នៅសាលប្រជុំសាលាខេត្តសៀមរាប នាព្រឹកថ្ងៃទី២២ ខែកុម្ភៈ ឆ្នាំ២០២៤នេះ កម្មវិធីអាហារូបករណ៍ប្រទេសអូស្ត្រាលី សហការជាមួយរដ្ឋបាលខេត្តសៀមរាប បានរៀបចំសិក្ខាសិលាផ្សព្វផ្សាយចែករំលែកព័ត៌មាន និងបែបបទនានា ស្ដីពីអាហារូបករណ៍ភាសាអង់គ្លេស និងអាហាររូបករណ៍ទៅសិក្សាបន្តនៅប្រទេសអូស្ត្រាលី ដែលមានឈ្មោះថា Australia Awards ជូនដល់និស្សិតគ្រប់សាកសវិទ្យាល័យនៅក្នុងខេត្ត មន្ត្រីរាជការនៃអង្គភាពមន្ទីរពាក់ព័ន្ធ និងសាធារណៈជន សរុបចំនួនប្រមាណ១៧០នាក់។
លោក Michael Sadlon ប្រធានកម្មវិធី Australia Awards ប្រចាំប្រទេសកម្ពុជា បានឲ្យដឹងថា ជារៀងរាល់ឆ្នាំ Australia Awards បានផ្ដល់អាហារូបករណ៍ដល់ប្រជាពលរដ្ឋកម្ពុជាប្រមាណជាង ៤០កន្លែង ដែលអាហារូបករណ៍នេះ បានចាប់ផ្តើមតាងពីឆ្នាំ១៩៥០ ហើយបើគិតពីឆ្នាំ១៩៩៥មកដល់បច្ចុប្បន្ន កម្ពុជាទទួលបានអាហាររូបករណ៍ទៅសិក្សាបន្តនៅប្រទេសអូស្ត្រាលីប្រមាណជាង១០០នាក់ ដោយពូកគេបានទៅសិក្សានៅសាកលវិទ្យាល័យធំៗលំដាប់ពិភពលោក និងពេលត្រឡប់មកកម្ពុជាវិញបានយកចំណេះដឹង ជំនាញ និងបទពិសោធន៍ ជួយអភិវឌ្ឍន៍ដល់វិស័យសង្គម និងវិស័យសេដ្ឋកិច្ចកម្ពុជា ឲ្យកាន់តែមានការរីកចម្រើន។
លោកបន្តថា ចំពោះអាហាររូបករណ៍នេះ ផ្ដល់ឱកាសដល់ប្រជាពលរដ្ឋកម្ពុជា មន្ត្រីរាជការ សាធារណៈ និងនិស្សិតទាំងអស់ ដែលបានបញ្ចប់ថ្នាក់បរិញ្ញាបត្រ មានសញ្ជាតិខ្មែរពីកំណើត ដោយបើកទទួលពាក្យចាប់ពីថ្ងៃទី០១ ខែកុម្ភៈ និងបិទបញ្ចប់ការទទួលពាក្យថ្ងៃទី៣០ ខែមេសា ឆ្នាំ២០២៤។
លោក ចឹក គឹមជុន នាយករងរដ្ឋបាលខេត្តសៀមរាប បានមានប្រសាន៍ថា ក្រោមការដឹកនាំរបស់រាជរដ្ឋាភិបាលកម្ពុជា អាណត្តិទី៧ នៃរដ្ឋសភា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី មានឆន្ទៈយ៉ាងមោះមុត ដោយបានដាក់ចេញនូវកម្មវិធីនយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា សម្រាប់ការកសាងធនធានមនុស្ស ដែលជាលក្ខខណ្ឌចាំបាច់មិនអាចខ្វះបានសម្រាប់ជំរុញអភិវឌ្ឍន៍ជាតិ និងកំណើនសេដ្ឋកិច្ច ប្រកបដោយបរិយាបន្ន និងភាពធន់ ពិសេសការបង្កើនកិច្ចសហការគ្នារវាងក្រសួង ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ មន្ទីរ អង្គភាពជុំវិញខេត្ត គ្រឹះស្ថានសិក្សារដ្ឋ-ឯកជន និងស្ថាប័នអន្តរជាតិនានា ក្នុងការផ្សព្វផ្សាយ ចែករំលែក និងផ្តល់ឱកាសសិក្សារៀនសូត្រ ដល់សិស្ស និស្សិតឱ្យបានទូលំទូលាយ។
ព័ត៌មានជាតិ ថ្មីៗ
លោកទទួលស្គាល់ថា ចំពោះមន្រ្តីរាជការ និស្សិតទាំងអស់ ដែលបានបញ្ចប់ការសិក្សាពីប្រទេសអូស្ត្រាលី តាមរយៈការទទួលអាហារូបករណ៍នេះ គឺបានពាំនាំមកនូវគំនិត ចំណេះដឹង និងជំនាញថ្មីៗ និងមានសមត្ថភាពបន្ថែមទៀតក្នុងការរួមចំណែកអភិវឌ្ឍន៍ប្រទេសកម្ពុជា ឆ្ពោះទៅសម្រេចចក្ខុវិស័យក្លាយទៅជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០ ៕
អត្ថបទ និង រូបភាព ៖ លោក ស៊ុំ គីន
កែសម្រួល៖ លោក លីវ សាន្ត
