ក្នុងពិធីលៀងសាយភោជន៍អបអរសាទរពិធីបុណ្យចម្រើនព្រះជន្មាយុគម្រប់៦៣ យាងចូល ៦៤ព្រះវស្សា របស់ព្រះចៅ ណារូ ហ៊ីតុ ព្រះចៅអធិរាជនៃប្រទេសជប៉ុន នារាត្រីថ្ងៃទី២០ ខែកុម្ភៈ ឆ្នាំ២០២៤នេះ ឯកឧត្ដម អ៊ូអ៊ីណុ អាត់ហ្ស៊ូស៊ី ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជា បានប្តេជ្ញាយ៉ាងមុតមាំថា ក្នុងអណត្តិការទូតនៅកម្ពុជា ឯកឧត្តមនឹងខិតខំកសាងឲ្យទំនាក់ទំនងរវាងប្រទេសទាំង២ កម្ពុជា-ជប៉ុន ឲ្យកាន់តែមានភាពរឹងមាំ និងរួមគ្នាអភិវឌ្ឍន៍សង្គមមួយប្រកបដោយសន្តិភាព ទាំងក្នុងតំបន់ និងពិភពលោក។
ឯកឧត្ដម ឯកអគ្គរាជទូត បានរំលឹកថា នៅឆ្នាំ២០២៣ ជាឆ្នាំខួបទី៧០ នៃការបង្កើតទំនាក់ទំនងកាទូតរវាងប្រទេសកម្ពុជា និងជប៉ុន ដែលជាព្រឹត្តិការណ៍ដ៏សំខាន់មួយនៅក្នុងប្រវត្តិសាស្ត្រ នៃទំនាក់ទំនងកាទូតរបស់ប្រទេសទាំងពីរ ហើយអ្វីដែលគួរឱ្យកត់សម្គាល់នោះ គឺទំនាក់ទំនងទ្វេរភាគីនៃប្រទេសទាំងពីរត្រូវបានតម្លើងដល់កម្រិត ភាពជាដៃគូយុទ្ឋសាស្ត្រគ្រប់ជ្រុងជ្រោយ។ ជាមួយគ្នានោះក៏មានព្រឹត្តិការណ៍ជាច្រើនទៀតត្រូវបានរៀបចំឡើងពេញមួយឆ្នាំមុន។ នៅឆ្នាំនេះយើងនឹងចាប់យកយន្តការដែលបានបង្កើតកាលពីឆ្នាំ២០២៣ ដើម្បីពង្រឹងបន្ថែមទំនាក់ទំនងជប៉ុន-កម្ពុជា ដើម្បីសម្រេចឱ្យបាននូវបំណងនៃការអភិវឌ្ឍដោយទំនុកចិត្តនិងមិត្តភាព។ ជាមួយគ្នានេះ នៅឆ្នាំ២០២៤នេះ ប្រទេសជប៉ុន បានចាប់ផ្តើមជាមួយនឹងគ្រោះមហន្តរាយធម្មជាតិ ក៏ដូចជាគ្រោះថ្នាក់យន្តហោះបុកគ្នា ដែលព្រឹត្តិការណ៍នេះ បានធ្វើឲ្យព្រចៅអធិរាជជប៉ុន និងព្រះរាជនី មានទុក្ខកង្វល់ជាខ្លាំង។
ឯកឧត្ដម បានឲ្យដឹងថា ក្នុងនាមប្រទេសជាមិត្ត អង្គព្រះមហាក្សត្រកម្ពុជា សម្តេចព្រះបរមនាថនរោត្តម សីហមុនី និងប្រមុខរាជរដ្ឋាភិបាល សម្តេចធិបតី ហ៊ុន ម៉ាណែត និងប្រជាជនកម្ពុជា បានផ្ញើព្រះរាជសារផ្ញើសារចូលរួមរំលែកទុក្ខយ៉ាងច្រើន ដែលនេះបង្ហាញថា ទំនាក់ទំនងរវាងប្រទេសទាំងពីរពិតជាឈានដល់កម្រិតកំពូល និងមិនអាចកាត់ផ្តាច់បាន។
ក្នុងនាមអាជ្ញាធរខេត្ត លោក យុន លីនណេ អភិបាលរងខេត្តសៀមរាប បានថ្លែងនូវអំណរគុណដ៏ស្មោះប្រកបដោយមនោសញ្ចេតនាជាមួយ រាជរដ្ឋាភិបាល និងប្រជាជននៃប្រទេសជប៉ុន ដែលតែងតែបានជួយឧបត្ថម្ភគាំទ្រគ្រប់បែបយ៉ាងដល់ប្រជាជន និងរាជរដ្ឋាភិបាលកម្ពុជា តាមរយៈការអភិវឌ្ឍសេដ្ឋកិច្ច សង្គម និងសន្តិភាពនៅកម្ពុជា ក៏ដូចជាការរួមចំណែក វឌ្ឍនភាព នៃខេត្តសៀមរាប ប្រកបដោយផ្លែផ្កា និងកិច្ចសហប្រតិបត្តិការយ៉ាងសកម្ម និងស្និទស្នាលផង ដែរ។
លោក យុន លីណណេ មានប្រសាសន៍ថា ការរៀបចំពិធីលៀងសាយភោជន៍អបអរសាទរព្រះរាជពិធីចម្រើនព្រះជន្មព្រះករុណាព្រះចៅអធិរាជជប៉ុន នៅលើទឹកដីសៀមរាបនេះ គឺបានប្រព្រឹត្តិទៅជាលើកទី២ហើយ កាលពីឆ្នាំមុន និងឆ្នាំនេះ ដែលបានឆ្លុះបញ្ចាំង ពីការយកចិត្តទុកដាក់ខ្ពស់ពីស្ថានទូតជប៉ុន ប្រចាំព្រះរាជាណាចក្រកម្ពុជា ក៏ដូចជាការិយាល័យកុងស៊ុលជប៉ុន ប្រចាំខេត្តសៀមរាប ចំពោះទំនុកចិត្ត និងការផ្តល់កិត្តិយសសម្រាប់ ខេត្តសៀមរាប ក្នុងរូបភាពសហប្រតិបត្តិការ យ៉ាងល្អប្រសើររវាងការិយាល័យកុងស៊ុល និងរដ្ឋបាលខេត្តសៀមរាប៕
អត្ថបទ និងរូបភាព៖ លោក ជា ស្រស់, លោក យូ វង្ស
កែសម្រួល៖ លោក អ៊ុន ណារាជ្យ
