ការបង្រៀនហែលទឹកដល់កុមារមានពិការក្នុងក្រុងសៀមរាប ដែលមានរយៈពេល ៣ថ្ងៃ នឹងត្រូវបញ្ចប់នៅរសៀលនៅថ្ងៃទី២២ ខែកុម្ភៈនេះ។ តាមការឱ្យដឹងពីក្លឹបបង្រៀនហែលទឹក Blue Dolphin សិស្សដែលបានចូលរួមក្នុងវគ្គសិក្សានេះមានចំនួនសរុបចំនួន ៧៩នាក់ បានមកពីអង្គការគ្រួសារថ្មី ក្នុងខេត្តសៀមរាប និងភាគច្រើនជាសិស្ស គថ្លង់ និងពិការភ្នែក។
យោងតាមរបាយការណ៍របស់អង្គការសុខភាពពិភពលោក នៅក្នុងទិវាបង្ការហានិភ័យនៃគ្រោះមហន្តរាយ រៀបចំឡើងនៅពាក់កណ្ដាលឆ្នាំ២០២៣ អង្កេតឃើញថា នៅទូទាំងពិភពលោក អត្រាលង់ទឹកខ្ពស់បំផុតកើតឡើងលើក្រុមកុមារអាយុចាប់ពី ១-៤ ឆ្នាំ និងក្រុមបន្ទាប់ចាប់ពីអាយុពី ៥-៩ ឆ្នាំ។ ការបាត់បង់ចំនួនមនុស្ស និងសេដ្ឋកិច្ចដោយសារការលង់ទឹកនេះ គឺខ្ពស់មិនអាចទទួលយកបាន ខណៈករណីស្លាប់ ក្នុងឧបទ្ទវហេតុនេះ គឺអាចការពារបានទាំងស្រុង។
ស្របគ្នានេះ ការបង្រៀនពីវិធីជួយសង្គ្រោះខ្លួនឯង ឱ្យរួចផុតពីការលង់ទឹក លោក ឈួរ កុក អ្នកគ្រប់គ្រង ក្លឹបបង្រៀនហែលទឹក Blue Dolphin បង្ហាញថា គម្រោងនេះ ផ្ដោតសំខាន់ទៅលើកុមារមានជីវភាពខ្វះខាត ជាពិសេសកុមារមានពិការភាពនៅកម្ពុជានេះ។ គម្រោងនេះដែរ ត្រូវបានបង្កើតឡើងនៅឆ្នាំ២០១៧ ដែលផ្ដួចផ្ដើមឡើងដោយលោក ផៃ ផាយុ ដែលជាអតីតកីឡាករហែលទឹកជម្រើសជាតិថៃ។ គិតមកដល់ដើមឆ្នាំ២០២៤ គម្រោងបង្រៀនកុមារហែលទឹក ដោយមិនគិតថ្លៃនេះ បានទទួលកុមារប្រមាណជាង២០០០នាក់ហើយ។
លោក ឈួរ កុក បង្ហាញថា ក្នុងចំណោមខេត្តគោលដៅចំនួន ៣ របស់គម្រោង រួមមាន សៀមរាប ព្រះសីហនុ និងខេត្តកណ្ដាល លោកសង្កេតឃើញថា ខេត្តសៀមរាប មានករណីកុមាររងគ្រោះដោយការលង់ទឹកច្រើនជាងបណ្ដាខេត្តដទៃ។
តាមរយៈការរៀនហែលទឹកនេះ ក្មេងស្រី ដែលមានពិការភាព គថ្លង់ មួយរូប លើកឡើងថា ដោយសាររូបនាង មានពិការភាព នាងខ្លាចឈ្លក់ទឹក និងភ័យខ្លាចច្រើន តែគាត់នឹងព្យាយាម។
តាមបទពិសោធន៍របស់លោក ផៃ ផាយុ គ្រូបង្រៀនហែលទឹក និងជាអតីតកីឡាករជម្រើសជាតិថៃ បង្ហាញថា សិស្សមានពិការភាពគ្រប់ស្ថានភាព សុទ្ធតែអាចចេះហែលទឹក តាមរយៈការបង្រៀនរបស់លោក។
លោក បញ្ជាក់បន្ថែមថា ប្រសិនបើ កុមារមានពិការភាព ពួកគេ មានក្ដីស្រមៃចង់ក្លាយខ្លួនទៅជាកីឡាករហែលទឹក ពួកគេគួរចាប់ផ្ដើមពីក្មេង ប៉ុន្តែនៅកម្ពុជា លោកនៅពុំទាន់ឃើញមាននៅឡើយនោះទេ។
គួរជម្រាបថា Blue Dolphin ជាក្លឹបបង្រៀនហែលទឹក បានចូលរួមសហការជាមួយអង្គការក្នុង និងក្រៅរាជរដ្ឋាភិបាលជាច្រើន ដើម្បីជួយបង្រៀនដល់កុមារ ដែលមានជីវភាពខ្វះខាត និងកុមារមានពិការភាពនៅកម្ពុជានេះ ឱ្យចេះហែលទឹក និងជួយសង្រ្គោះខ្លួនឯងនៅពេលលង់ទឹក។ គម្រោងនេះដែរ ក៏ជាការងារស្ម័គ្រចិត្ត ពីក្រុមការងារ Blue Dolphin និងទទួលបានការឧបត្ថម្ភពីលោក ឧកញ៉ា ទ្រីវ កុងហេង ព្រមទាំងសប្បុរសជនក្នុង និងក្រៅប្រទេសផងដែរ។
រូបភាព និងអត្ថបទ៖ មន្ត្រីការិយាល័យទូរទស្សន៍
កែសម្រួល៖ សេង ផល្លី
