ពិព័រណ៌ផលិតផលខ្មែរ និងបន្លែ ផ្លែឈើ លើកទី១៧ ដែលមានរយៈ ៤ថ្ងៃ បានបើកដំណើរការជាផ្លូវការហើយ នៅបរិវេណសួនច្បារព្រះរាជដំណាក់ ក្រុងសៀមរាប នារសៀលថ្ងៃទី២២ ខែកុម្ភៈ ឆ្នាំ២០២៤។
ពិព័រណ៌ពាណិជ្ជកម្ម ដែលរៀបចំដោយក្រសួងពាណិជ្ជកម្ម និងសហការជាមួយរដ្ឋបាលខេត្តសៀមរាបនេះ គោលបំណងជំរុញការផ្សព្វផ្សាយដល់ប្រជាជនកម្ពុជា ឱ្យងាកមកចូលរួមគាំទ្រ និងប្រើប្រាស់ផលិតផលក្នុងស្រុក ជំនួសទំនិញនាំចូលពីបរទេស ហើយព្រឹត្តការណ៍នេះ ក៏ជាផ្នែកមួយ នៃយុទ្ធនាការទិញផលិតផលខ្មែរផងដែរ។
ថ្លែងបើកពិធីសម្ពោធពិព័រណ៌នោះឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម បង្ហាញថា យុទ្ធនាការទិញផលិតផលខ្មែរ គឺជាផ្នែកមួយដ៏សំខាន់នៃការអនុវត្តគោលនយោបាយអភិវឌ្ឍន៍វិស័យពាណិជ្ជកម្មរបស់ក្រសួងពាណិជ្ជកម្ម។ ក្រៅពីការតាំងបង្ហាញផលិតផលកសិផល និងចំណីអាហារក្នុងស្រុក ពិព័រណ៌ពាណិជ្ជកម្មនាពេលនេះ ក៏បាននាំយកនូវផលិតផលវាយនភ័ណ្ឌរបស់ខ្មែរ ជាពិសេសសូត្រកម្ពុជា ដែលជាផលិតផលប្រណីតរបស់ជាតិ។ ឯកឧត្តមបន្តថា តាមរយៈការរៀបចំយុទ្ធនាការទិញផលិតផលខ្មែរ ចំនួន៨រដូវកាលកន្លងមកនេះ បានជួយពង្រឹងខ្សែច្រវាក់ផលិតកម្មក្នុងស្រុកជាជំហានៗ ហើយផលិតករកម្ពុជា ក៏មានចំណេះដឹង ចំណេះធ្វើ និងទទួលបានបទពិសោធន៍ល្អៗជាច្រើន សម្រាប់ពង្រឹង និងពង្រីកផលិតកម្ម អភិវឌ្ឍន៍ផលិតផល និងសេវារបស់ខ្លួនបម្រើឲ្យទីផ្សារ ។
ព័ត៌មានជាតិ ថ្មីៗ
តាមលើកឡើងរបស់អាជីវករ និងអ្នកផលិតក្នុងស្រុកបង្ហាញថា ផលិតផល ដែលពួកគាត់បាននាំយក មកតាំងនាពេលនេះ សុទ្ធសឹងជាផលិតផលក្នុងស្រុក និងពុំមានប្រើប្រាស់ថ្នាំគីមីសម្លាប់សត្វល្អិត ឬប្រើសារធាតុ ដែលរក្សាទុកបានយូរឡើយ។
ក្នុងនោះដែរពួកគាត់ក៏បានអំពាវនាវដល់ប្រជាជនកម្ពុជាទាំងអស់ ងាកមកគាំទ្រផលិតផលក្នុងស្រុក ដែលពុំប៉ះពាល់ដល់សុខភាព។ សូមប្រជាជនកម្ពុជា គិតពីសុខភាពជាងតម្លៃ ព្រោះចំណីអាហារដែលមានផ្ទុក សារធាតុគីមី នឹងបង្កនូវផលប៉ះពាល់ និងជំងឺកាចសាហាវជាច្រើននៅពេលអនាគត៕
អត្ថបទ និងរូបភាព៖ សហការី
កែសម្រួល៖ លោក សេង ផល្លី
