យោងតាមរបាយការណ៍ របស់មន្ទីរទេសចរណ៍ខេត្តសៀមរាប នៅឆ្នាំ២០២៣ ខេត្តសៀមរាបទទួលបានភ្ញៀវទេសចរសរុប ២ ៥២៩ ៥១៤នាក់ ចំនួននេះ មានការកើនឡើងប្រមាណ ៣២.៣៥ភាគរយ បើធៀបទៅនឹងនៅឆ្នាំ២០២២ ដែលមានចំនួន ១ ៩១១ ២៩១នាក់។ ការកើនឡើងនេះ បានលើកទឹកចិត្តដល់គ្រឹះស្ថានឯកជនក្នុងខេត្តជាច្រើន បានពង្រឹង និងពង្រីកសេវាកម្មរបស់ខ្លួន ដើម្បីចាប់យកឱកាសអាជីវកម្មរបស់ខ្លួន។
ក្នុងនោះ ក្រុមហ៊ុនសិប្បករអង្គរ ឬ Artisan Angkor ដែលជាក្រុមហ៊ុនផលិត និងលក់ផលិតផលអនុស្សាវរីយ៍បែបប្រពៃណី និងវប្បធម៌ខ្មែរ ស្ថិតក្នុងក្រុងសៀមរាប បានធ្វើការសម្ពោធហាងថ្មីមួយទៀតរបស់ខ្លួន នៅរសៀលថ្ងៃទី២៤ ខែកុម្ភៈ ឆ្នាំ២០២៤។
តាមការឱ្យដឹងពី លោក កាយ ឡូត ប្រធានក្រុមប្រឹក្សាភិបាល ក្រុមហ៊ុនសិប្បករអង្គរ បង្ហាញថា គិតត្រឹមខែកុម្ភៈឆ្នាំ២០២៤នេះ ក្រុមហ៊ុនរបស់លោក មានសិប្បករ និងបុគ្គលិកបម្រើការ សរុបចំនួន ២៥០នាក់។ ទន្ទឹមគ្នានេះ ក្រុមហ៊ុនមានគម្រោង បើកដំណើរការហាងស្ថិតនៅស្រុកពួកឡើងវិញ និងគ្រោងជ្រើសរើសសិប្បករ និងបុគ្គលិកចំនួន ១៥០នាក់បន្ថែមទៀត។ ក្រៅពីឱកាសការងារនេះ ក្រុមហ៊ុនក៏នឹងបើកវគ្គបណ្ដុះបណ្តាលសិប្បករជំនាន់ថ្មីចំនួន ១០០នាក់ផងដែរ។
ជាមួយនឹងការសញ្ញាវិជ្ជមាន នៃវិស័យទេសចរណ៍ក្នុងប្រទេស លោក កាយ ឡូត រំពឹងថា នៅចុងឆ្នាំ២០២៤ ក្រុមហ៊ុននឹងទទួលបានបុគ្គលិកសរុប ៤០០នាក់ ដែលនេះជាគោលដៅចម្បង របស់ក្រុមហ៊ុន ក្នុងការបង្កើត និងផ្ដល់ការងារដល់យុវជន និងយុវនារីខ្មែរ ដើម្បីលើកស្ទួយ និងផ្សព្វផ្សាយកេរដំណែលវប្បធម៌ និងសិល្បៈខ្មែរ។
អត្ថបទ និងរូបភាព៖ ធន់ ពូថេ
កែសម្រួល៖ សេង ផល្លី
