ក្រោមកិច្ចសហការរវាងអាជ្ញាធរកម្ពុជា និងក្រុមម៉ូតូធំកម្ពុជា ក្រុមម៉ូតូធំប្រទេសថៃ បានមកដល់ខេត្តសៀមរាបដូចការគ្រោងទុកដោយជិះម៉ូតូស្ទើរតែមិនសម្រាក រយៈពេល ២៤ម៉ោង ក្នុងចម្ងាយផ្លូវជាង ១០០០គីឡូម៉ែត្រ ពីខេត្តត្រាត ប្រទេសថៃ។
លោក ប៊ុន រ៉េត ប្រធានក្លឹបម៉ូតូ BMW កម្ពុជា និងជាអ្នករៀបចំព្រឹត្តិការ BMW IRON MAN RALLY 2024 កម្ពុជា-ថៃ បង្ហាញថា គោលបំណងនៃការរៀបចំព្រឹត្តិការណ៍ម៉ូតូធំនេះ ផ្ដោតសំខាន់ទៅលើការស្ទួយវិស័យទេសចរណ៍នៅក្នុងប្រទេសកម្ពុជា ស្របតាមគោលនយោបាយរបស់រាជរដ្ឋាភិបាល អាណត្តិទី៧ ដែលមានសម្ដេចធិបតី ហ៊ុន ម៉ាណែត ជានាយករដ្ឋមន្ត្រី ក្នុងការជំរុញភ្ញៀវទេសចរមកកាន់ខេត្តសៀមរាប ក្នុងយុទ្ធនាការ ទស្សនាខេត្តសៀមរាប ២០២៤។
លោកបន្ថែមថា ព្រឹត្តិការណ៍កីឡាទេសចរណ៍នេះ ក៏ជាការអបអរខួប ៩ឆ្នាំនៃក្លឹបម៉ូតូ BMW កម្ពុជា និងការប្រណាំងម៉ូតូ BMW IRON MAN RALLY 2024 ដែលធ្លាប់បានរៀបចំ ៧ឆ្នាំនៅប្រទេសថៃផងដែរ។
លោក ប៊ុន រ៉េត បញ្ជាក់ថាផងដែរ ក្រៅពីលើកស្ទួយវិស័យទេសចរណ៍ក្នុងប្រទេស ក្លឹបម៉ូតូ BMW កម្ពុជា ក៏បានចូលរួមការងារសង្គមជាច្រើន ជាក់ស្ដែងបន្ទាប់ពិធីទទួលទានអាហារសប្បុរសធម៌នៅល្ងាចនេះ ក្រុមម៉ូតូធំកម្ពុជា-ថៃ នឹងធ្វើការរ៉ៃអង្គាសថវិកា ដើម្បីជួយដល់មន្ទីរពេទ្យកុមារអង្គរ ក្នុងក្រុងសៀមរាប។ លោក ក៏បានថ្លែងអំណរគុណដល់អាជ្ញាធរគ្រប់ជាន់ថ្នាក់ ដែលបានជួយសម្របសម្រួលឱ្យព្រឹត្តិការណ៍នេះទទួលបានជោគជ័យ។
អត្ថបទ និងរូបភាព៖ យូវង្ស និង ទ្រា ពន្លឺ
កែសម្រួល៖ សេង ផល្លី
