មុនកើតឡើងនៃការរាតត្បាតនៃជំងឺកូវីដ១៩ លើសកលលោក និងនៅកម្ពុជា ជាមធ្យមខេត្តសៀមរាប ទទួលបានភ្ញៀវទេសចរអន្តរជាតិចន្លោះពី ១០ ០០០ ទៅ ១២ ០០០នាក់ក្នុងមួយថ្ងៃ ប៉ុន្តែបច្ចុប្បន្ន ជាមធ្យមប្រមាណ ៤ ០០០ ទៅ៥០០០នាក់ក្នុងមួយថ្ងៃ ហើយចំនួននេះ នឹងធ្លាក់មកនៅត្រឹមប្រហែល ២ ៥០០ ទៅ ៣ ០០០នាក់ប៉ុណ្ណោះ ក្នុងមួយថ្ងៃ នៅខែមីនាខាងមុខ។ នេះបើតាមការលើកឡើងរបស់ លោក ង៉ូវ សេងកាក់ អភិបាលរងខេត្តសៀមរាប នៅក្នុងសិក្ខាសាលាពិគ្រោះយោបល់លើ “សេចក្តីព្រាងគោលការណ៍ណែនាំ ស្តីពីការរៀបចំផែនការអភិវឌ្ឍន៍ទេសចរណ៍រាជធានី-ខេត្ត” ក្នុងក្រុងសៀមរាប នាថ្ងៃទី២៦ ខែកុម្ភៈ ឆ្នាំ២០២៤។
លោក អភិបាលរងខេត្ត បន្ថែមថា ទិន្នន័យនេះ បានបង្ហាញពីភាពមិនច្បាស់លាស់ សម្រាប់វិស័យទេសចរណ៍របស់ខេត្តសៀមរាប ថាអាចមានលំនឹងនៅពេលណាឡើយនោះទេ។ លោកពន្យល់បន្ថែមថា ការទទួលបានភ្ញៀវទេសចរតិចនេះ មួយផ្នែកបណ្តាលមកពីកម្ពុជា នៅមិនទាន់ទទួលបានជើងហោះហើរទៅមកពីបរទេសច្រើនដូចមុន ជាពិសេសប្រទេសចិន។
បើតាមការបញ្ជាក់របស់ ឯកឧត្តម កើត ពុទ្ធវរី អនុរដ្ឋលេខាធិការក្រសួងទេសចរណ៍ លើកឡើងថា រាជរដ្ឋាភិបាលកម្ពុជា ដែលមានក្រសួងទេសចរណ៍ជាសេនាធិការ បានគិតគូរយ៉ាងយ៉ាងយកចិត្តទុកដាក់ ក្នុងការស្តារវិស័យទេសចរណ៍ឡើងវិញ។ ជាក់ស្តែង ការរៀបចំសិក្ខាសាលានៅថ្ងៃនេះ វានឹងបង្ហាញអំពីស្មារតីទទួលខុសត្រូវរួមគ្នា របស់គ្រប់ភាគីពាក់ព័ន្ធ ក្នុងការជំរុញអភិវឌ្ឍន៍វិស័យទេសចរណ៍នៅថ្នាក់ក្រោមជាតិ ដែលជាចលករសំខាន់ សម្រាប់កំណើនទេសចរណ៍កម្ពុជា ស្របតាមទស្សនទាន “រួមគ្នាគិត រួមគ្នាធ្វើ និងរួមគ្នាទទួលខុសត្រូវ” ដោយអនុវត្តន៍នូវផែនការអភិវឌ្ឍទេសចរណ៍រាជធានី-ខេត្តដែលបានអនុម័តដោយរដ្ឋបាលរាជធានីខេត្តនីមួយៗ។
