្នុងសាលារៀននេះមួយខ្នងបន្ថែមទៀត ព្រមទាំងសន្នយាគៀងគរសប្បុរសជន ជួយសាងសង់សាលារៀននៅជនបទនៃខេត្ដសៀមរាប ជាបន្ដបន្ទាប់ទៀត ក្នុងគោលដៅចង់ឱ្យកុមារតូចៗតំបន់នេះមានឱកាសបានចូលរៀនសូត្រដូចកុមារនៅទីប្រជុំជនដែរ។
លោក លី ប៊ុណ្ណា ប្រធានមន្ទីរអប់រំ យុវជន និងកីឡាខេត្ដសៀមរាប បានថ្លែងអំណរគុណ និងលើកទឹកចិត្ដដល់សប្បុរសជន បន្ដជួយលើកកម្ពស់វិស័យអប់រំនៅកម្ពុជាបន្ថែមទៀត ព្រោះវិស័យអប់រំមានតួនាទីយ៉ាងសំខាន់ ក្នុងការបណ្តុះបណ្តាលធនធានមនុស្ស សម្រាប់ធ្វើការអភិវឌ្ឍប្រទេសជាតិ។ ហើយដើម្បីឱ្យកុមារបានទទួលបានការបណ្តុះបណ្តាលគ្រប់ៗគ្នា រាជរដ្ឋាភិបាលបានខិតខំធ្វើការសាងសង់អគារបង្កើតឱ្យមានសាលារៀននៅគ្រប់មូលដ្ឋាន ដើម្បីបង្កភាពងាយស្រួលដល់កុមារតូចៗក្នុងការធ្វើដំណើរទៅរៀនសូត្រ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