ឯកឧត្តម បន្តថា គោលការណ៍ណែនាំស្តីពីការរៀបចំផែនការអភិវឌ្ឍន៍ទេសចរណ៍រាជធានី-ខេត្ត ត្រូវបានរៀបចំឡើងដើម្បីជាផែនទីបង្ហាញផ្លូវដល់រដ្ឋបាលថ្នាក់ក្រោមជាតិ ក្នុងការរៀបចំកសាងផែនការអភិវឌ្ឍន៍ទេសចរណ៍តាមបណ្តារាជធានី-ខេត្តរបស់ខ្លួន និងសិក្សាស្វែងយល់ ការកំណត់បញ្ហា ព្រមទាំងការបង្កើតដំណោះស្រាយប្រកបដោយប្រសិទ្ធភាព ក្នុងអភិក្រម “ភាពច្នៃប្រឌិតនៃការគិត” ជាពិសេសការកំណត់នូវយុទ្ធសាស្ត្រគន្លឹះៗ សម្រាប់ចូលរួមអនុវត្តយុទ្ធសាស្ត្រ “បង្កើន៥ និងអភិវឌ្ឍ៣ (BUILD + 3Ds)” ដែលក្រសួងទេសចរណ៍ក្នុងអាណត្តិទី៧ បានដាក់ចុះ។
ឯកឧត្តម បញ្ចាក់បន្ថែមថា ដោយសារតែ វិបត្តិជាសកលនូវជំងឺកូវីដ-១៩ ក្រសួងទេសចរណ៍ បានដាក់ចុះជាបន្ទាន់នូវ “ផែនទីចង្អុលផ្លូវស្តីពីការស្តារ និងលើកស្ទួយវិស័យទេសចរណ៍ក្នុង និងក្រោយវិបត្តិជំងឺកូវីដ-១៩” ជាមួយនោះ ក្រសួងបាន ជូនដំណឹងដល់រដ្ឋបាលខេត្តពីការធ្វើបច្ចុប្បន្នភាព នៃផែនការអភិវឌ្ឍន៍ទេសចរណ៍ ឆ្នាំ២០១៨-២០២៤ ទៅជាផែនការអភិវឌ្ឍន៍ទេសចរណ៍បច្ចុប្បន្នកម្ម ២០២១-២០២៥ របស់រាជធានី-ខេត្តវិញ។ ក្នុងនោះ ក្រសួងទេសចរណ៍ ក៏បានសម្របសម្រួលការរៀបចំផែនការអភិវឌ្ឍទេសចរណ៍ ដោយយកចិត្តទុកដាក់ខ្ពស់លើយុទ្ធសាស្ត្ររួមចំនួន ៨ មានដូចជា៖ (១) ការអភិវឌ្ឍន៍ផលិតផល និងពង្រឹងគុណភាពទេសចរណ៍ (២) ការសិក្សាទីផ្សារ និងផ្សព្វផ្សាយទេសចរណ៍ (៣) ការអភិវឌ្ឍន៍ហេដ្ឋារចនាសម្ព័ន្ធ និងសម្រួលការធ្វើដំណើរទេសចរណ៍ (៤) សន្តិសុខ សុវត្ថិភាពទេសចរណ៍ និងការគ្រប់គ្រងផលប៉ះពាល់អវិជ្ជមាន (៥) ប្រព័ន្ធច្បាប់ និងយន្តការគ្រប់គ្រង (៦) ការអភិវឌ្ឍន៍ធនធានមនុស្ស និងសមភាពយេនឌ័រ(៧) ការវិនិយោគក្នុងវិស័យទេសចរណ៍ និង(៨) ការអភិរក្ស និងការគ្រប់គ្រងធនធានធម្មជាតិ និងមានចង្កោមសមកម្មភាព សកម្មភាពអាទិភាពរយៈពេលខ្លី មធ្យម និងរយៈពេលវែង ទៅតាមសក្តានុពលនៃធនធាន និងបរិបទរបស់ខេត្តនីមួយៗ៕
អត្ថបទ និងរូបភាព៖ ជា ស្រស់ និងបូ សាវី
កែសម្រួល៖ សេង ផល្លី
